Охрид, 8 мај 2010 (МИА) - Претставниците на сите светски религии, експертите, еминентните членови на меѓународните организации уште еднаш на дело го потврдија фактот дека културата и религијата се најмонолитните фактори на мирот, соживотот, просперитетот и благосостојбата, рече вечерва министерката за култура Елизабета Канческа Милевска во завршното обраќање пред учесниците на Втората светска конференција за меѓурелигиски и меѓуцивилизациски дијалог што вчера и денеска се одржа во Охрид.
Новите можности за комуникација, посочи таа, кои ги откривме на оваа Светска конференција по усвојувањето на новата декларација несомнено ќе помогнат во процесот на одржување континуитет во дијалогот, кој се наметна како основна придобивка од оваа конференција.
- Нашите верски и политички лидери вчера и денеска ве запознаа со тоа што се Македонија прави за да ја унапреди не само коегзистенцијата туку и синергијата на нашиот народ и граѓанство, на православното и католичкото христијанство, на исламот и муслиманството, на протестантизмот и јудаизмот, на сите други помали конфесии, истакна Канческа Милевска во обраќањето пред присутните.
Таа оцени дека континуитетот на одржувањето на Светската конференција за меѓурелигиски и меѓуцивилизациски дијалог поттикнува и ќе поттикне одржување на други регионални и светски состаноци на тема дијалог меѓу религите, различните култури и цивилизации на ниво на влади, верски лидери и уметници.
- Конкретните настани на оваа конференција ни ги доближија теоретските препоставки кон праксата, а присуството на претставниците на верските заедници од повеќе земји во светот е доволна потенцијална енергија да веруваме дека во следната ваква средба во 2013 година многу проблеми и јазови меѓу нас ќе бидат премостени токму со рационалноста и продуктивноста на дијалогот, додаде Канческа Милевска.
Учесниците на меѓународниот собир претходно усвоија завршна декларација во која се обврзуваат дека активно ќе учествуваат во јакнењето на мирот и соработката преку постојан дијалог и меѓусебна размена на добри практики особено во рамките на сопствените заедници, ќе охрабруваат меѓукултурни настани и активности за промовирање на толеранцијата и соживотот и ќе се борат против сите појави на предрасуди и исклученост.
Воедно ќе биде испратена порака до сите институции на ОН со апел за нивна постојана посветеност за афирмација на меѓурелигискиот, меѓукултурниот и меѓународниот дијалог. Во декларацијата се поддржува и идејата за воспоставување Управен совет за религиите под патронат на Светската организација кој би можел да го унапредување на дијалогот меѓу религиите, културите и народите. Текстот на Декларацијата ќе биде предаден на Генералното собрание на ОН, до владите на државите-членки, до останатите асоцијации при Светската организација, како и до сите позначајни меѓународни организации.
На конференцијата присуствуваа околу 480 домашни и странски гости од повеќе од 30 земји, истакнати политичари, научни и културни работници, видни експерти и универзитетски професори кои се занимаваат со прашања од областа на религијата и културата, претставници на меѓународни и на младински организации, како и претставници на невладиниот граѓански сектор.
Конференцијата под мотото „Религијата и културата - нераскинлива врска меѓу народите“ се организираше во рамки на Меѓународната година на Обединетите нации за зближување на културите. Настанот се одржа во рамки и на „Декадата за дијалог помеѓу цивилизациите“ и „Декадата за култура на мирот на ОН и УНЕСКО“, а претставува континуитет на дијалогот започнат на Првата конференција во Охрид во 2007 година.
Конференцијата ја организираше Министерството за култура во соработка со Комисијата за односи со верските заедници на Република Македонија.
Настанот го поддржа Владата на Република Македонија и УНЕСКО кој, како и за Првата конференција, партиципираше со финансиска поддршка од 100.000 американски долари. Дел од одобрените средства на УНЕСКО се обезбедени од Шпанскиот фонд за остварување на Милениумските развојни цели, во рамките на заедничкиот проект на агенциите на Обединетите нации „Подобрување на меѓуетничкиот дијалог и соработка помеѓу заедниците“ во Република Македонија. За Конференцијата поддршка даде и Фондацијата на холокаустот и Евреите во Македонија со сума од 40.000 американски долари. рп/ва/нд/19:21
Лето Господово 2010