Излезе од печат првиот број на периодиката „КИНОНИЈА“ – посветен на големиот јубилеј „50 години возобновена автокефалност на Охридската архиепископија како Македонска православна црква (1967 – 2017)“
По милоста Божја Ве информираме дека со благослов на нашиот надлежен епархиски архиереј, Неговото Високопреосвештенство, Митрополитот Дебарско-кичевски г. Тимотеј – излезе од печат првиот број, т.е. двоброј 1/2 од периодиката на Австралиско – сиднејската православна епархија – списанието „КИНОНИЈА“.
Др. Ананија Ананиевски – заменик претседател на Македонската православна младина на Австралија (MOYA) и член на Епархискиот црковно-просветен совет (ЕЦПС), кој воедно е член и на Уредувачкиот одбор на списанието „Православие“ и на периодиката „Кинонија“ – по повод излегувањето од печат на нејзиниот прв број упати поздравно слово до сите читатели на списанието, а истиот интегрално ви го пренесуваме:
Историја достојна за сеќавање, почит и поука
„Ние сме Македонци. Затоа и нашето творештво треба да биде во служба на македонската кауза“.
Никола Вапцаров, „Реферат“, 1938
Почитувани читатели,
Пред нас е месецот во кој што ќе ја одбележиме 50 – годишнината од прогласувањето на автокефалноста на нашата мајка Црква – Охридската Архиепископија во лицето на Македонската Православна Црква. Пред точно 50 години во Катедралниот храм на древните Охридски архиепископи – „Света Софија“ во Охрид – се случил настанот, кој е вовед во една нова историја, која заеднички, секојдневно ја градиме.
Речено е декa „Племето наше е пиреј, и не го ништи ни една војска. Ама ти колку сакаш кошкај ја, куби ја, таа пак не умира. Само малку да се допре до земја и пак ќе се фати, ќе оживи…“. Токму истрајноста и борбеноста како дел од генот на нашите предци за кои ни сведочат историските настани од пред 50 години и нам денес ни се сатисфакција да го сочуваме она што сме го наследиле во аманет, но истото и да го умножиме – за да се покажеме како народ свесен и свет. На нашата генерација како на ниту една до сега ни останува задачата да останеме истрајни во борбата и идеалот за слободна, независна и демократска Македонија, за автокефалниот статут на нашата Света Помесна Православна Црква: Македонската Православна Црква – Охридската Архиепископија (МПЦ-ОА). Во таа борба, драги браќа и сестри единствено би извојувале победа доколку секого од нас да го даде најдоброто од себе во интерес на Црквата, Татковината и секако на својот народ. И така заедно кон целта да чекориме кон уште милионски годишнини и секоја да бидеме порадосни. Во овие 50 години, што е најважно самостојни научивме секако многу, справувајќи се секојдневно со проблемите, но уверен сум дека заедно можеме повеќе да постигнеме и да добиеме подобри времиња.
Добро е што ние денес го осветлуваме минатото, но уште подобро би било кога повеќе ќе чекориме кон уште посветла иднина и тоа поучени од минатото, кое иако го осветлуваме, сепак забораваме на пораките на иделозите на истото, кои пак гледаа во нас светла иднина. Не е доволно само да се навраќаме назад, исто така потребно и дупло повеќе да пловиме напред. Тоа враќање назад кон спомените треба да е наш стимул и потсетување за тоа колку треба да се бориме и движиме кон напредокот. Треба да се бориме за она што ќе остане на идните поколенија. За тоа се бореле и нашите предци, вредните идеолози на Македонија, многубројните борци за своето право на своја самостојна држава и Црква, кои и својот живот го положиле, борејќи се за посветла иднина и тоа заедно како заедница. Таков бил и повикот во 1967 година и сега е сосема истиот – Нашето единство – наша победа!
Од големината на годинешниот јубилејот се роди и полезната идеја да се создаде едно вакво полезно дело – ова значајно списание, кое го носи името Кинонија – што во превод значи Заедница. Овој прв број на списанието е посветен токму на големиот јубилеј – „50 години автокефална Македонска Православна Црква – Охридска Архиепископија“, кој се надевам дека ќе успее да нѐ обедини во една вистинска заедница.
