ЗОШТО НА ПРАЗНИКОТ НА СВ. ВАСИЛИЈ СЕ СТАВА ЗЛАТНИК ИЛИ ПАРИЧКА, А НЕ НА БАДНИК

Историјата на «василопитата» е еден настан, кој се случи во IV век во градот Кесарија Кападокиска, во Мала Азија. Во тоа време, свети Василиј Велики беше епископ на Кесарија и живееше во единство со неговите сограѓани, со љубов, разбирање и помагање еден на друг.
Еден ден, кога Јулијан Отстапникот, нечесен цар и гонител на Христијаните, сакаше да оди за Персија и да војува со Сасанидите, тој помина близу Кесарија. Тогаш св. Василиј, кој добро го познаваше, бидејќи беа соученици во Атина, излезе заедно со народот да го пречека и почести. Јулијан побара дарови, очекувајќи злато и скапоцености. Но, светиот немаше ништо друго, освен три леба од јачмен, кои му ги принесе на злобниот цар. Треба да се знае дека тој не принесе скапоцености, бидејќи не сакаше да даде нешто повредно, туку бидејќи мнозинството на жители во Кесарија беше навистина сиромашно. Кога го виде тоа, Јулијан им нареди на своите слуги да соберат трева од ливадата и да му ја дадат на епископот за возврат. Тогаш светиот праведно му одговори на Јулијан: „Ние, цару, откако ни побара, ти  принесовме од нашата храна, па и ти, очигледно, ни возврати од тоа што и самиот го јадеш.“ Кога ги слушна овие зборови, Јулијан многу се налути и вети дека кога ќе извојува победа во Персија, ќе се врати во Кесарија, ќе го запали градот и ќе ги пороби неговите жители, а Василиј ќе го награди со иста мера.
Поради тоа, св. Василиј побара од народот да го соберат сето злато што го имаат и да го зачуваат некаде, за да му го дадат на среброљубивиот Јулијан кога ќе се врати,  па така, можеби, да го намалат неговиот гнев. Исто така, епископот им наложи на Христијаните да постат и да се молат, додека не се врати Јулијан.
За време на богослужбата, светиот имаше небесно видение: Пресветата Мајка Божја, носена на ангелски престоли, нареди да го повикаат маченикот Меркуриј и го испрати со војска од ангели против Јулијан, непријателот на нејзиниот Син. Тогаш го виде и св. Меркуриј, вооружен и јавнат на коњ, како заедно со ангелските војски, тргна против безумниот цар и го уби со своето копје. Освестувајќи се од ова видение, св. Василиј, во придружба на неколку клирици, побрза во храмот на свети Меркуриј, кој сто години пред тоа имаше пострадано во Кападокија и видоа дека од храмот беа исчезнати неговите мошти и копјето, кои таму се чуваа. Подоцна дојдоа во градот вести дека Јулијан е убиен. Всушност, тоа што го виде великиот Василиј, беше токму тоа, што во истиот миг, навистина се случи на едно место недалеку од Кесарија.
Така се спаси градот Кесарија. Но, тогаш свети Василиј се најде во многу тешка положба. Требаше да го подели златото, кое граѓаните го собраа за да се избават од гневот на Јулијан, но таа поделба да е праведна, односно, секој да си го добие своето. Се помоли светителот и Бог го просвети што да направи. Тој ги повика своите ѓакони и помошници и им рече да замесат лебови и во секој леб да стават по малку од златните предмети. Кога лебовите беа готови, епископот ги подели како благослов на сите жители на градот Кесарија. Во почетокот сите се зачудија, а потоа нивното изненадување стана уште поголемо: кога секое семејство го пресече лебот, во него најде злато, но не било кое, туку токму она  што му го имаше дадено на својот епископ.
Така значи, со тогашната «василопита», св. Василиј им донесе и благослов на луѓето и радост заради избавувањето. Оттогаш и ние, на денот на свети Василиј, 1ви јануари, месиме василопита и внатре ставаме златник, во спомен на чудото, кое се случи во Кесарија.

 Извор: Бигорски манастир

10 јануари лето Господово 2013

Друго:

Василопита

Потребни состојки:

    1 300 гр. брашно
    1 ½ филџан растопен путер или маргарин
    1 ½ филџан шеќер
    1 ½ филџан млеко
    8 јајца
    3 кесички сув квасец
    кора од еден лимон
    кора од два портокали
    сок од еден до два портокали
    една мала лажичка сол
    малку потпечени бадеми
    шеќер во прав

 Начин на подготовка:

Во голем сад ставете го брашното, квасецот, кората од лимонот, портокалите и солта. Измешајте ги состојките. Потоа додадете ги стопениот путер, изматените јајца и малку од сокот од портокали. Измешајте ги состојките и започнете да го месите тестото. Ако тестото е премногу суво можете да додадете малку од сокот од портокали. Кога тестото ќе стане меко и еластично, ставете го пак во истиот сад, покријте го со чиста прекривка, и со уште една, подебела прекривка и оставете го на топло место да нарасне 2-3 часа. Од време – навреме надгледувајте дали тестото го зголемило својот волумен два пати повеќе. Кога тестото доволно ќе нарасне, месете го уште неколку минути и ставете го во намастена тркалезна тепсија. Тепсијата треба да биде малку поголема од тестото, за да има простор тестото да нарасне, а да не прелее преку краевите на садот. Немојте да заборавите да ставите во питата завиткана паричка во алуминиумска фолија. Кога по втор пат тестото ќе нарасне во тепсијата, можете да го украсите со бадеми. Нараснатото тесто премачкајте го со изматено јајце и печете ја питата на 180°С околу 1 час. Откако питата ќе се испече, оставете ја да се олади и попрскајте ја со шеќер во прав.