Македонија го празнува Денот на народното востание

Скопје /11/10/ 10:27

Република Македонија денеска ја одбележува 66 годишнината од Денот на народното востание против фашизмот и започнувањето на борбата за национално ослободување.

На денешен ден во 1941 година во Прилеп, партизанскиот одред изврши напад врз бугарската полициска станица и врз телеграфската мрежа, со што беше означен почетокот на организираното востание на македонскиот народ.

„Овој исклучителен датум од македонската историја го претставува почетокот на заедничкото организирање и масовно вклучување на македонскиот народ во вооружено востание во името на повисоките идеали на слободата и правдата, а за конечно создавање на македонската држава“, се наведува во честитката на македонскиот претседател Бранко Црвенковски упатена до македонските граѓани по повод празникот.

Државна делегација на Република Македонија денеска ќе положи свежо цвеќе на гробот на првиот претседател на Президиумот на АСНОМ, Методија Андонов Ченто, во Паркот на Револуцијата во Прилеп, како и на Спомен костурницата на паднатите борци од Народно Ослободителната Борба (НОБ) во Куманово.

Делегации на Владата, на Собранието, на Претседателот на Македонија, на Главниот одбор на Сојузот на борци на Македонија, делегација на Министерството за одбрана и Генералштабот на Армијата и на Град Скопје свечено ќе положат цвеќе на Партизанските гробишта во Скопје.

Венци свежо цвеќе денеска ќе бидат положени и на гробот на командантот на Главниот штаб на Народно ослободителната војска и партизанските одреди на Македонија, Михајло Апостолски.

Денеска во Собранието на Република Македонија ќе бидат доделени и наградите „11. Октомври“за животно дело во областа на науката, уметноста, стопанството и други дејности.

Одборот за доделување на наградите одлучи оваа година наградата „11. Октомври“ за животно дело од областа на науката да му биде врачена на проф. д-р. Томислав Тодоровски, македонист од Скопје./крај/ам

Макфакс

Врачена наградата „11 Октомври“ за 2007 година на професор Томислав Тодоровски

Скопје, 11 октомври (МИА) - За животно дело во областа на науката и образованието денеска во Собранието на Република Македонија во присуство на политичкиот врв, претставници на научната јавност и дипломатскиот кор му беше врачена наградата „11 Октомври“ на годинешниот лауерат, професор доктор Томислав Тодоровски.

Претседателот на Одборот за доделување на наградата „11 Октомври“ академик Таки Фити истакна дека оваа награда, која е воспоставена во знак на сеќавање на еден од најсветлите датуми од историјата на македонскиот народ - почетокот на востанието против фашизмот и окупацијата на земјата, досега е доделена на плејада македонски истакнати дејци од областа на науката, образованието, културата и уметноста кои со својот континуиран товречки напор дале придонес за вкупниот општествен развој на земјата и оставиле траги не само во националната научна ризница, туку и пошироко во европски и светски рамки.

- Овие витални сфери на човековото промислување и општствено живеење не признаваат национални граници ниту поделба на нациите на големи и мали.Тоа пак потврдува колку е значајно за оштеството да инвестира во овие сфери и да ги охрабри творците кои придонесуваат за афирмација на земјата, кон нови творечки успеси, истакна Фити.

Заблагодарувајќи се за високото признание, професор Тодоровски истакна дека ова признание е и за Катедрата за македонска книжевност и јужнословенски книжевности при Филолошкиот факултет во Скопје на Универзитетот „Свети Кирил Методиј“.

- Живееме во време на динамичен општествен развој обременето со бројни предизвици и искушенија кои изискуваат несебичен ангажман, самопрегорност и придонес од секој поединец и сите нас заедно ако сакаме да го оствариме идеалот што не сплотува - интегрирањето во ЕУ и НАТО, вели Тодоровски, посочувајќи на стиховите од песните на Никола Јонков Вапцаров.

Во образложението по повод доделувањето на наградата се истакнува дека таа се доделува за научно - творечка и педагошко - едукативна дејност на Тодоровски, а особено за неговиот ангажман во периодот на раководење со Меѓународниот семинар за македонски јазик, литература и култура која придонела за меѓународна афирмација на македонската литература и јазик. Со опус од над 20 книги голем број стручно научни прилози преведени дела и лексикони со енцилопедиски карактер Тодоровски, се наведува, спаѓа во редот во најпродуктивните научни работници од неговата област со заокружен и исклучително плоден ангажман насочен кон македонистиката како основна тематска преокупација. ва/ссм/13:38

Посети: {moshits}