„Некој свештеник, со документ од Вселенскиот Патријарх, на едно од неговите патувања го посети градот Ерзерум во Ерменија.
Во храмот на светите маченици Минас, Виктор и Викентиј, имало многу свети мошти, меѓу кои и стапалото на света Ана. За да не остане оваа светиња во рацете на инославните, тој ги купи овие мошти, добивајќи уверение од митрополитите на Кесарија Кападокиска г. Епифаниј и од Силвестер од Халдија.
Неколку години подоцна двајца арапски архиереи, од Антиохиската Патријаршија, одеа на Света Гора просејќи милостина, носејќи ги со себе моштите на света Ана и уверението за автентичност, кои ги беа купиле од наведениот свештеник.
Стигнувајќи во скитот Провата го сретнале духовникот Матеј од Лезвос, кој беше исповедник на војводата Кантакузин. Старецот Матеј имал многу пари, па ги купил моштите од света Ана, заедно со уверението за нивната автентичност.
Кога Дионисиј III Вардалис го проширил главниот храм на скитот во 1666 година, браќата од скитот решија да ги побараат светите мошти од света Ана. Испратија делегација во скитот на Свети Ѓорѓи во Провата, каде што престојуваше духовникот Матеј од Лезвос. Делегацијата ја претставуваа духовникот Герман и духовникот Дионисиј од Мала Света Ана, кои и обајцата беа по потекло од Лезвос.
Старецот Матеј одбиваше на почетокот да им го даде ова скапоцено богатство. Но по петнаесет денови, без никаков притисок од отците на скитот, веројатно поради некое видение што го имал, отиде во Света Ана и ги положи во главниот храм светите мошти, каде што се чуваат до денес, и извршуваат многу чуда.
Епископот Родостолски г. Хризостом го пишува следново за светите мошти на света Ана:
„…Со страв се допираме до светите мошти на света Ана – сечесниот табан од стапалото на светителката – кое уште одамна е сочувано во светиот олтар од киријаконот (главниот храм) и во одредени моменти се изнесува. Има многу нешта што може да ги помисли нашиот ум…
Од овие свети мошти се зачна, беше носена, и се роди застапничката на нашето спасение, Марија.
Ова свето стапало ја носеше Пресветата Ќерка во двориштата на Назарет околу три години и чекореше следејќи ги ножињата на богодетето Маријам во храмот на Соломон, за да се раздели од неа засекогаш, откако како малечка ја донесе и ја посвети според доброволното ветување и исполнување на Божествениот совет во Светињата на светињите, заради ангелската подготовка за нејзината мисија за спасение на светот.
Многу чудеса ја следат историјата на овие свети мошти, како и побожноста на народот кон светата Богопрамајка Ана, но и призивањето на нејзиното име за разрешување на врските од бездетноста и за добивање на дете, и многу се децата кои го носат нејзиното име, или она на нејзиниот сопруг Јоаким, бидејќи се родиле како чудо, поради нејзините молитви за разрешување на бездетноста.
Врз овие свети мошти се осветува таканаречениот појас на света Ана, којшто им помага на верните кои сакаат да добијат деца.
Овој појас на света Ана го следи осветување врз моштите на света Ана, и помазување со масло од незгаснатото кандило на света Ана, кое гори пред чудотворната икона на света Ана, која се наоѓа во скитот на Света Ана, богопрамајката Ана на Света Гора, и упатства и молебен канон на света Ана.
Многубројни се чудата кои постојано ги извршува света Ана и раскажувањата на монасите од скитот за брачните парови кои ја изгубиле секоја надеж за добивање деца, и станале родители со помош на света Ана, кога со побожност и вера прибегнале кон неа и побарале помош од неа.
Чудото со султанот и кандилото на света Ана
Карактеристично е раскажувањето кое следи, за Султанот кој добил деца по молитвите на света Ана.
Султанот не можел да има деца, и поради тоа бил многу загрижен. Од жителите на островот, кои оделе често на Света Гора и во скитот на Света Ана, слушал за чудата на Пресвета Богородица и за помошта која таа им ја давала на бездетните парови, за да добијат деца.
Поради тие приказни кои често ги слушал решил да испрати дарови за скитот преку некои поклоници, за света Ана, и побарал од нив да му донесат свето масло од кандилото и света вода од Света Ана.
Но, христијаните, бидејќи Султанот бил од друга вера, ги фрлале даровите и ништо не му донесувале.
Султанот настојувал и повторно испраќал дарови за светителката и пак барал да му донесат света вода и масло, но овој пат строго им се заканил на поклониците, во случај да не му донесат.
Монасите од скитот, бидејќи Султанот не бил христијанин, и поради заканата од него, му испратиле обична вода, наместо света, и обично масло, наместо осветено.
