Скопје, 23 септември 2011 (МИА)-Претседателот Ѓорге Иванов денеска во претседателската вила Водно на пијанистот Симон Трпчески му ја додели титулата „Национален уметник на Република Македонија“.
Ова признание во Република Македонија се доделува првпат.
Претседателот Иванов на свеченостa рече дека Трпчески преку клавијатурата ја прославил Македонија во светот и докажал дека е земја на извонредни уметници.
- Прогласувајќи го Трпчески за прв национален уметник, воедно ја искажуваме нашата посветеност кон уметноста и трајните вредности на музиката. Уметноста не препознава поделби и е најголемиот архитект на соживот и заедничката иднина меѓу народите и заедниците. Уметниците биле, се и ќе бидат најзначајните гласници на мирот, толеранцијата и разбирањето. Низ уметноста тие ги надминуваат сите граници и недоразбирања и невозможното го прават возможно, рече Иванов.
Прогласувајќи го Трпчески за национален уметник, посочи претседателот, ние всушност го праќаме во мисија на поврзување и градење пријателства во Македонија, но и меѓу земјата и светот.
- Македонија е мајка која отсекогаш давала големи луѓе кои го менувале светот, кои просветлувале, создавале и оставале трајни вредности. Горди сме што еден од тие големи синови на Македонија е нашиот драг Симон Трпчески, додаде претседателот Иванов.
Министерката за култура Елизабета Канческа-Милевска рече дека со оваа титула, по примерот на многу држави од Европа и светот, трајно се вреднува и бележи влогот на Трпчески кој остварил врвна комуникација со културните случувања насекаде.
- И покрај сите меѓународни успеси и признанија, Симон не ја заборави Македонија, своите македонски корени и својата публика. Тој денеска е дел од музичкиот пантеон на светската пијанистичка интерпретација, а со својата уметност суверено се движи како естетски император чии десет прсти го создаваат клавирскиот бескрај, потенцираше Канческа-Милевска.
Трпчески наградата ја посвети на своето семејство. Во жешкиот месец август, како што рече во своето обраќање, бил дома и многу вежбал.
- Колку само пот се излева во таква макотрпна работа за едно уметничко дело да излезе на виделина, пред илјадиници луѓе со голема одговорност, но и гордост. Не беше ни малку лесен мојот пат да стигнам до ова. Низ трње до ѕвездите. Растев во скромно семејство, во топла атмосфера, во многу тесен простор, опкружен со најшироките срца на светот, со многу љубов и песна. Мојот музички талент го наследив од мојот татко, тој беше оној кој најмногу веруваше во мојот успех и од самиот почеток визионерски ги предвидуваше работите. Затоа и со таков жар се трудеше да ми овозможи да напредувам. Храбро, сам и со многу малку пријатели успеал и денес тој би бил најсреќен. Оваа награда всушност би била негова огромна сатисфакција, рече Трпчески.
Уште од мал, додаде, бев воспитуван да му припаѓам на светот, но со мал аманет, пред се и над се да знам што сум и од каде сум, бидејќи, рече Трпчески, дрво без корени не може да опстои.
- Секаде и на сите континенти јас сум Симон од Република Македонија, горд на своето потекло и преполн со огромно духовно богатство, рече Трпчески, заблагодарувајќи им се на Министерството за култура, Владата и државата што се сетиле на оваа награда.
Симон Трпчевски е роден 1979 година во Скопје. Тој завршил основно и средно музичко училиште, а дипломирал и магистрирал на Факултетот за музичка уметност. Пијанистот во годините наназад успеа да ги наполни европските и светските познати концертни сали. лѓ/паг/15:53
Лето Господово 2011
