Скопје, 11 јануари (МИА) - Првпат на македонски јазик се објавени капитални дела од областа на политичките науки, во рамки на владиниот проект за превод на 500 стручни и научни книги кои се користат на десетте најреномирани универзитети во САД, Франција, Германија и Велика Британија. Достапни за професорите, научниците и за студентите отсега на македонски јазик ќе бидат изданијата на познати политолози и влијателни теоретичари за меѓународни односи во светот, како Џозеф Нај, Џовани Сартори, Ендрју Хејвуд, Дејвид Хелд...
Првите 13 книги од обемната едиција, која треба да биде завршена во 2010 година, денеска свечено беа промовирани на Правниот факултет во Скопје. Во јуни ќе биде објавен тендер и за втората фаза на проектот за превод и печат на уште 500 стручни книги. Покрај од правните науки, во подготовка се и публикации од областа на економијата, екологијата, социјалната политика, криминалистиката, уметноста...
Промовирајќи ги преводите, премиерот Никола Груевски рече дека 90 отсто од објавените книги ќе бидат распределени на државните и приватните универзитети, во МАНУ, во библиотеки, а само десет отсто ќе бидат дадени во продажба.
- Овој проект претставува значаен продор во македонската наука и траен влог во високото образование. Во 21 век ќе биде нужно македонската наука и македонските универзитети да живеат, да ги следат и да пулсираат во исто време со врвните глобални универзитети, истакна Груевски, додавајќи дека проектот на студентите им нуди учебници пишувани од врвни научници, од оние кои ја обликуваат актуелната глобална наука.
Специјализираното знаење, посочи премиерот, е единствениот ресурс на секое општество во натпреварот што го наметнува глобализацијата и новите технологии.
- Токму иновативноста и креативноста, интелектулната сила на Република Македонија ќе биде нашето главно оружје и нашата главна потпора наспроти предизвиците пред кои се наоѓа нашата држава, додаде Груевски.
Вицепремиерот за европски прашања Ивица Боцевски рече дека меѓу главните предизвици на македонската политичка наука е институционализација и квантификација на професијата.
Проф. д-р Ѓорѓи Иванов, еден од основачите на политичките сртудии во Македонија, рече дека добивањето најрелевантна литература од областа е најпосакуваниот подарок за една научна дисциплина. хс/вј/16:06
