Епархискиот управен одбор на Скопската православна епархија е вчудоневиден од апсурдната осуда врз Скопската епархија од страна на Здружението на новинарите на Македонија. Институцијата која себеси се повикува дека постои заради „јакнење на професионалната етика“, флагрантно го прекршува сопствениот Кодекс, чија основна задача е почитувањето на вистината, кога нечесно и тенденциозно ги изопачува јасните зборови од црковното писмо. ЗНМ го подигна гласот и ја осуди Црквата за забрана, а во писмото за забрана - ниту збор! Од причина што се работи за исклучително краток текст, ќе си дозволиме да го повториме во целост дописот упатен до неколку новинарски редакции: Поради сè позачестените пројави на самоволие, непочитување и несоодветно однесување во црквите и манастирите од страна на вашите новинарски екипи, не се дозволува снимање и фотографирање во црквите, манастирите и на црковните имоти од Скопската православна епархија без претходно добиена писмена согласност од Епархијата. Ако ја следиме логиката од реакцијата на ЗНМ, тогаш би можеле да заклучиме дека на граѓаните од Македонија им е забрането да излезат од земјата, бидејќи, како што е познато, во скоро сите земји од светот не им е дозволен влез без претходно добиена виза!
А ваквото барање е само применување на веќе воспоставената пракса и позитивните црковни закони, коишто, впрочем, на членовите на ЗНМ, би требало од нивната пракса да им бидат добро познати: во црквите и манастирите, џамиите и синагогите, не само во Македонија, туку и насекаде во светот, може да се снима и фотографира исклучиво со одобрение на надлежните верски власти! Стандардната административната процедура, според којашто по поднесено писмено барање за снимање и фотографирање се издава писмено одобрение, не беше скрупулозно применувана за големите црковни празници и настани, со цел преку скратена постапка и јавен повик да се постигне пошироко информирање на јавноста за празничните одбележувања. Но, во моментот кога ескалираа пројавите на самоволие, непочитување и несоодветно однесување од страна на некои новинарски екипи, ЕУО на Скопската епархија само побара применување на вообичаена процедура.
Освен тоа, ЕУО на Скопската епархија е изненаден од претензиите за видовитост на ЗНМ, коешто со сигурност тврди дека во образложението за ваквата постапка не е посочена „вистинската причина“! Растрчувањето на снимателите, бркањето на соговорници по изјава внатре во црквата и црковните дворови, и покрај тоа што пристојно се замолени тоа да не го прават, влетувањето со вклучена камера по црковните кабинети се само дел од бројните новинарски инциденти на Алфа и Сител Телевизија. Дури и најсилната имагинација не може да претпостави ваквата новинарска ревност да најде сличен израз во некоја синагога, или уште помалку, во џамија... Познато е дека вртоглавото бркање на сензационалност е само покривање на скромните професионални новинарски квалитети. Ако овие се стандардите на македонското новинарство, зад коишто стои и ги поддржува ЗНМ, тогаш - нека ни е Господ на помош!
Оправданоста, пак, на потегот на ЕУО, уште повеќе се потврдува во конзистентното продолжување на самоволието, со непочитување на епархиското барање од страна на новинарската екипа на Сител, којашто вчера повторно без никаква најава со камери и микрофони изврши упад во Архиепископскиот соборен храм „Св. Климент Охридски“ во Скопје за време на светата Литургија. Од направените снимки во информативните изданија немаше ништо, врз основа на што може да се претпостави дека се работи единствено за дрска демонстрација на сила...
Од тие причини, ЕУО на Скопската епархија се обраќа до ЗНМ да ги осуди ваквите постапки, а воедно и да го повлече изреченото барање.
Епархиски управен одбор
на Скопската православна епархија
