До Средствата за јавно информирање

Ве известуваме дека годинава се навршија 30 години од осветувањето на Соборниот храм „Свети Климент Охридски“ во Скопје. За таа цел, на 04. 10. 2020 година, недела, во Соборниот храм, на Празникот на сите македонски светители, кој е востановен во спомен на Црковно-народниот собор од одржан од 4 до 6 октомври 1958 година, ќе се отслужи света архијерејска Литургија, со која ќе началствува Неговото блаженство, Архиепископот охридски и македонски и на Јустинијана Прва, г. г. Стефан, во сослужение на повеќемина архијереи од САС на МПЦ и свештенослужители од епархиите. Пред почетокот на Литургијата, ќе биде осветен севкупниот фрескопис во храмот, кој, по неколкуте фази на сликање низ годините, е целосно завршен.

Темелите за градба на Соборниот храм „Свети Климент Охридски“ во Скопје, се поставени во 23. 4. 1972 година, а осветени од страна на првиот Поглавар на возобновената Охридска Архиепископија како МПЦ, блаженоупокоениот Архиепископ охридски и македонски Доситеј, во сослужение на архијереи од тогашниот САС на МПЦ, како и на повеќемина свештенослужители, меѓу кои и двајца свештеници од сестринската Српска православна црква. Храмот е осветен на 12 август 1990 година од страна на тогашниот Поглавар на Македонската православна црква, Архиепископот Гаврил, во сослужение на сите членови на Светиот архиерејски синод, повеќемина свештенослужители и многуброен народ од Татковината и од иселените Македонци по светот.


Кабинет на Архиепископот