Списанието е со православна тематика, бидејќи нас ако нешто успеало да нѐ одржи како народ – единствено нѐ одржала верата! Верата наша и на нашите татковци – Светото Православие. Списанието изобилува со разни современи теми, кои е надевам дека ќе му бидат од полза на секој православен христијанин. Ќе излегува еднаш годишно како двоброј и истото ќе биде посветувано на некои значајни теми и јубилеи за нашата Помесна Православна Црква.
Во оваа пригода сакам најнапред и особено да му се заблагодарам на мојот надлежен архиереј, Неговото Високопреосвештенство, Митрополитот Дебарско – кичевски и Администратор Австралиско – сиднејски г. Тимотеј, кој го благослови и подржа ова благоугодно дело. Благодарност и до сите, кои неуморно се вложија, работејќи на најразличен начин на ова списание. А на оние, кои ќе го читаат – им посакувам духовен лет и преуспевање во животот.
И за на крај се надевам дека овој скромен труд – ќе биде само како синапово зрно, еден сосема мал подарок и придонес кон нашата Света Црква – славеничка. Дај Боже уште многу години да се радуваме на вакви јубилеи и секако подај ни набрзо уште подобри времиња и уште поголеми успеси на секое поле.
Со почит,
Др. Ананија Ананиевски,
Во овој број ќе читате:
– Предговор:
Поздравно слово – др. Ананија Ананиевски
Тема на бројот
– Историја на Македонската Православна Црква: 50 години автокефална МПЦ – ОА
По повод 250 години од укинувањето на Охридската Архиепископија (1767 – 2017) и 50 години од прогласување автокефална Македонска Православна Црква (1967 – 2017) – проф. д-р Драган Зајковски
Асномска Македонија и црковното прашање (1943 – 1945) – проф. д-р Виолета Ачкоска
За автокефалноста на Македонската Православна Црква – Охридска архиепископија – вонр. проф. д-р Дејан Борисов, ѓакон
– Литургиско богословие:
Света тајна Евхаристија (Причест) – Павле Гумеров, свештеник
– Житија:
Светителот на нашето време – митрополит Струмички г. Наум (Илиевски)
– Современо богословие:
Црквата и младите – Оливер Суботиќ, презвитер
– Светоотечко богословие:
Обожението како цел на нашиот христијански живот – отец Гаврил (Галев), архимандрит
– Поука:
Да се биде монах – сестра Илијана (Илкова), игуманија на Марковиот манастир
– Филм:
I now walk into the wild – Т. Р.
– Музика:
Популарната музика – современ јазик на Христа – А. Д.
– Поезија:
Мојот Христос – отец Андреј (Конанос), архимандрит
– Интервју:
Јас честитам, кога луѓето често се причестуваат – Калист (Вер), митрополит Диоклијски
Списанието е бесплатно и можете да го најдете во храмовите на Австралиско – сиднејската епархија, на веб – страната на епархија, како и на овој достапен линк (https://www.yumpu.com/xx/document/view/59546512/kinonija-print-so-korica-web).
Повеќе информации за списанието, како и сите Ваши забелешки, коментари, критики, пофалби да ни ги испраќате на kinonija@gmail.com.
Кинонија (Заедница) е списание за православна вера, култура, воспитание, образование и наука. Идејата за создавање на едно вакво дополнително списание како периодика во склоп на епархискиот гласник „Православие“ произлезе од потребата на македонските верници во дијаспората, односно во Австралиско – сиднејската епархија, кои пројавуваат интерес за православни теми и прашања, како и за важни настани од животот на Македонската Православна Црква – Охридска Архиепископија (МПЦ-ОА).
Со благослов на Неговото Високопреосвештенство, Митрополитот Дебарско – кичевски и Администратор Австралиско – сиднејски г. Тимотеј – ќе излегува од печат еднаш годишно како двоброј и ќе разработува најразлични современи теми.
На крај, на Редакцијата на списанието „Кинонија“ им честитаме и им посакуваме уште плодна и успешна работа во иднина.
Со почит,
Епархиски црковно-просветен совет
(ЕЦПС)
