Свечени богослужби во женскиот манастир во Рајчица

Понесени сè уште од воскресната радост и преисполнети со силна љубов кон Светителот, сестрите во Рајчица и браќата од светата Бигорска обител заедно со мноштвото верници, кои и покрај работните обврски сепак придојдоа од сите страни на нашата земја, го прославија со големо торжество празникот на нивниот славен патрон - светиот Георгиј Победоносец.

А великомаченикот и овој пат излеваше обилна благодат преку своите мироточиви и исцелителни мошти. Зашто Светителот повторно ја покажа својата исцелителна моќ. Имено, потресно беше раскажувањето на еден верник од Битола, кој долго време боледувал од тешка болест на устата за која лекарите не можеле да помогнат. Овој човек со силна вера во срцето им пристапил на моштите, ги целивал и уште истиот ден бил исцелен од болеста.

Благодарни за чудото што свети Георгиј го направи, сестрите со посебно умиление ги пееја стихирите во чест на  големиот Чудотворец и нивен моќен застапник пред Бога, кој ги собра од разни места и ги прими во својот дом, удостојувајќи ги да Му служат на Бога и секојдневно Му вознесуваат молитви и славословија. Прекрасно беше чувстото кога во раскошно украсениот храм, осветлен само од тивката светлина на свеќите, одекнуваа гласовите на присутните верници, бидејќи сите се придружија кон торжественото славење.  

Зборувајќи за големото значење на свети Георгиј за Православието, митрополитот Дебарско-Кичевски и Плаошки г. Тимотеј, кој го збогати торжеството на празникот со своето присуство и кој чиноначалствуваше со Божествената Литургија, во својата проповед до верниците истакна дека со својата маченичка смрт, свети Георгиј стана една драгоцена и благородна жртва за доброто и напредокот на Христовата Црква и дека и денес, како што сведочи неговата света икона, им овозможува на новокрстените христијани да се спасат од злото на овој свет и да пронајдат сигурно пристаниште, засолниште, тврдина во новозаветната Црква, Црквата Православна наша.

Известуваат: сестрите од манастирот во Рајчица

Посети:{moshits}