Мартин, Викторија, Марија, Теодор, Даниела, Елена и Марија, седум деца на возраст од 3 до 10 години денеска заедно беа крстени црквата Св.Атанасиј во Лешочкиот манастир. Чинот на крштевањето го изврши митрополитот Тетовско- гостиварски г-дин Јосиф со свешетено служителеи од Лешочкиот манастир. На овој свечен чин присуствуваа родителите и најблиските роднини на децата.

“Јас имам четири деца од кои само едно ми е крстено. Овие помалите деца од ред причини ете останаа сеуште не крстени. Нашиот поп ми предложи заедно да ги крстиме децата што посебно ме израдува и се разбира, веднаш се согласив“ – рече Боре Митовски од село Жилче.

Веднаш било решено и прашањето за кумот. Оваа должност и чест ја прифатил Маријанчо Матевски кој работи како благајник во Лешочкиот манастир

“Ова е голема одговорност. Не е работата само да се биде кум, туку тоа е одговорност пред се бидејќи кумот е еден вид управител на понатамошниот живот и патот на овие деца. Но, освен што е голема одговорност, тоа за мене е и голема чест и радост“ рече кумот Маријанчо Мадевски.

За митрополитот Тетовско- гостиварски г-дин Јосиф соработката со верниците и разбирањето на нивните потреби е од суштинска важност за развој и унапредување на православната заедница во полошкиот регион кој е под негова надлежност.

 “Парохискиот свештеник ме извести дека во неговата парошија има деца кои сеуште не се крстени бидејќи нивните семејства не стоеле најдобро финансиски.
Затоа ја напривме оваа групна крштевка. Во нашата епархија ова е еден вид мисионерско дело и секаде каде можеме да им помогнеме на ваквите семејства ние им излегуваме во пресрет“ – изјави митрополитот Тетовско- гостиварски г-дин Јосиф.
Освен групно крштевање, денеска во манастирот Св.Наум Охридски Чудотворец на Попова Шапка се одржа и групно венчавање каде седум брачни парови на постара возраст, се венчаа според црковните обреди. Владиката Јосиф најави дека и во иднина ќе има вакви групни крштевки и венчавања.

Извор; Дневник 

Фото и текст: Зоран Андонов