--------------------------------------------------------------------------------

Скопје, 18 март (МИА)

Во влажни и несоодветни услови се чуваат и стотина слики и други предмети од колекцијата на Музејот во Куманово, пишува „Дневник“.

Антиквитетите пронајдени на мегалитската опсерваторија Кокино се чуваат во гаража, бидејќи кумановскиот музеј нема простор за депо каде што би се чувале драгоцените предмети. Во влажни и несоодветни услови се чуваат и стотина слики и други предмети од колекцијата на Музејот. Јовица Станковски, директор на кумановскиот музеј вели дека овој проблем не е нов, но се усложнува. Како што се зголемува бројот на антиквитетите што археолозите ги пронаоѓаат на локалитетите, така се намалува просторот каде што потоа треба да се чуваат.Станковски вели дека има решение за проблемот, само никако не може да се договорат со тие што може да помогнат. Кумановската подружница на Јавното претпријатие за стопанисување станбен и деловен простор поседува неколку канцеларии што се во зградата на музејот. Тие простории се изнајмуваат и може да се користат и како депоа.

- Проблемот со депоата станува сериозен. Има простории што би можеле да ги искористиме, но немаме никакво разбирање од подружницата на Јавното претпријатие за стопанисување станбен и деловен простор. Тие имаат празни канцеларии. Долго бараме да ни ги изнајмат. Не ги бараме на подарок, ќе си плаќаме кирија. Преполни сме со материјали, немаме каде да ги однесеме предметите, но претпријатието наместо нам, просториите им ги изнајмува на адвокати и на разни фирми - вели Станковски.Бобан Јовановски, раководител на техничката служба во кумановската подружница на Јавното претпријатие, вели дека ситуацијата е малку поинаква. Воопшто нема ников проблем. Точно е дека имаме простории што се во зградата на Музејот, но тие со години ги користат изнајмувачи. Со Музејот немаме никаков проблем, но и тие, како и сите други, треба да се јават на редовните огласи за издавање под наем. Од Музејот сакаат да склучиме непосредна спогодба, но ние не смееме да работиме така - објасни Јовановски.Во меѓувреме, артефактите пронајдени на праисториската опсерваторија се сместени во гаража. Станковски вели дека Владата им ветила оти ќе им ги доделат просториите што сега се под ингеренции на Јавното претпријатие, но има бирократска процедура, која мора да се реши. Проблемот е тоа што нема имотни листови за просторот. Додека не се среди состојбата, не може од Владата да бараме да ни го препише - вели Станковски.Истражувачкиот тим од кумановскиот музеј деновиве го средува материјалот што лани го пронашле на Кокино. Чекаат да дојде пролет за да почнат нова серија истражувања. Годинава ќе работат со 200 илјади денари, кои им ги додели Министерството за култура. Имаат дополнителен буџет од половина милион денари за уредување на локалитетот.

Центарот за нови иницијативи во уметноста и културата „Локомотива“ од денеска до 31 март ја организира првата Номадска танц-академија во Музичко-балетскиот училиштен центар „Илија Николовски-Луј“ во Скопје, наведува весникот. Часовите ќе траат две недели, а програмата ќе продолжи во Софија, Белград, Загреб и во Љубљана, во културните центри што се дел од Балканската танцова мрежа.

Номадската танцова академија е проект што ќе трае три години и има едукативна и истражувачки програма, како и таква за развој на продукција и копродукции. Првата генерација на Академијата ја сочинуваат 14 танчари, кореографи и актери од регионот со кои во Скопје ќе работат истакнати кореографи - Галина Борисова од Бугарија, Селма Баниќ од Хрватска, Ерик Ламуро од Франција. Од Македонија на Академијата ќе учествуваат Кире Ѓоревски и Кире Миладиноски. Месецов „Локомотива“ слави пет години од основањето. Јубилејот ќе го одбележат и со проектот „Културна и уметничка размена“, што го работат во соработка со уметници од Франција.

Во МАНУ секоја година номинираат по еден претставник за Нобеловата награда за литература, пишува „Вечер“. Досега, иако немаме добиено награда, ги имаме номинирано академиците Блаже Конески, Славко Јаневски и Матеја Матевски. Но, кој ќе биде номиниран годинава, и кој бил номиниран изминатите години, од МАНУ не откриваат. "Во сите писма од Шведската академија пишува да не се даваат тие податоци во јавни гласила", вели за ВЕЧЕР академик Влада Урошевиќ, од одделението за уметност во МАНУ. И на сајтот на Шведската академија стои дека номинациите и предлозите се чуваат во тајност дури по педесетина години.

"Ние секоја година праќаме се што бара Шведската академија. МАНУ тоа го прави континуирано повеќе од петнаесет години", објаснува академик Урошевиќ.

"Важен е континуитетот. Важно е секоја година да испраќаме предлози. Еден член на Шведската академија ми рече дека тие секоја година испраќаат околу 300 покани до различни институции, а добиваат околу 200 одговори. Бројката е голема, но тие внимателно водат евиденција околу тие работи", вели Урошевиќ.

Тој објаснува дека нашите писатели пред Шведската академија ги претставуваат со опширни описи на животот и делото, како и со сите нивни преведени дела на светски јазици, или евентуално на некој од другите европски јазици. Во 2007 г. престижната награда ја доби Дорис Лесинг, а претходната турскиот писател Орхан Памук.

