ПОЧНА ВТОРАТА СВЕТСКА КОНФЕРЕНЦИЈА ЗА МЕЃУРЕЛИГИСКИ И МЕЃУЦИВИЛИЗАЦИСКИ ДИЈАЛОГ
На отворањето на конференцијата, претстедателот на Владата на Република Македонија Никола Груевски го истакна значењето на толеранцијата, особено кога станува збор за религијата. Тој нагласи дека и покрај разликите треба да постои разбирање и заемно почитување, затоа што независно конфесионалните различности, постојат повеќе заеднички нешта кои не поврзуваат.
-Постои една едноставна, но длабока изрека за чие што значење честопати и не размислуваме премногу, но во неа е искажано едно универзално начело кое вели „Сакај го ближниот свој како себеси“. Сите вери и цивилизации можат, би требало и навистина се согласуваат со ова начело - мораме да го сакаме ближниот како себе си, затоа што насилството, војните и останатите зла, се случуваат кога го отфрлуваме ова начело, истакна Груевски во своето обраќање.
Министерот за култура Елизабета Канческа - Милевска во обраќањето пред присутните потсети дека Македонија не беше случајно домаќин на Првата светска конференција, на која земјата покажа дека само со размена на мислења и искуства светот може да стане една динамична област во која луѓето повторно ќе го откријат стимулативното богатство на различностите, културната размена и соработката.
-Искуството од првата светска конференција ми дава надеж да верувам дека и оваа, втора по ред екуменска средба, ќе се реализира во насока на афирмација на сите наши досегашни сознанија и искуства, кои на дело ќе го потврдатуспехот на дијалогот помеѓу културите и цивилизациите, рече Канческа-Милевска.
Таа истакна дека културната и религиската разноликост на Македонија претставува извор на голем креативен потенцијал и мост кон заемно разбирање, почит и соживот.
-Република Македонија е земја со долга и богата култура, со различни културни изразувања и фасцинантни длабоки духовни корени. Таа е судбински портал низ кој се преобразува Европа, земја-музеј, земја на археолошки локалитети, земја на духовни светилишта, нагласи Канческа-Милевска.
На собирот се обрати и претседателот на Комисијата за верски заедници Валентина Божиновска која истакна дека очекувањата на учесниците на Конференцијата се токму од Охрид да биде испратена посебна докрина на голема религиска надеж.
На отворањето на конференцијата се обратија и поглаварот на Македонската православна црква г.г Стефан, претседателот на Исламската верска заедница Реис Ул Улема Хаџи Сулејман Ефенди Реџепи, шефот на делегацијата на Светата столица, кардиналот Винко Пуљиќ, бискупот на евангелско-методистичката црква Хајнрих Болетер, рабинот Ендру Бејкер. Од странските претставници свое обраќање имаа и Енгелберт Руоз, директор на Регионалното биро на УНЕСКО во Венеција, како и Деирдре Бојд, координарот на ООН и претставник на УНДП.
На Конференцијата што до 9 мај ќе се одржува во Охрид свој придонес ќе дадат претставници на римокатоличката, муслиманската, евангелско-методистичката црква, Црквата на Исус Христос, будисти, претставници на Еврејската заедница, адвентисти, протестанти.
Извор: http://www.kultura.gov.mk/listsoopstenija_more.php?id=457
Фото: Преминпортал
