Скопје, 10.05.20113 год.-
Промовирана книгата „Собрани дела на Св.Климент Охридски“
Книгата „Собрани дела: слова, поуки и житија од Свети Климент Охридски“ е едно од најкапиталните дела во нашата севкупна македонска историја и не претставува просто само еден книжевен изблик на нејзиниот автор, туку таа е и култура, и историја, и јазик, и проповед, и теологија итн.
Ова вечерва го истакна поглаварот на Македонската православна црква г.г. Стефан, еден од промоторите на делото, во рамки на Третата светска конференција за меѓурелигиски и меѓуцивилизациски дијалог „Слободата и достоинството - основни вредности во меѓучовечките, меѓурелигиските и меѓукултурните односи“, што се одржува во Скопје. Книгата е во издание на Македонската православна црква - Охридска архиепископија.
Ова есенцијално дело, посочи г.г.Стефан, јасно го покажува континуитетот на нашето постоење и како засебен народ и како засебна култура, зашто, еве, токму сега, во навечерието на чествувањето на патронот на нашата света македонска Црква, ние можеме да кажеме дека успешно создаваме и живееме и историја и сегашност, одбележуваме дел од нашето македонско битисување.
- Тоа што беше средство за разбирање и комуникација, тоа што беше одлика и знак за посебност пред 11 века - старословенскиот јазик, еве, сега е претставено пред нас на современ македонски јазик. Нашиот јазик од минатото денес воскреснува во своето современо чедо. Од денес уште еднаш, во својата современа форма, силно прозвучуваат говорите од околината на Солун и ние, еве, преку заложбата на Македонската православна црква, имаме можност да го слушаме и читаме јазикот на нашите предци, рече поглаварот на МПЦ.
Посочи дека Свети Климент е најсилниот темел и нему му припаѓа најголемата заслуга за нашата егзистенција како народ и култура.
- Вистина е, тој ниту ни даде држава, ниту царство, ниту богатство, ниту моќ и првенство. Но, тој ни даде нешто многу повеќе - ни го предаде животворното евангелско Слово, нe научи на јазикот на спасението, ја заслужи за нас и ни ја даде духовната слобода, што значи најмногу. Како еден од најталентираните и најпреданите ученици на светите браќа Кирил и Методиј, по нивната смрт, тој го продолжи сесловенското дело на овие земји, во областа Кутмичевица, со центар во Охрид. Таму пастирствуваше како вистински епископ Христов - ја оформи позната Охридска книжевна школа, во која обучуваше свештенички кадар, односно идни пастири и учители на народот, служеше и проповедаше неуморно, упатувајќи го народот во Вистината, а воедно му помагаше и при овоземните потреби, истакна г.г.Стефан.
Неговите дела, главно омилии, похвали и поуки, што ги искажувал од амвоните на охридските цркви, собрани во книгата што денес ја промовираме, нагласи поглаварот на МПЦ, се исполнети само со зборовите што значат живот, што значат Царство небесно.
- Свети Климент е и проповедник и теолог пар екселанс. Неговиот збор е лесен, неговиот јазик е близок до публиката на која говори, а неговиот стил е и одмерен и динамичен - тој умее да навлезе силно во темата на денот, потоа да го смири текот на словото, но и да му даде повторно динамично финале - најчесто со акатистни форми. Но, неговата умешност да го задржи вниманието постојано будно, е ретка способност и е една од неговите најавтентични одлики. Овие негови дела се исполнети со духот на светите отци на Црквата, рече г.г. Стефан.
Појасни дека книгата содржи три дела - во првите два дела словата и поуките се распределени според автентичноста, и тоа: во првата група - потпишани и неоспорни слова и поуки, за кој нема сомнеж дека излегле од перото на свети Климент, и втората група - во која се поместени тие што со голема веројатност се негови, што е утврдено преку стилот или методот на споредба со веќе потврдените. Во третиот дел од книгата се вклучени животописите на свети Кирил и Методиј што Свети Климент ги составил по нивната смрт.
- Препорачувајќи ви ја оваа книга, ви оставам аманет таа да биде присутна во секој дом, да стане своевидна домашна македонска Библија. Нека ни е честит празникот на нашиот голем учител и молитвеник пред Божјиот престол-Свети Климент Охридски. Му благодарам и на протопрезвитерот ставрофор, д-р Јован Таковски, еден од најдобрите познавачи на старословенскиот и црковнословенскиот јазик на овие простори, за неуморливоста во помакедончувањето не само на оваа книга, туку и за сите преводи на богослужбени и црковни книги што досега ги направи и ќе ги прави на современ македонски јазик, додаде г.г. Стефан.
Проф.д-р Јован Таковски, промотор на книгата, рече дека станува збор за дело кое ги опфаќа досега откриените слова, проповеди, поуки на Свети Климент Охридски собрани по разни книжници и библиотеки најмногу во Русија и по целиот свет.
- Проповедите, словата на Свети Климент и житијата на Свети Кирил и Методиј кои исто така се дело на Свети Климент и се поместени во оваа едиција, се клучни за разбирањето за неговата личност. Преку поуките што ни ги дава ќе имаме голема полза не само ние свештениците туку и народот. За сите тоа може да биде еден вид патоказ и вероучение, додаде проф.д-р Таковски.
Текст: Дневник
Фото: Преминпортал
Светата маченичка Христина; Преподобен Поликарп, игумен Печерски; 