Македонската пијанистка Ирина Наумовска на почетокот на месецов имаше солистички концерт во Хамаматсу, Јапонија, пишува „Вест“. Наумовска настапила по покана на Културниот центар ИВАТА, откако лани успешно настапила на музички фестивал во истиот град, кој важи за музички центар на Јапонија. Во овој град, вели Наумовска, покрај тоа што има Музичка академија, е и фабриката на „Јамаха“ за клавири, па затоа таму има многу концертни сали и богато развиена музичка култура.

Наумовска настапила во преполна сала со околу 850 седишта. Како што вели, таму имаат практика за време на концертот публиката да пополнува анкетни листови со оценка дали сака повторно да го види уметникот на гостување. Наумовска ја добила поддршката од публиката, како и од критиката.

Нормални и потребни се реакциите на културната јавност во земјава за сето тоа што се случуваше со Струшките вечери на поезијата во изминатиов период, пишува „Време“. Но, сега треба да бидеме конструктивни и да работиме во интересот на манифестацијата, а не дополнително да ја поткопуваме. Тоа значи да ја оформиме програмата, а политичките прашања и проблеми да оставиме да ги решаваат политичарите. Како да заборавивме дека СВП е поетска, а не политичка манифестација, порачува писателот Данило Коцевски, директор на Струшки вечери на поезијата, кој од годинава е на чело на манифестацијата.

Меѓународниот ден на Франкофонијата 20 март, започна во изминатите десеттина дена да се одбележува со неколку музички настани, но сето она што е планирано да се одржува во земјава до 10 април, вчера беше презентирано и на прес- конференција во Скопје на која говореа амбасадорот на Канада, Роберт Мекдугал, како претставник на земјата што годинава претседава со Меѓународната организација на Франкофонијата и амбасадорот на Франција, Бернар Валеро, заедно претставниците на Националната комисија за Франкофонија на Република Македонија, координаторот Сашко Стефков и заменичката Вера Лалчевска, пишува „Утрински весник“.

Од денес до 25 март во средните училишта во земјава амбасадорите на земјите членки на Франкофонијата ќе одржат предавања за оваа меѓународна организација, а на свечениот ден 20 март, заменик претседателот на Владата Габриела Коневска - Трајковска ќе и одржи прием. Истиот ден е наречен и Ден на франкофонска музика која според планот треба да се шири од кафулињата во центарот во Скопје.

На 21 март во паркот меѓу Владата и Градскиот стадион свечено ќе бидат откриени скулптури подарени на Паркот на Франкофонијата од Факултетот за ликовни уметности на Универзитетот „Свети Кирил и Методиј“ и од амбасадите на Франција и Бугарија во земјава. Низа натпревари, свечености од областа на францускиот јазик, како и презентации на образовните можности кои ги нудат земјите членки на Франкофонијата, ќе бидат одржувани во училиштата во земјава, библиотеките и книжарниците, а на 10 април во Мултимедијалниот центар „Мала станица“ ќе биде отворена и изложба на стрипови на тема: „Поминувачи на граници“.

Меѓународната организација на Франкофонијата се смета за една од најголемите организации во светот, која брои 68 држави и влади членки распространети на петте континенти. Република Македонија е нејзина полноправна членка.

Филмот „100 дена во Палермо“ на режисерот Џузепе Ферара ќе биде прикажан вечерва во 20 часот во Кинотеката на Македонија, како дел од програмата на 10. фестивал на италијански филмови насловен „Прозорец кон италијанскиот филм“, пишува „Шпиц“.

Ова е и дел од претфестивалската програма на претстојниот Скопје филм-фестивал, кој треба да почне на 29 март. „100 дена во Палермо“ е од 1984 година, а играат Лино Вентура, Џулијана Де Сио, Лино Троизи, Стефано Сата Флорес.

Најавено е дека режисерот Ферара ќе присуствува на проекциите на 20 и 21 март. Неговите филмови ја пресликуваат италијанската историја на 50-тите години, давајќи многу жива претстава за најзначајните проблеми што ја засегаат Италија, како што се организираниот криминал и борба против него, корупцијата и тероризмот со политичка заднина. Фестивалот почна вчера, а ќе трае до 22 март.

Друштвото на ликовните уметници на Македонија, на десетгодишнината од првото и единствено претставување во Париз, подготвува уште поголемо гостување во градот на уметностите, наведува весникот.

Гостувањето на ДЛУМ во Париз беше најавено при преселувањето на друштвото во новите простории во Домот на АРМ, а сега во тек е интерен конкурс за уметниците што ќе бидат претставени во француската престолнина. Претседателот на ДЛУМ, Тања Балаќ, информира дека во тек се подготовките за мегаизложба во „Ците Интернатионале дес Артс“, за што е потпишан договор со сопствениците на комплексот. Таму земјава располага со едно ателје.

- Закупен е сиот расположлив галериски простор и изложбата се очекува да биде отворена на 14 мај годинава. Поради разбирливиот интерес кај нашите членови, изложбата ќе биде селективна, објаснува Балаќ.

Селекцијата ќе ја прават еминентните критичарски имиња, Владимир Величковски, Небојша Вилиќ и академскиот сликар Милош Коџоман, претседател на Уметничкиот совет на ДЛУМ. Делата се собираат во Музејот на современа уметност, а рокот за пријавување е до 27 март. рп/паг/9:22