Свети Климент Охридски прославен во Џорданвил
 

 “Со делата си се издигнал преблажени кон божествен и блажен живот”
 Сите ние со вера да пристапиме и со пофални химни да го прославиме светиот отец наш Клемент, големиот Охриски чудотворец. Да му испееме “Радувај се” затоа што тој се покажа како наш застапник пред Бога.

 Посебна е радоста кога човек ќе слушне некој да го спомнува името на свети Климент, да зборува за неговите дела, а особено помислата колку само тој, во свое време, направи добри дела, на колкумина им ги отвори духовните и телесните очи... Тој се покажа како милостив избавител, заштитник за нас- затоа и ние него го прославуваме.
 За празникот на нашиот ни мил свети Климент и овде во Џорданвил се отслужи Божествена Литургија. По ручекот се одржа Молебен кон свети Климент.
Вечерта по манастирското Повечерие во гостоприемната сала се одржа скромен банкет во чест на свети Климент, приреден од нашите македонски студенти во Џорданвил. На истиот присуствуваа архимандритот на овој манастир, отец Лука, неколку професори од Семинаријата, монаси и речиси сите студенти.
 Најпрво го испеавме тропарот на свети Климент на византиски, потоа на руски, а по благословувањето на трпезата сите заедно го испеавме Величанието на свети Климент.
 Слава му на свети Климент за сите радости кои ни ги дава и за неговите молитви пред Бога. По неговите молитви Бог да не спаси и помилува, да ни ја сочува нашата ни Македонска Црква, Синод, нашето монаштво и свештенство, народ и  нашата власт и духовно да не просвети со поголема ревност.
 Те величаме светителу оче наш Клименте, и твојот спомен го славиме, ти кој се молиш за нас на Христа, нашиот Бог.
 ...затоа оче наш Клименте, тебе ти се молиме, заштите не со твојата молитва под твојот покрив.

 Ја поздравувам и честитам со празникот на свети Климент на нашата ни Македонска Црква, нашиот Синод, народ и држава.

Троитско свет манастир,
Стојанче Серафим Андов