Скопје, 5 април 2012 год.
Велигденски духовен концерт
„На 5ти април 2012 година, во Универзална сала во Скопје, се одржа Велигденски духовен концерт во чест и спомен на спасителните Христови страдања и Неговото сеславно Воскресение. На концертот, организиран од страна на Бигорски манастир и неговите пријатели, беа изведени неколку карактеристични песнопенија од богослужбите на Страсната седмица, како и воскресниот тропар. „Твојата свадбена одаја ја гледам украсена...“, делови од трите великопеточни Статии на оплакувањето Христово, меѓусебно проткаени со читања на трогателни стихири од Посниот Триод, се дел од содржината на концертот. Токму затоа овој музички настан е поставен непосредно пред почетокот на Страсната седмица.
Мошне значајно за овој концерт е тоа што за прв пат во историјата на македонската музика е направена оркестрација на древни источно-православни напеви, од страна на нашиот еминентен композитор и професор, г. Живојин Глишиќ, кој на ова дело работеше подолг временски период. Во изведбата на познатите мелодии, земаа учество Македонската филхармонија, нашиот познат поп-пејач Ламбе Алабаковски, монахињата Касијана од манастирот во Рајчица и хорот при Македонската православна богословија. Бигорскиот манастир, заедно со своите соработници, го посветува овој концерт на својата Мајка Црква - славната и најсвета Охридска Архиепископија, честитајќи ѝ го нејзиниот 45-годишен јубилеј: возобновувањето на нејзината автокефалност во лицето на МПЦ. (МИА)
Македонската православна црква со Христовиот народ во полна сила се собрала да го слави Христа Човекољубецот. Прекрасен подарок за Цветници. Но како што доликува, поединечно да дадеме придонес со внедрување на одпеаните и чуени Слова. А Словата зборуваат за Христовите страдања. Често слушаме – ах, тие луѓе од тие времиња го распнаа Христа.
Но дали со тоа го сместуваме Христа во историја?
Зар денес Човекољубецот Бог не е сèуште на Дрвото над нас?
Му се обраќаме со прозби – дај ова, дај она. А Тој ги раширил рацете и ме чека да ме гушне во љубовна прегратка. А нели љубовта е најпрво давање. Но како што велиме – на човек можеш со сила да му земеш, но со сила не можеш да му дадеш. Сум го стегнал клучот на моето срце во рака и не пуштам.
Нели Великиот пост почна со параболата за митарот и фарисејот? (Ратислав Кардалев)
- Преминпортал
- Ратислав Кардалев
Византиско Пеење - Ламбе Алабаковски - Концерт - 01
Византиско Пеење - Ламбе Алабаковски - Концерт - 02
Византиско Пеење - Ламбе Алабаковски - Концерт - 03
Византиско Пеење - Ламбе Алабаковски - Концерт - 04
+Св. Архангел Гавриил; Св. Јулијан, епископ Кеномански во Галија; Преп. Стефан Саваит; Преподобна Сара Мисирска; 
