ВОВЕДНИК:
Митрополит Брегалнички г. Иларион
“Раѓањето Твое, Христе Боже наш,
светот го осветли со светлината на Богопознанието.
Преку неа служителите на ѕвездите,
се учеа од Ѕвездата да Ти се поклонуваат, Сонце на Правдата, и да Те познаат, Исток од Висините, Господи, Слава ти! (Тропар на Рождеството Христово )
Возљубени читатели!
Многумилостивиот Бог наш, благослови да излезе од печат новиот број на “Троичник”, за ваша и наша духовна полза, за утврдување во верата и за поголема духовна радост пред големиот православен празник, Рождество по плот на нашиот Господ Исус Христос - Божиќ. Уште еднаш сакаме да ја искажеме нашата голема православна радост, што ова заедничко списание станува сè повеќе барано, не само од верниот народ Божји, туку и од сите кои се жедни за Бога и кои сакаат да го примат во своето срце. Сега е време на спасението, настапи часот кога мораме повеќе од било кога во досегашната човечка историја, да го шириме словото Божјо, особено денес кога владее духовна глад и жед за спознавање на вистината. А Бог е Вистина, и успехот на ова наше мало мисионарење, ќе биде целосен, само доколку заедно се трудиме на нивата Господова, со заеднички сили, подвизи и самопожртвување да го посееме словото Христово во срцата на сите наши најмили. Нема поголем дар за слепиот, од тоа да му дадеме вид, нема поголема милостина за сиромавиот, од тоа да му подариме богатство, нема поголема љубов кон паднатиот во гревови и страсти човек, од тоа да го приведеме кон патот на спасоносното Евангелие и да го доближиме до Бога и до Небесното Царство. Токму затоа постојано се радуваме, што ова наше скромно списание го примате слично на витлеемската пештера којашто го прими Христос во себе, и како што нејзината темнина беше осветлена од Предвечното Сонце - Богомладенецот Христос, така и словото Божјо кое што ви го нудиме во овој нов предбожиќен број, се надеваме дека ќе ја осветли секоја темнина во вашиот живот, зашто Христос е Светлината “Која го осветлува секој човек”(Јован 1, 9). Словото Божјо доаѓа за да го разбуди заспаниот модерен европски човек, “доаѓа и тропа на вратата, и секогаш сака да влезе, затоа отвори ги дверите на твоето срце, раскрили ја длабочината на твојата душа, па ќе го спознаеш богатсвото на смирението, ризницата на мирот и сладоста на благодатта”, вели Св. Амвросиј Медиолански.
Мили чеда во Господа!
Во пресрет сме на еден од најголемите православни празници, кој е Мајка на сите наши останати пазници. Во овој свет, изопачен од гревот и ѓаволот, кога целата земја беше осквернета и извалкана од лагата, омразата, себичноста, блудот и развратот, кога ѓаволот со своите мрежи на овоземните наслади, успеа да го улови речиси целото, паднато во грев човештво, се Овоплоти Бог, за со своите пламени очи, со љубов да нè погледне и да нè избави од смртта и трулежноста, за да нè соедини со Себе и да ги земе на Себе гревовите на сите луѓе. Овоплотувањето на Христос, Синот Божји и Неговото Раѓање од Пресвета Богородица, е доказ на љубовта Божја кон паднатиот човечки род. Со Своето доаѓање во човечко тело, Бог совршено покажа и докажа дека Он е Љубов. Синот Божји, се роди по плот, токму на Божиќ, за да го уништи гревот и да го спаси човекот од смртта, бидејќи првиот човек – Адам, ја прекрши заповедта дадена од Бога и го направи првиот грев, подложувајќи ги сите луѓе по него на смртното ропство и оддалечувајќи го човекот од Бога. Затоа, Вториот Адам – Христос, го победи гревот, ја уништи смртта и го врза ѓаволот, а на човекот му подари богоопштење, односно му го врати изгубеното достоинство и го удостои со живот во заедница со Бога.
