Скопје, 23 април (МИА) - Го чувам своето - додека пишувам на кирилица - постојам! Тоа е мотото на кампањата за зачувување, користење и модернизација на македонската кирилица, иницирана од Македонската информативна агенција (МИА) и Маркетинг агенцијата „Идеја плус комуникации“.
Акцијата за популаризација на вредноста и уникатноста на македонското писмо почна денеска со промоција во Младинскиот културен центар, токму на Светскиот ден на книгата и во 2008-ма, која УНЕСКО ја прогласи за Година на мајчиниот јазик, зашто на околу 200 јазици во светот, меѓу кои е и македонскиот, им се заканува исчезнување. Кампањата ќе трае до 10 јуни, а на официјалниот почеток беше благословена и од поглаварот на Македонската православна црква г.г. Стефан.
Иако е создадена пред повеќе од десет века на овие простори, со прегорна работа на светите Кирил и Методиј, творците на словенската писменост, и со посветеноста на нивниот ученик свети Климент Охридски, кирилицата неправедно се подзаборава и во употребата го „губи чекорот“ со латиницата. Тоа е особено забележливо во новите глобални сфери - информатичките технологии, комуникациите и рекламирањето. Оттаму и поттикот за кампањата, што ќе опфати повеќе активности кои треба да ја подигнат свеста за правилна употреба на кирилицата. Целта е да се покаже дека кирилицата е убава, применлива, отмена, грациозна, прогресивна, читка и модерна и поради тоа да се употребува секаде каде што е можно.
Изработена е и посебна интернет-страница www.mojatakirilica.com.mk, на која е објавен конкурс за изработка на правилни македонски кирилични компјутерски фонтови. На веб-страницата е поставен кириличен фонт кој бесплатно ќе може да се преземе. До крајот на кампањата ќе бидат изработени уште три нови фонтови кои, исто така, ќе бидат поставени и ќе може слободно да се користат. Новостите за сите активности поврзани со кампањата редовно ќе бидат објавувани и ажурирани. На веб-страницата има и катче за децата кои низ игра ќе ја учат азбуката.
Проектот предвидува експертски трибини „Иднината на кирилицата“ и „Кирилицата и информатичката технологија“, телевизиски и радиоемисии, колумни во печатените медиуми. Подготвен е промотивен материјал - постери, билборди, огласи, рекламни производи, компакт-диск со песна од Влатко Стефановски, која тој ја пее со децата од хорот „Златно славејче“, како и многубројни едукативни и забавни содржини. Во рамките на иницијативата на 26 мај е планиран и голем отворен настан на плоштадот „Македонија“ за славење на кририлицата. На крајот на кампањата (10 јуни) ќе бидат доделени наградите за трите нови избрани исправни кирилични македонски фонтови.
Иницијативата има силна и безрезервна поддршка од научната и уметничката јавност, од институции, бизнис-заедницата и од медиумите. хс/са/13:03