Во Охрид се одбележува јубилејот 1150 години од Моравската мисија
Да не беа Кирил и Методиј, денеска ќе говоревме туѓ јазик!
На овој начин впечатливо ќе се афирмираат вековните проникнувања на нераскинливите врски меѓу македонската и руската словенска духовна и културна традиција во општиот сесловенски цивилизациски влог, која може да послужи како своевидна илустрација во новите глобални тенденции за културно прелевање меѓу народите во Европа, изјави Илија Велев, претседател на организациониот одбор
Угледни универзитетски професори и научни истражувачи од Македонија и од Руската Федерација учествуваат на дводневниот Меѓународен научен собир на тема "Кирилометодиевската традиција и македонско-руските духовни и културни врски", кој почна вчера во Охрид. Со научниот собир Универзитетот Св. Кирил и Методиј" заедно со Православниот богословски факултет Св. Климент Охридски" ќе го одбележат големиот јубилеј - 1150 години од Моравската мисија и од словенската писменост. Оттаму и темите на рефератите на учесниците се посветени на кирилометодиевската проблематика во контекст на македонско-руските духовни и културни врски од периодот на средновековието, преродбата и современите состојби, како и на општите духовни, културни, книжевни или писмени процеси што ја третираат македонската или руската традиција.
- Нашата современа генерација ја има судбинската чест овој значаен јубилеј 1150 години од Моравската мисија и од словенската писменост да го чествува посредно со одбележувањето и на 1700 години од Миланскиот едикт (313 година), со чијашто одлука се официјализирало христијанството како рамноправна и слободна по избор религија, култура и цивилизација. Не било случајно што во периодичен расчекор од конкретни 550 години, од 313 до 863 година, овие два историски впечатливи настани предизвикале одлучно влијание во идните цивилизациски односи на глобалниот свет. Одлучивме оваа двојна јубилејна година да ја одбележиме со ваков научен настан заедно со Руската духовна академија на науките и со нејзините научни институции. На овој начин впечатливо ќе се афирмираат вековните проникнувања на нераскинливите врски меѓу македонската и руската словенска духовна и културна традиција во општиот сесловенски цивилизациски влог, која може да послужи како своевидна илустрација во новите глобални тенденции за културно прелевање меѓу народите во Европа, изјави Илија Велев, претседател на организациониот одбор. Тој додава дека изборот на Охрид за одржување на свечениот научен настан не е случаен, бидејќи од историскиот извор на Охридската духовна и книжевна школа протекле и македонско-руските духовни и културни врски.
Во своето обраќање, ректорот Велимир Стојковски се наврати на македонските корени кои се малку подлабоки, но од кои историски нераскинлив дел се и светите Кирил и Методиј. Сметам дека и Универзитетот и државата и сите институции го даваат се она што е потребно и што од нас се очекува за да го запазиме и зачуваме нивното име и нашата традицијаа. Поглаварот на МПЦ г.г. Стефан, пак меѓу другото истакна дека некои дела низ историјата како Мисијата на Кирил и Методиј со својата содржина и карактер се создадени за да придонесат, да внесат ново, да изменат, да воспитаат и воспитуваат, да поучуваат.
- Без светите Кирил и Методиј денеска можеби ќе говоревме на друг јазик и ќе пишувавме со друга азбука, кои немаше да бидат исконски наши, туку позајмени од некоја друга земја, која ни е туѓа, како по религија така и по обичаи, истакна вчера пред присутните министерот за образование Спиро Ристовски. Тој потсети на делата и на светите Климент и Наум, следбениците, учениците, продолжувачите на светата мисија на Кирил и Методиј, како и за познатата Охридска книжевна школа и првиот европски универзитет, местото каде прво преку глаголицата, а после и преку кирилицата масовно се вршело описменување на словенскиот народ.