Призив на Светиот Дух на Православниот богословски факултет

ВИДЕО

По повод почетокот на академската 2011/12 година на 22 септември во свечената сала „Архиепископ Доситеј“ на Православниот богословски факултет беше отслужен молебен – Призив на Светиот Дух за успешен почеток на годината. Со молебенот чиноначалствуваше отец Стефан Санџаковски, професор на Православниот богословски факултет. На чинот присуствуваа студентите, професорите и асистентите од овој Факултет и заеднички се помолија за просветување и очистување на срцата и умовите на студентите за да можат со Божја помош и благодат да ја совладаат науката над науките и да ги откријат патиштата кон Богопознанието. По завршувањето на молебенот на присутните им се обрати деканот на Православниот богословски факултет – проф. д-р Ацо Гиревски посакувајќи им на студентите, професорите и асистентите успешен почеток на новата академска година.

ПРВ АКАДЕМСКИ ЧАС                   Поздравно слово на Деканот на Православниот богословски факултет „Свети Климент Охридски“ во Скопје, проф. д-р Ацо Гиревски

ПОЧИТУВАНИ КОЛЕГИ ПРОФЕСОРИ, АСИСТЕНТИ И ДРАГИ ПОСТАРИ СТУДЕНТИ, ДОЗВОЛЕТЕ МИ НА ОВОЈ ПРВ АКАДЕМСКИ ЧАС ДА ИМ СЕ ОБРАТАМ НА НОВОЗАПИШАНИТЕ СТУДЕНТИ НА ОВОЈ ФАКУЛТЕТ!

Драги академци,
Денес, на попразненството на празникот Рождество на Пресвета Богородица, отворајќи ги повторно ширум вратите на нашиот Богословски факултет, со посебно почитување кон Вас и радост на декан и универзитетски професор, Ви посакувам срдечно добредојде, при официјалниот почеток на Вашите богословски студии на овој Факултет.

Студирањето на највисоката духовно-просветна, високообразовна и научна установа на Македонската православна црква во Р Македонија - на Православниот богословски факултет, ќе Ви овозможи изучување и стекнување назнаење од областа на православните богословски стручни и научни дисциплини.

Вие сте втората генерација која ги има дополнителните благодети, кои произлегуваат од стекнатиот бенефит на нашиот Факултет, како придружна членка на најстариот и водечки Универзитетот „Свети Кирил и Методиј“ во Република Македопнија, а сепак под закрила и непосредна грижа на Светиот архиересјки синод на нашата Света Црква.

Привелегиите со ваков статус се многу, јас ќе спомнамсамо неколку: еднаков ЕКТ Систем за студирање и оценување со сите други факултет и во земјата и странство, унапредуваање и одбрана на академските цели, вредности и задачи, во што спаѓаат: откривање и ширење на вистината, одбрана на идејата и практиката на својот научен корпус, научно истражување во народната и универзитетска библиотека и надвор од неа во сите научни ресурси на Универзитетот, членство во универзитетските студентски здруженија, право на користење студентски стипендии, студентски дом, признати дипломи, непречено продолжување на последипломски студии и други можности. Новина од оваа година се бесплатните индекси и бесплатното печатење и на учебниците од професорите на овој Факултет.

Проучете го Статутот на Универзитетот и на овој Факултет, како и правилниците за додопломски студиии самите ќе ги откриете другите бенефити што Ви се нудат, та благовремено да се запознаете со своите права и можностите за судирање и стипендирање, но и со обврските. Јас знам дека Вие од Богословијата сосебе го носите етичкиот кодекс, но сепак Ве потсетувам дека и овде на Факултетот Ве обврзуваат моралните вредности и норми.

Денес сакам посебно да ги поздравам младите научни работници, на кои, ние постарите професори во новата студиска година им доверуваме поголеми можности да се проверуваат, да се докажуваат, да се истакнуваат и така да напредуваат во науката и да се стекнат со наставничките звања.

На нив и наВас, драги студенти,  Господ да ја зголеми довербата и да ја умножи љубовта еден кон друг и кон сите, како што и ние професорите имаме кон вас, за да ги утврди вашите срца во науката што ви се предава. Сè испитувајте, за доброто држете сè! Клонете се од секакво зло!

Бидете синови на денот, бидете трезвени и барајте ја светлината, та „облечени во оклоп“ на верата и љубовта и заштитени по „шлемот“ на надежта полесно ќе се спасуваме.

И ве молам, синови наши, како интелектуалци, никој да не навредува и повредува друг. Особено да ги уважувате оние, што се трудат меѓу вас,  што се ваши претстојници во Господа, и оние кои ве учат. И кон нив да имате преголема љубов заради нивното дело. Живеејте во мир помеѓу себе!

Радувајте се секогаш!
Молете се постојано, за Господ Бог да ги утеши срцата ваши и да ве утврди во секое слово и добро дело! Амин.

Капиштец, 22 септември 2011.

За Преминпортал:

Анета Јовковска
помлад асистент