Неделата пред Светлото Христово Воскресение во Православната црква се нарекува Цветници, бидејќи на тој ден литургиски православните верници си споменуваат за влегувањето на Господ Исус Христос во Ерусалим, во оние дни кога го изврши спасението на светот и човечкиот род.

Во Дебарско-кичевската епархија традиционално Владиката Дебарско-кичевски празнувањето на Цветници го прослави во Кичевското архиерејско намесништво во манастирот „Св. Богородица – Пречиста”.

За празникот се отслужи света архиерејска литургија со која чиноначалствуваше владиката Дебарско-кичевски г. Тимотеј во сослужение на архимандрит Нектариј, Кичевскиот архиерејски намесник протоереј-ставрофор Ѓорѓи Лапоски, протоереј Војне Ристески, свештеник Игор Никовски и ѓакон Димче Азески.

Владиката кон верниот народ се обрати со празнично слово, во кое рече: „Денешниот празник ни го опишува настанот кога нашиот Господ Исус Христос одеше во Ерусалим за да ја прослави последната Пасха, пред Неговото страдање и смртта, и да ја утврди новата Пасха, на која Агнецот Божји ќе ги земе гревовите на светот и ќе се жртвува. Во непосредна близина на Светиот град во селото Витанија, Тој ќе преспие кај неговиот пријател Лазар, а утредента ќе се упати во Ерусалим. од градот пак многу народ излегол за да го пресретне поздравувајќи Го со восклици: Осана! Благословен е Оној кој доаѓа во името Господово.

Огромна маса на народ беше излегла да Го пречека Оној за Кого некои веќе знаеле по нешто некои слушнале, дека проповеда досега неслушнато, јасно и длабоко учење, и дека прави чуда со силата Божја. Но тие сеуште не знаеја дека Тој доаѓа во Светиот град да ја исполни волјата Божја, и да се принесе на благопријатна жртва за избавување на целокупниот човечки род.

Ние верниците и кои сме се воспитале во нашата православна вера, имаме научено од Светото Писмо, всушност од Неговата проповед, за Неговото доаѓање во светот како Спасител, знаеме дека треба да пострада, да умре, и да биде распнат за нас луѓето, и така во самите нас да биде распнат стариот Адам, за да се облечеме во Новиот според образот на Исуса Христа.

По завршувањето на прославата на Цветници во манастирот „Света Пречиста”, Владиката заедно со своите соработници се упати во кратка посета на манастирот „Св. Ѓорѓи” Победоносец во селото Кнежино, кое се наоѓа над излетничкото место Крушино во Кичево. Во овој манастир престојува расофорната сестра Доротеја, и во тек е ревитализација на овој прекрасен манастирски копмплекс.

Известува свештеник Игор Никовски

Посети: {moshits}