Тропар на светиот слуга Христов
Епифаниј Кипарски
12 мај / 25 мај
Ливан ја залеа со мириси, патеката на твојот живот,
о голем столбу на православието,
ревноста по Христа ја привлече благодатта,
и со неа мноштво чудеса сотвори,
о ти гласнику на Божјото слово.
Христос додаде години на твојот земен живот,
пастиру на овците словесни, а мноштвото чудеса насекаде прославувајки Го Бога Троичен,
те направија сотрудник на Ангелите и собеседник на пустиниците, тебе Епифание велики.
Моли го Христа Бога да ги спаси нашите души.
Извор МПЦ – ОА
Манастир свети Јован Претеча Слепче
Тропар на светиот
патријарх Цариградски
Герман
12 мај / 25 мај
Наоружан со мечот на Божјото слово,
Герасиме свети, Спасителот те ободри,
да излезеш на мегдан со лагата од овој свет,
Христос преку тебе победи,
и темнината ја одгони од верните свои.
Моли се за нас ти исповедниче на верата,
пастиру на Црквата, за да поучени од твоите сведоштва,
истраеме на патот до небесата.
Извор МПЦ – ОА
Манастир свети Јован Претеча Слепче
Тропар на светиот
Христов архиепископ
Савин Кипарски
12 мај / 25 мај
Послушниче Епифаниев, верен пастиру Христов
кој овците ги заштити од ереста на заблудените,
Савине оче свети, те удостои Спасителот
сведок да бидеш на Неговата благодат,
и денес молитвите твои ги прима
за сите оние кои пред Бога тебе те повикуваат.
Извор МПЦ – ОА
Манастир свети Јован Претеча Слепче
Тропар на преподобниот
и Богоносен отец
Теодор Китирски
12 мај / 25 мај
Љубовта твоја кон Христа
ја озари душата со Благодат неискажлива,
и плотта немоќна стана пред призивот одозгора,
о, Теодоре Богоносен оче. Срце подигнато
во пустината оаза на сладост небесна приведе,
преподобен оче, и затоа сега наследство
непропадливо имаш. Моли се достојнославен Теодоре
за нашето пред Бога спасение.
Извор МПЦ – ОА
Манастир свети Јован Претеча Слепче
Тропар на светиот
епископ Христов
Полувиј Ринокирски
12 мај / 25 мај
Постот те доведе до беспрекорно послушание,
кое закрилено со плаштот Епифаниев,
пастир те направи на душите ти поверени
о, Полувие оче свети, кој денес молитвено застапништво
за нас пред Господа вознесе, за да се спасат душите наши.
Извор МПЦ – ОА
Манастир свети Јован Претеча Слепче
ТРОПАР
Тропар (грч. τροπάριον, цсл. тропа́рь) е кратка црковна молитвена песна, настаната во доцниот стадиум на химнографијата. Тропарот ја содржи суштината на празникот за кој е напишан и во кој се прославува светителот; во Канонот, тропарот следи после ирмосот. Често се однесува и на аполитикион (грч. απολυτίκιον), или отпустителна химна преку која се опишува главната тема на богослужењето на денот, а со која се завршува Вечерната богослужба.
Богородичен (теотокион) е посебен вид на тропар, кој е посветен на Пресвета Богородица. Помали варијации во Богородичниот водат кон Крстобогородичен (ставротеотокион), посебен вид на тропар посветен на страдањето на Пресвета при распнувањето на Христос на Крстот, и како таков најчесто се користи во среда и петок, денови кога Црквата се сеќава на чесниот Крст Господов.
Понекогаш тропарот се користи како рефрен помеѓу читање на стихирите.од Псалмите, иако примарната функција во тој случај ја имаат стихирите.
Тропарник се нарекува една засебна целина во книга со тропари и кондаци, за секој ден на Црковната литургиска година.
ПреминПортал
2024 лето Господово
Од Верскиот календар:
Свети Епифаниј, епископ Кипарски
Роден како Евреин, но кога ја виде силата на Христовата вера, се крсти заедно со сестра му Калитропија. Во неговата дваесет и шеста година се замонаши во манастирот на Свети Иларион. Подоцна основа засебен манастир, од каде што се прочу по сета Палестина и по сиот Мисир заради своето подвижништво, духовна мудрост и чудотворство. Бегајќи од човечка слава се оддалечи во Мисир. На патот се сретна со великиот Пафнутиј, којшто му прорече дека ќе биде архиереј на островот Кипар. И навистина, по повеќе години, по Божја Промисла, Епифаниј дојде на Кипар, каде што ненадејно го избраа за епископ во градот Саламина и како епископ управуваше со Црквата Божја педесет и пет години. Живееше на земјата сѐ на сѐ сто и петнаесет години и се упокои од овој живот за вечно да живее во Царството Христово. Пред смртта беше повикан во Цариград од царот Аркадиј и жена му Евдоксија, на собор на епископи којшто требаше според желбата на царот и царицата да го осуди Свети Јован Златоуст. Граѓаните слушнаа, слушна и Златоуст, како божем Епифаниј да се согласил со царот против Златоуст. Затоа Златоуст му напиша писмо: „Брате Епифаниј, чув дека си го посоветувал царот да бидам прогонет. Знај дека ни ти веќе нема да го видиш твојот престол“. На тоа Епифаниј му отпиша: „Страдалнику Јоване, одолевај им на навредите, знај дека и ти нема да стасаш до местото каде што те гонат“. И обете светителски пророштва се обвистинија набрзо: не сакајќи никако да се согласи со царот околу прогонството на Златоуст, Епифаниј тајно седна на кораб и тргна за Кипар, но на бродот умре; а Златоуст го протера царот во Ерменија, но тој по патот умре. Свети Епифаниј се упокои во 403 година. Од неговите многубројните напишани дела најпознато е „Ковчежето“ (на грчки „Панарион“), во коешто се изложени и побиени осумдесет ереси.
Свети Герман, патријарх Цариградски
Син на првиот царски сенатор, кого што го уби царот Константин Погонат. Истиот овој зол цар го кастрираше сенаторовиот син Герман и насилно го протера во манастир. Како монах Герман засветли со својот добродетелен живот како ѕвезда. Заради тоа беше избран прво за епископ Кизички, а потоа, кога се зацари Атанасиј II,и за патријарх Цариградски. Како патријарх го крсти злогласниот Копроним, којшто додека се крштеваше ја извалка водата со нечистотија. Тогаш патријархот прорече дека кога тоа дете ќе стане цар, ќе внесе некаква нечиста ерес во Светата Црква. Така и се случи. Кога стана цар, Копроним ја обнови иконоборната ерес. Гонењето на иконите го започна Лав Исавријанин, таткото на Копроним, а кога патријархот Герман му се спротивстави, тој надмено возвикна: „Јас сум цар и свештеник!“, па го симна Герман од престолот и го протера во манастир, каде што овој Светител проживеа уште десет години дури Господ не го повика кај Себе во Небесното Царство, во 740 година.
Светиот маченик Панкратиј
Дојде од Фригија во Рим, каде како четиринаесетгодишно момче беше мачен и убиен за Христа околу 304 година. Овој светител многу се почитува на Запад. Во Рим постои црква со неговото име и во таа црква му почиваат моштите.
