Излезе од печат 31-то издание на списанието „Православна Светлина“.   Во овој број се сместени повеќе наслови во кои се објаснуваат различни аспекти на нашата православна вера и живот. Се надеваме дека и овој број на Православна Светлина ќе биде радосна вест за сите верници во Повардарската епархија, па и пошироко. Вашиот примерок од новиот број ќе можете да го земете во сите храмови низ Повардарската епархија, а истото можете да го читате во електронска верзија на линкот поставен на сликата. Како новина од овој број Ви ја претставуваме Едицијата „Житија“, која ќе биде додаток во секој нареден број на нашето списание, а во која ќе објавуваме житија на преподобни отци и старци. Во првиот број од оваа едиција го издадовме житието на Преподобниот и богоносен отец наш Сергиј Радоњешки. Во прилог можете да го прочитате и предговорот за оваа едиција.

Предговор за едицијата „Житија“

Светителите се живи сведоци на воскреснатиот Христос, најголемо сведоштво за присуството Божјо во Светата Православна Црква, показател дека благодатта сѐ уште се излева врз верниот народ, кога тој живее богоугоден живот, кога се подвизува со пост и молитва, кога се кае за гревовите, и кога се причестува со Телото и Крвта Христови. Оние кои достигнале совршена љубов, кон Бог, кон ближните, па дури и кон непријателите, Бог ги прославува на разни начини: некои со дар на чудотворство, некои со дар на проповед, некои со дар на утеха, некои со нетлени мошти итн.

Како предание во Црквата ни е оставено да ги почитуваме светителите, како наши учители и молитвеници пред Бога, но и да се поучуваме од нивните житија. Големо дело е да се составуваат, преведуваат и објавуваат житијата на светителите, а голем благослов добиваат оние кои ги читаат и го следат примерот на светителот чие што житие го читаат. Се радуваат и светителите од небесната Црква гледајќи дека не се заборавени, дека некој се грижи за ширење на нивниот свет спомен, дека некој ги чита и следи нивните поуки и пример, се молат за нас, нѐ благословуваат и ни помагаат во духовниот живот и во секоја неволја кога ги повикуваме.

Македонскиот православен народ во длабочината на своето срце е побожен народ, народ Христов, народ кој се угледува на Христа и од Него ја примил карактеристичната скромност, кротост и смирение. Нашиот народ многу ги сака и почитува светителите, за што ни сведочи огромниот број на храмови изградени во најтешките и најсиромашни времиња, огромниот број на семејства кои го слават празникот на некој светител како свој домашен закрилник, како домашна слава, како и присуството на икони во секое македонско семејство.

Разгорени од оваа љубов кон светителите, многу наши браќа и сестри од Повардарската епархија побараа од нас да издаваме брошури со житија на одредени светители, за да им бидат полесно достапни за читање во секое време. Затоа, поттикнати од оваа богоугодна желба, одлучивме како додаток на нашето списание „Православна светлина“, кое излегува веќе осум години, во секој број да објавуваме по едно цело житие на повеќе познати и непознати светители.

Во овие житија ќе сретнеме примери на многу светители кои биле архиереи, свештеници, ѓакони, монаси, но ќе сретнеме и такви кои немале никаков чин во Црквата, туку како обични верници се отповикале на љубовта Божја, и целиот свој живот го поминале угодувајќи Му на Бога, и со редовно присуство и учество во подвизите и Литургијата на Црквата. Без присуство и учество на Божествената Литургија никој не добил светост, затоа што Бог е таму најприсутен и таму сака да нѐ види сите нас, еднодушно собрани на молитва во светите храмови, на Светата Литургија.

Кога грешиме го имаме за соработник ѓаволот кој нѐ поттикнува на грев преку нашите страсти и слабости, а кога копнееме кон свет живот, тогаш ги имаме на помош светите ангели, светителите, Пресвета Богородица и Самиот Господ. Значи полесно е да стигнеме во царството небесно, имајќи такви помошници на тој пат, отколку да стигнеме во пеколот. Но, сѐ е оставено на нашата добра волја и одлучност.

Бог да ве укрепи во подвижничкиот живот, да ви даде сила да го следите примерот на светителите, било во брак или во монаштво, и Самиот Господ со Пресвета Богородица и светителите да ве научи како да стигнете до Него, во радоста на Царството Небесно.

Митрополит Повардарски г. Агатангел

Извор: Повардарска епархија