Богочовекот Исус Христос се Овоплоти и Роди од Пресветата Дева, за да ја врати во луѓето боголикоста, зашто Оној Кој е Образ на Отецот требаше да го возобнови човекот кој е создаден по образ Божји. Никој друг освен Христос кој е Лик на Отецот, не можеше да го врати Адама во рајот, а со него и сите луѓе кои се родија од него, бидејќи сите ги споделуваа последиците од гревот. Никој друг освен Него, ниту ангелите, ниту луѓето. Како што вели Св. Атанасиј Велики: “Бог стана човек, за човекот да стане бог (по благодат)”. Затоа, Божиќ е празник на помирување на човекот со Бога, празник на мирот и на обединувањето на небото и земјата. Луѓето за свои браќа ги добија ангелите, херувимите, серафимите и останатите небесни сили, и добија посинување од Бога, добија можност да се наречат синови Божји по благодат. Божиќ е уште и ден на радоста, утехата, милосрдноста, љубовта, кротоста, чистотата, девственоста, среќата и убавината. Едноставно не постојат доволно зборови за да ја искажеме убавината и значењето на овој за нас пресветол ден.
Затоа наши драги читатели, да се потрудиме да бидеме сведоци на ова преубаво помирување на Бога со луѓето, да го молиме Бога преку целиот наш Божиќен пост, да нè направи скапоцени садови на благодатта Божја, да ги освети нашите души и да ги преобрази во пештера, а срцата да ги претвори во јасли за да можеме да го примиме Богомладенецот во себе, да се молиме да ни овозможи со вера да се поклониме на Предвечното Дете и заедно со ангелите да станеме благовесници на Рождеството Христово и мирот Божји да можеме да го пренесеме на сите луѓе во светот, бидејќи токму денеска ни е многу потребен.
“Слава на Бога во висините, а на земјата мир
и меѓу луѓето добра волја” (Лука 2, 14).
ХРИСТОС СЕ РОДИ – НАВИСТИНА СЕ РОДИ!!!
Новиот број содржи:
протоереј Јован Бриа
ХРИСТОВИОТ РОДОСЛОВ
епископ Калистос (Вер)
КАКО ДА ЈА ЧИТАМЕ БИБЛИЈАТА?
свети Јован Златоуст
МЕСТО ЗА ПОДВИГ Е СЕКАДЕ ОКОЛУ НАС
архимандрит Рафаил (Карелин)
НЕ ПРАВИ ПРЕЉУБА
Митрополит Брегалнички г. Иларион
СЛОВО ЗА СВЕТОТО КРШТЕНИЕ
ЖИТИЕ НА СВЕТИОТ АПОСТОЛ ФИЛИП
психолог Слободанка Поп-Андонова
РЕЛИГИОЗНО ОБРАЗОВАНИЕ
свештеник Влатко Мирасчиев
ЛИХВАРСТВОТО - ИНТЕРЕС ИЛИ РОПСТВО?
КАКО ДА НАЈДАМ ЗА СЕБЕ ДУХОВЕН ОТЕЦ?
протојереј Златко Ангелески
ЧОВЕЧКИОТ ЗБОР
дипл. теолог Кирче Трајанов
ХРИСТИЈАНИЗАЦИЈАТА НА
МАКЕДОНСКИТЕ СЛОВЕНИ
монах Мојсеј Светогорец
ПРАВОСЛАВНОТО ПОДВИЖНИШТВО
ТРОИЧНИК - списание за православна вера култура, уметност, образование и воспитание,
година В, број 20, излегува четири пати годишно
е-маил: Оваа е-адреса е заштитена од спамботови. Треба да ви е овозможено JavaScript за да ја видите.
издавач: Брегалничка Епархија
на Македонската Православна Црква, Штип.
http://www.mpc.org.mk/
Главен и одговорен уредник: Митрополит Брегалнички г. Иларион
Уредувачки одбор: јеромонах игумен Дамаскин,
протоереј Николче Ѓоргев, свешт. Климент Мишањ,
свешт. Влатко Мирасчиев, дипл. теолог Жаклина Трајчев,
дипл. теолог Жаклина Ѓоргиева.
лектура и дизајн: ѓакон Тони Петрушевски
печати: Европа 92, Кочани
Бесплатниот примерок од списанието можете да го најдете во црквите во Брегалничката епархија.
Посети:{moshits}