Во Името на Отецот и Синот и Светиот Дух! Амин!
Возљубени браќа и сестри,
Печатот на Христовата мисија на земјата, Неговото спасително доаѓање меѓу луѓето е токму Неговото вознесение на небесата. Иако Неговите ученици и сите луѓе коишто Го следеа беа збунети од тоа, дури некои беа многу натажени, меѓутоа Самиот Господ им вети: Нема да Ве оставам сираци, Ќе Го испратам ветеното од Отецот, Светиот Дух Којшто ќе биде со вас се до крајот на светот. И навистина тоа и се случи. Ако овој период којшто завршуваше со Неговото вознесение беше периодот на спасителната мисија на Синот Божји, од моментот на Неговото вознесение започнува периодот на Светиот Дух, Којшто трае и ќе трае  до второто Христово доаѓање. Тоа е периодот на Божјата благодат којашто се излеа врз нас како што Самиот Господ вели: не заради тоа што Спасителот ќе Го помоли Отецот, зошто Отецот Самиот не возљуби од почетокот на светот , туку заради љубовта  којашто Бог ја има кон Своето создание уште пред тоа да постои. Со таа љубов Бог им даде власт, најпрвин на Своите ученици апостолите, а преку нив потоа и на сите коишто ќе поверуваат во Словото за големи дела, дела на спасението на човечката душа. Зошто навистина постојат многу подвизи и многу грандиозни дела на овој свет меѓутоа нема ништо поголемо од тоа  да се спаси душата и Бог таа сила им ја даде токму преку благословот: Мир вам, мирот Свој  ви Го давам- како што вели Господ.  Со тој мир и со таа сила, апостолите навистина ги надминаа сите искушенија коишто ги имаа во светот. Тој рече: за ова сведоци ќе бидете вие, на тој начин им кажа дека преку тоа сведоштво а тоа значи и мачеништво тие ќе го проповедаат Словото Божјо и поднесувајќи ги сите страданија ќе ја рашират вистината Христова по целиот свет.  Тоа сведоштво и тоа мачеништво е она што и ние како преемници на апостолите и на првите светии во Црквата треба денес да го негуваме. Мачеништво не во крв, меѓутоа мачеништво во трпение, мачеништво во љубов. Преку таа љубов сите се спасуваме. Амин!

известува Елена Јаневска

Извор:http://www.akmpe.org/