![Josif.Prilep1.jpg Josif.Prilep1.jpg](/images/stories/vesti14/Josif.Prilep1.jpg)
Три најголеми светители на трисолнечното Божество ја просветија вселената со лачите на божествените догмати. Овие медоточни реки на Премудроста сите созданија со водите на богопознанието ги напоија. Василиј Велики и Григориј Богослов, со славниот Јован - златоговорливиот јазик, сите ние собраните ги љубиме, поклонувајќи им се, со песни ги почитуваме, зашто тие за нас на Светата Троица секогаш се молат (тропар на празникот).
![Josif.Prilep.jpg Josif.Prilep.jpg](/images/stories/vesti14/Josif.Prilep.jpg)
![Josif.Prilep1.jpg Josif.Prilep1.jpg](/images/stories/vesti14/Kliment.Prilep.jpg)
Му благодариме на Господа за сите Негови благодејанија, онака и не поинаку туку како што вели псалмопевецот „ Добро е да се слави Господ и да Му се пее на името Твое, Севишни, да се возвестува наутро милоста Твоја, и секоја ноќ - Твојата вистина“ (Пс.91, 1-2). Па така се потрудивме и ние Прилепчани да ги воспееме светите Три Ерарси онака како што му доликува.
![Josif.Prilep1.jpg Josif.Prilep1.jpg](/images/stories/vesti14/Josif.Prilep2.jpg)
Во Прилеп ретко кој еснаф нема свој празник и свој заштитник. Меѓу најбројните би ги спомнал: чевларскиот еснаф чиј заштитник е светиот Спиридон Тримитунски чудотворец, на рударскиот и стакларскиот еснаф Успението Богородично, на касапскиот еснаф Раѓањето на св. Јован Крстител – Иванден, на дограмаџиите и столарите св. Ап. Тома, св. Елефтериј еп. Илирски заштитник и патрон на земјоделците (бавчанџиите) итн. Но, од сите овие еснафи како што одминува времето така и занаетите гаснат, да не речам изумираат, па така и нивните заштитници, нивните патрони празници од година во година се помалку и помалку се посетени. Единствени меѓу сите овие се прилепските бакали или прилепскиот бакалски еснаф, тие пак од година во година се се помасовни и побројни, ја негуваат и почитуваат традицијата, го гаат духот на бакалството и го слават празникот како никој друг еснаф. Можам слободно и одговорно да потврдам дека како што во Прилеп ги слават св. Три Ерарха, ретко кој град во нашава мила Македонија ги слави.
Прилепскиот бакалски еснаф за свои заштитници ги одбрал Светите Три Ерарси (св. Јован Златоуст, св. Василиј Велики, св. Григориј Богослов), на кои повеќе од пет децении со љубов и почит им се поклонува и ги слави како свои заштитници, молитвеници пред престолот на Севишниот, како ревнители за верата и творци на богословието. Според преданието од нивните претходници на овој ден секогаш канеле по тројца архиереи да богослужат во нашата драга и мила Стара црква (така го нарекуваат прилепчани Соборниот храм св. Благовештение). Нивната желба ја почитуваат нашите архиереи и секоја година со благослов на нашиот духовен татко Митрополитот Петар, на овој празник богослужат по тројца членови на Светиот архиерејски Синод на МПЦ–ОА.
И ова 2014. лето Господово на 12 февруари, во Прилеп беше торжествено одбележан празникот на Св. Три Светители. Почнувајќи од предвечерието беше отслужена празничната вечерна и беше подигнато петтолебие во чест и слава на св. Три Ерарси. Утрото Господ си го направи своето и ни подари прекрасен и сончев ден, преполн со сончеви зраци кои удираа во прекрасниот храм посветен на Светото Благовештение. Силниот и цврст удар од црковното ѕвоно беше причината за насмевка на многубројните верници и момент кога сите се завртеа едни кон други правејќи пат на средината од храмот за да ги пречекаат духовните пастири и со нетрпение да видат кои од нив дошле да им ја збогатат радоста. Ете фала Му и слава на Господа и оваа година на Три Светители дојдоа тројца архиереи меѓу кои Блажењејшиот архиепископ г.г. Стефан,нашиот прилепчанец Митрополитот Кумановско – Осоговски г. Јосиф и викарниот наш епископ хераклејски Климент. Светата и Божествена литургија беше збогатена со прекрасните гласови на градскиот и црковен хор Св. Благовештение. На светата литургија беа присутни: градоначалникот г. Марјан Ристески, претседателот на советот на општина Прилеп г. Никола Димески, пратеници, општински чиновници, претставници од сите сфери на културниот и општествениот живот. Архиепископот ги поздрави домаќините (еснафот) и присутните верници со прекрасна беседа. По светата Литургија беше прережан славскиот еснафски колак, за потоа сите присутни да се соберат на прекрасна трпеза на љубовта која ја благослови Блажењејшиот.
Емилијан Зелнички
Студент на ПБФ „св. Климент Охридски“ - Скопје