Божествениот Отец, благоустројувајќи ги сите твари, со прикладниот поредок на читање од светите Посланија и свето Евангелие ни дава четири случувања на кои се сеќаваме во Великиот четврток: светото дело на миење на нозете на апостолите, Тајната вечера (кога е востановена светата Тајна Причест), најпрекрасната и најусрдна молитва и предавството.
Синаксар
Поучувајќи ги пријателите свои на Тајните, вистинската Премудрост Божја ја подготвува трпезата која ја храни душата и подготвува за верните чаша вино за живот вечен. Побожно да пристапиме и да воскликнеме: Христос Бог наш е величествено прославен.
Како браќа во Христа, да стекнеме братољубие и да не оскудеваме во сожалување спрема ближниот за да не бидеме заради пари осудени како немилостивиот слуга и да се каеме залудно како Јуда.
Велик четврток,
Служба на Дванаесетте страсни Евангелија
Да се приближиме со страв до таинствената трпеза и со чисти души да го примиме Лебот; да останеме покрај Владиката, за да Го видиме Оној Кој ги мие нозете на своите ученици и ги брише со крпа; да правиме како што видовме, покорувајќи се меѓусебно и миејќи си ги нозете еден на друг. Зашто таква заповед Христос им даде на Своите ученици, но Јуда, роб и лажливец, не ја послуша.
Утрена, Велик четврток.
Читање од Светото Писмо:
Утрена служба:
1 Послание до Коринтјаните 11, 23-32
Свето Евангелие по:
Матеј 26, 2-20
Јован 13, 3-17
Матеј 26, 21-39
Лука 22, 43-45
Матеј 26, 40; 27, 2
Подготви: А.Л.
Велики Четврток
Главно за овој значаен ден од Страдалната седмица е дека Господ тогаш ги востанови двете суштествени тајни за нашето спасение: Светата евхаристија (на Тајната вечера: „Земете, јадете, ова е телото Мое кое за вас се прекршува за отпуштање на гревовите! Пијте од неа сите. Ова е крвта Моја која за вас и за мнозина се излева за отпуштање на гревовите! Правете го ова во Мој спомен“.) и Исусовата молитва („...Вистина, вистина ви велам: што и да посакате од Отецот во Мое име, ќе ви се даде“ (Јован 16, 23). „И што и да посакате од Отецот во Мое име, ќе ви го направам за да се прослави Отецот во Синот. Ако посакате нешто во Мое име, Јас ќе го направам...“, Јован 14, 13 - 14). Со други зборови, на Велики Четврток почнува светотаинскиот живот на Црквата. Денот започна со Христовите последни поуки за карактерот на љубовта што треба да ја стекнеме ако сме Негови, Неговото смирение; се памти миењето на нозете на апостолите што го направи Сам: „Ако Јас, Господ и Учител ви ги измив нозете, тогаш сте должни и вие еден на друг да си ги миете нозете“ (Јован 13; 14). А заврши со предавството на Богочовекот Исус Христос на првосвештениците и фарисеите, извршено од Јуда Искариот, еден од бројот на Дванаесеттемина најблиски Христови ученици.
Друго:
Проф. д-р Ратомир Грозданоски -ВЕЛИК ЧЕТВРТОК
Од Преданието за содржината на Велик четврток
Целоноќната служба на Велики четврток ѝ е посветена на Тајната Вечера, на којашто Спасителот ја востанови Тајната на Светата Евхаристија, оставајќи заповед Пасхата на Новиот Завет да се вкусува во Негов спомен, на Неговото Тело и Неговата Крв пролеана за отпуштање на гревовите. Во богослужењето на овој ден се говори и за предавството на Јуда.
„Беззакониот Јуда, којшто на Тајната вечера ја стави раката во чинијата заедно со Тебе, кон беззакониците ги пружи рацете за да ги прими сребрениците: тој ја пресмета и цената на мирото и не се исплаши да Те продаде Тебе, Кој немаш цена; тој ги пружи и нозете за да му ги измиеш, Му даде лажен целив на Господа, за да им Го предаде на беззакониците: откако се одрече од соборот на апостолите, иако ги фрли триесетте сребреници, не се удостои да го види Твоето тридневно Воскресение. Господи, Кој воскресна, помилуј нѐ.“ (стихира од Вечерната на Велики Четврток)
За Велигден постои обичај да се обојуваат варени јајца во различни бои, но централното место им припаѓа на јајцата обоени црвено. Историјата ни го сочува тоа предание. После Воскресението на Исус Христос Неговите ученици и следбеници заминаа во различни земји, насекаде возвестувајќи ја радосната вест за тоа дека повеќе не треба да се плашиме од смртта. Неа ја победи Христос, Спасителот на светот. Тој воскресна и ќе го воскресне секого што ќе поверува во Него и што ќе ги сака луѓето со љубовта со којашто Тој ги љубеше.
Марија Магдалена се осмели со таа вест да отиде кај самиот римски император Тивериј. Бидејќи постоел обичај кај императорот да не се оди без подароци, Марија Магдалена понела со себе едно обично, бело јајце од кокошка. Го избрала јајцето како подарок со одредена смисла. Јајцето секогаш било симбол на животот: под кревката лушпа се наоѓа, скриен од нашите очи, животот којшто во одреден час ќе се ослободи во вид на малечко пиле. Но, кога Марија почнала да му зборува на Тивериј за тоа дека Исус Христос исто така се ослободи од оковите на смртта и воскресна, императорот се насмеал велејќи: „Тоа е исто така невозможно како и твоето бело јајце да се претвори во црвено.“ И уште не ја завршил реченицата, а јајцето во рацете на Марија Магдалена станало црвено. Оттогаш за спомен на овој настан, кој ја изразува нашата вера во Воскреснатиот Господ, ние ги обојуваме јајцата.
преземено од http://www.paskha.ru/presents/why.h