Господи, Ти си му помогнал на кроткиот Давид во борбата и си го направил способен да го надвладее иноплеменикот; Притекни напомош на Твојот Православен народ, и со оружјето на Крстот порази ги нашите противници. Со Твојата штедрост покажи ни ја Твојата милост како некогаш и направи да познаат (противниците наши) дека Ти Си Бог и дека ќе победиме ние, кои на Тебе се надеваме. По молитвите на Твојата Пречиста Мајка, дарувај ни милост голема.
Вечерна, Крстопоклнона Недела

 Поуки на светите отци: Ако малку проштевате, и Он малку ќе ви прости! Ако многу проштевате, Он многу ќе ви прости!
 Свети Јован Златоуст

 Молитва:
 Со вера во силата на Чесниот Крст Твој да го положиме животот во Твоите раце, Господи, и да бидеме непоколебливи кога ќе ни отежне патот, предано служејќи Ти без отстапување, зашто сакаме да ти служиме по волјата Твоја. Амин.

 Читање од Светото Писмо:
 Исаија 9, 9-21; 10, 1-4
 Битие 7, 1-5
 Соломонови Изреки 8, 32-36; 9, 1-11

 Созерцание: Зашто кој ме наоѓа мене, наоѓа живот и добива љубов од Господа.
Соломонови Изреки 8, 17

Подготви: А.Л.

 Од Православен календар на МПЦ    

 Преподобен Герасим     17/03/2009

Овој познат светител најпрво се учеше на подвижнички живот во Тиваида Мисирска, а потоа премина на Јордан и таму основа обител во која имаше околу седумдесет монаси и која до ден денес постои. За својот манастир постави посебен типик, според кој пет дена монасите поминуваа по келиите плетејќи кошници и рогозини; внатре не ложеа оган, а јадеа само по малку сув леб и урми. Кога излегуваа од своите келии ги оставаа отворени за да може секој кој би влегол внатре да си земе што сака. Во сабота и во недела се собираа во манастирската црква, имаа заедничка трпеза, со вариво и со малку вино во слава Божја. Тогаш секој монах ќе донесеше и ќе го положеше пред нозете на игуменот она што го изработил во изминатите пет дена. Монахот имаше само по една облека. Свети Герасим им беше пример на сите. За Чесниот Пост не јадеше ништо освен што се причестуваше. Еднаш виде лав како рика од болка бидејќи имаше трн во ногата. Герасим пријде, се прекрсти и му го извади на ѕверот трнот од ногата. Лавот толку се скроти, што појде по Старецот во манастирот и остана таму до неговата смрт, а кога умре Старецот и лавот загина од болка по него. Свети Герасим учествуваше на Четвртиот Вселенски Собор во Халкидон, во времето на Маркијан и Пулхерија, па иако и тој најпрво клонеше кон монофизитската ерес на Евтихиј и Диоскор, на Соборот се покажа како голем поборник за Православието. Од таа ерес го одврати Свети Ефтимиј. Од учениците на Св. Герасим најславен беше Св. Киријак Отшелник. Свети Герасим се упокои и премина во радоста на својот Господ во 457 година.

Свети Јаков Постник     17/03/2009

Живееше во 6 век. Толку се восоврши во богоугодниот живот што со молитва ги лечеше најтешките болни. Но непријателот на човечкиот род наведуваше врз него силни искушенија. Така еднаш едни подбивачи испратија кај него една развратна жена. Таа се преправаше пред него и плачеше, а го навлекуваше на грев. Гледајќи дека ќе падне во грев Јаков ја стави својата лева рака во оган и ја држеше така додека не се испржи целата. Кога го виде тоа жената се исполни со страв и ужас, се покаја и го поправи својот живот. Но во друга прилика тој не му одолеа на искушението а падна во грев со една девојка којашто родителите ја донесоа кај него како избезумена за да ја исцели од лудилото. Тој навистина ја исцели, но потоа згреши со неа и за да го скрие гревот ја уби и ја фрли во реката. Тоа е вообичаено: од блудот до убиството нема многу. По ова Јаков поживеа десет години во еден гроб како покајник. Еднаш во време на голема суша од која страдаа и луѓето и животните, по неговите молитви падна дожд и по тоа позна дека Бог му го прости гревот. Овој пример е сличен на Давидовиот: свирепиот зол демон по Божјо допуштение може да ги собори и најголемите духовни џинови, но искреното покајание го привлекува Божјото милосрдие. А најголемите гревови биваат простени тогаш кога грешникот самиот си наложува сесрдна казна за гревот, таква што ги зафаќа сите длабочини на неговото битие.

Светите маченици Павле и Јулијана     17/03/2009

Брат и сестра од Птолемаида Феникиска. Беа страшно мачени за Христа од царот Аврелијан и најпосле ги убија со меч. При нивните мачења се покажаа многубројни чуда. Незнабожците што ги видоа се обратија во верата, а некои од нив беа и убиени. Пострадаа во 273 година.

Посети:{moshits}