Охрид, 8 септември 2010 (МИА) - Со свечена Литургија со која чиноначалствуваше неговото Блаженство Архиепископот Охридски и Македонски г.г. Стефан во сослужение на митрополитите г. Тимотеј и г. Агатангел, денеска започна проектот за возобновување на комплексот „Светиклиментов универзитет" на Плаошник во Охрид.

Камен-темелникот на новиот универзитетски комплекс го постави претседателот на Владата Никола Груевски, кој изрази задоволство што на овој голем државен празник 8-ми Септември, на кој се одбележува 19-годишнината на независноста на Република Македонија, се означи почетокот на возобновувањето на овој комплекс кој ќе претствува мултимедијален наставно-научен и културен центар.

Покрај изградбата во современ научно-наставен центар, овој комплекс, како што нагласи македонскиот премиер, ќе претставува и еден вид Светиклиментов меморијален културен центар, кој ќе тежнее да ги задоволи потребите на македонскиот, но и на регионалниот образовно-научен и културен живот, во смисла на натамошен развој на хуманистичките науки, но и продуцирање на стручни кадри кои го подразбираат конзерваторскиот профил, а кои ќе бидат од особено значење во зачувувањето на нашето културно наследство.

Премиерот изрази уверување дека универзитетскиот комплекс што е предвидено да биде изграден до крајот на 2014 година со финсиските средства обезбедени во рамки на капиталните проекти на Владата на Република Македонија финансирани директно од државниот Буџет во повеќе буџетски години, ќе стане препознатлив симбол на градот Охрид и на Република Македонија.

Министерката за култура, Елизабета Канческа-Милевска истакна дека со чинот на поставувањето на камен-темелникот и започнувањето на градежните активности за возобновување на Светиклиментовниот универзитет, на Плаошник почнува нова ера на духовното егзистирање на Охрид и на Република Македонија, нова страница од житието на славјанската култура. 

- Овој капитален проект на Владата и на Министерството за култура, претставува осмислен континуитет на обемните системски археолошки истражувања, како и на процесот на конзервација, реставрација и реконструкција на локалитетот Плаошник во насока на реализација на благородната идеја за создавање комплекс, во кој сведоштвата за цивилизациите, културите и религиите кои постоеле на овие простори во минатото ќе станат факти, засекогаш небришливи за времето, рече таа.

Директорот на Управата за заштита на културното наследство, археологот Паско Кузман, во оваа свечена прилика потсети дека пред нешто повеќе од две седмици беше означен почетокот на работата на научно-преосветниот дел од овој проект, додека денеска почетокот на градењето на архитектонскиот комплекс.

- Тогаш симболично започнавме симболично да го обновуваме духот, а сега симболично телото на нашиот голем светител и просветител Свети Климент Охридски. Крајната цел на генерациите на денешна Македонија со започнувањето на возобновувањето на Светиклиментовниот универзитет е да го споиме светиклиментовото време со 21 век и да го возобновиме сакралното со световното на стариот светиклиментов простор, нагласи Кузман.

Заблагодарувајќи се на сите институции и поединци вклучени во реализација на проектот, Кузман појасни дека во фазата на подготвувањето на теренот, односно истреажувачките работи и археолошките истражување спроведени во периодот 2007-2010, биле опфатени 31.600 метри квадратни земјиште на Плаошник, со богати културни слоеви од праисториските епохи се до 19 век. Со подготвениот проект за возобновување на комплексот, на бруто-површина од 7.805 метри квадрататни ќе бидат изградени вкупно 23 објекти, од кои 14 главни и девет посебни, објекти распоредени во 4 поткомплекси, со вкупно корисна нето-површина со катни висини од 19.475 метри квадртни. Притоа археологот Кузман објасни дека сите предвидени објекти внимателнио биле проектирани и оти естетски нема да ја загрозат Светиклиментовата црква „Свети Пантелејмон" на Плаошник.

Во рамки на универзитетскиот комплекс ќе функционира редовна конзерваторска школа со професори од признати светски универзитети, музеј на почвата на Плаошник во кој ќе бидат презентирани богатите наоди на самиот археолошки локалитет, богата Светиклиментова библиотека со стартни сто илјади наслови, галеријата со икони, институт за хуманистички науки, посебен монашки простор наменет за свештени лица, афилијации на светски универзитети, како и светиклиментова градина, како место за одмор и креативна инспирација.

- Возобновувањето на комплексот Светиклиментов универзитет е доказ дека делото на Свети Климент Охридски постојано ќе претставува непресушен вруток на цивилизациски пораки и вредности и ќе биде онаа невидилива сила со која ќе се исполнуваме, за да можеме во времето сегашно, почитувајќи го минатото, да создаваме вредности за подобра, похумана и поцивилизациска утрешница, порача Кузман. аб/цр/15:23

 http://www.dke.org.mk/novosti/novost.asp?PodatociID=646