Скопје, 5 јануари 2010(МИА) - Македонската православна црква и на последните црковно-народни собори се изјасни дека не може да размислува за промена на сопственото име зашто таа го отсликува идентитетот на нејзиниот народ. Се додека постојат македонски јазик, македонско име и македонски индентитет, Црквата во оваа земја ќе биде македонска. Се надевам дека и државните претставници не мислат поинаку, вели Архиепископот Охридски и Македонски г.г. Стефан во новогодишното и божикно интервју за МИА.
За спорот со Српската православна црква околу статусот на МПЦ, смета дека проблемот не е само црковен туку и политички, но оти не е поврзан единствено со прашањето за името.
- Да беше црковен проблемот и ако се решаваше црковно, досега ќе беше решен. Имајќи предвид дека дијалогот се води меѓу двете цркви, доволно е само раководството на СПЦ да реши да ги почитува одлуките на сопствената држава, која нема проблем со македонското име и идентитет. Се додека како критериум и услов е задоволувањето на очигледните интереси на трета страна, а притоа погазувајќи го основното човеково право на име и идентитет на другиот, односно право на самостојна црква, принцип што важи речиси за сите православни народи, тогаш јасно е каква понуда може да се очекува како решение. Но, нагласува г.г Стефан, човечки и христијански е да се надеваме на подобри времиња и на донесување правилни и праведни одлуки и решенија за македонското црковно прашање.
Тој се надева дека новиот поглавар на Српската православна црква што треба да го замени неодамна упокоениот патријарх Павле ќе покаже поголемо разбирање за проблемот и оти наскоро по неговиот избор ќе продолжи меѓуцрковниот дијалог.
МПЦ, истакнува г.г. Стефан, сака преку разговори да се најде решение за наметнатиот спор во врска со нејзиниот статус и очекува иста таква подготвеност за дијалог во духот на евангелската љубов, со почит кон соговорникот да се пројави и од другата страна.
- Вистина е дека се полага оправдана надеж во новиот поглавар во сестринската СПЦ, кој, како вистински визионер и духовен пастир конечно ќе го согледа полувековното распетие на Божјиот народ во Македонија и ќе возврати на понудената љубов со потребна почит и разбирање. Со прифаќањето на МПЦ ќе се реши прашање од поширок интерес, и не само за православието на балканските простори. Блажено упокоениот патријарх Павле, за жал, не успеа да ги усогласи своите човечки особини и поглаварски обврски со реалните потреби на црквата во Македонија и, секако, со ставовите на поголем дел од членовите на Архиерејскиот собор на СПЦ. Да веруваме дека неговиот наследник ќе наметне правилна насока во решавањето на меѓуцрковниот спор, вели поглаварот на МПЦ.
Решение, како што наведува, “е можно само ако се прифати дека е невозможно преку Црквата, која не е ничија привлегија ниту приватна сопственост, туку е Божја и е Тело Христово кое им припаѓа на сите подеднакво, да се спроведуваат замаскирани платформи“.
За соработката со другите православни цркви, укажува дека МПЦ веќе комуницира со повеќе помесни православни цркви, а нејзини архиереи сослужуваат со нивни архиереи, но, нагласува, ни треба прифаќање од сите. Неодамнешното присуство на отец Николај Балашов од Руската православна црква на чествувањето на патронот на МПЦ - свети Климент Охридски, за г.г. Стефан е јасен показател дека Руската црква со внимание го следи развојот на настаните поврзани со македонското црковно прашање и оти целото православие, сепак, не е индиферентно кон македонските црковни состојби. рп/са/10:11