Но, света Ана, поради верата и упорноста на Султанот, му помогна и му се роди едно здраво дете и тој со благодарност ѝ подари на света Ана едно кандило, кое сѐ уште стои пред иконата, кое го имаше таксано, но бидејќи филигранџијата украл дел од скапоцениот материјал, Султанот во долниот дел поставил едно јајце, за да го пополни празното место, и за да биде таксаното потполно.
Овде треба да истакнеме, дека во април 2013 година кандилото се нишаше крстообразно.
Преданието вели, дека кога кандилото се ниша на празниците, најавува убави настани, додека кога напротив се ниша во обични денови, тогаш се верува дека ова е најава за неблагопријатни настани.
Мајки, не очајувајте!
Уште едно чудо. Света Ана навистина е чудотворка! Мојот брат и снаа имаа сериозни здравствени проблеми и нивните лекари ја исклучија секоја веројатност да имаат дете на природен начин, па дури ни со вонтелесно оплодување.
По 5 години обидување и откако веќе лекарите не можеа да направат ништо, оставија сѐ на Бога. Мојот брат отиде на Света Гора, во скитот на Света Ана и се поклони пред нејзините свети мошти и пред нејзината чудотворна икона.
Таму старците му кажале дека, доколку се согласува и неговата сопруга, тие би му дале упатства и некои благослови (масло, појас од света Ана и др.) за да знаат што да прават, и старците да се молат секој ден, во текот на 45 денови, и „чудото ќе се случи, ако сака светителката и ако верувате!“
И навистина, по еден месец по поклонението на мојот брат на Света Гора, околу 15 јули 2014 година, мојата снаа остана бремена, во неделата на Пресвета Богородица. Околу 2 месеци таа не можеше да сфати дека е бремена, бидејќи не веруваше дека тоа може да се случи на чудесен начин. Сѐ до оној ден, кога при крајот на септември самата света Ана ѝ дојде во сон и ѝ даде едно бебе во нејзините прегратки и ѝ рече: „Земи го ова бебе, твое е“.
Следниот ден таа направи тест, и навистина беше бремена! Два месеца подоцна и додека имаше многу проблеми и беше во болница многу измачена и исплашена, да не се случи нешто наопаку и да не го изгуби бебето, светителката дојде пред неа како во видение, како во сон, во 11 часот претпладне и ѝ рече: „Јас сум света Ана, не грижи се, ти дадов едно девојче и тоа е здраво. Ќе ѝ дадеш име – Ана“. Снаа ми почувстува како се буди со плачење и почна да ни раскажува за видението што го виде и претрпе шок, ја виде жива со лик како на Пресвета Богородица!
Навистина следниот ден направија снимање и лекарот ѝ рече дека 100% е девојче! Едноставно, ние тоа го знаевме еден ден пред лекарот, бидејќи тоа ни го кажа самата света Ана! Сега е во петти месец и сѐ е во ред. Одлучив да ви го изложам сето ова, бидејќи денес е нејзиниот празник и тоа е најмалото нешто што би можела да го направам во нејзина чест!
Верувајте во Бог, барајте ја помошта на света Ана и таа ќе ви го покаже начинот на кој сѐ ќе стане добро. Некогаш ми беше тешко да поверувам дека се случуваат чуда, но сега ви велам дека е вистина, сѐ додека да дојде и вашиот час да го доживеете тоа. Бидејќи чудото се доживува, и не се објаснува. Благодатта на света Ана да нѐ закрилува сите нас, а особено паровите кои сакаат да станат родители, а сѐ уште не успеале!
Благословот на Пресвета Богородица и на нејзината мајка света Ана да биде секогаш со вас! Амин.
Молитва кон света Ана:
„Господи Седржителу и Сесилен, Кој само со збор си го создал небото и земјата и сѐ што се гледа околу нас, Кој си ги избавил нашите татковци од рацете на Фараонот, Кој со Својата заповед го раздели морето и паднаа во него Египтјаните. Ти, Боже, Кој ги хранеше 40 години во пустината, Ти, Кој си ја благословил Сара, жената на Авраам и го роди Исаак во своите стари години, Ти, Кој ѝ подари на онаа Ана и таа го роди Самуил пророкот. Ти, дај ми и мене, на Твојата слугинка, дете, и не оставај ме да бидам посрамена и понижена во сиот мој род.
Господи Боже мој, та не сум ли и јас како едно од животните? Зошто се разгневи на мене и ме остави неплодна? Ти, Кој ги благослови созданијата и рече: „Плодете се и множете се“, дај ми и мене семе и плод на утробата, и ако родам било машко, било женско, да Ти го подарам со сета моја радост и да го донесам во Твојот храм и да Ти го посветам Тебе“.
Подготвил и превел од грчки јазик: Свештеник Јани Мулев
Православна светлина бр. 62
Преп. Јоаникиј Велики; Св. свештеномаченик Никандар, епископ Мирски и Ермеј презвитерот; 
