Дељадровце, 7-ми декември 2013 год.- храм на св.вмч. Георгиј Победоносец
„Помнете ги и вашите наставници, што ви го проповедаа словото Божјо, и имајќи го пред очи крајот на нивниот живот, подражавајте ја верата нивна“ (Евр. 13, 7).
На 07.12.2013 година, на 6 месеци од упокојувањето на Митрополитот Кумановско-Осоговски г. Кирил, во домот на неговиот вечен спомен,манастирот на св.вмч. Георгиј победоносец, во с. Дељадровце, се отслужи заупокоена Литургија, на која чиноначалствуваше Митрополитот Повардарски г. Агатангел, во сослужение со Митрополитот Европски г. Пимен, и Митрополитот Кумановско – Осоговски г. Јосиф, во присуство на Архиепископот Охридски и Македонски г.г. Стефан. После заупокоената Литургија, во храмот беше беше отслужен парастос за негово блажено успение и вечен спомен, а над гробот на блаженоупокоениот митрополит се отслужи трисагиј.
- Помнејќи го делото на оние кои се труделе на нивата Господова, ние секогаш имаме можност да се потсетиме и на тешките времиња, и на благодатните мигови во кои Бог нè посетува во текот на нашето служење, било како свештенство, било како народ, и ни се дава можност да се поткрепиме од силата на подвигот на нашите наставници. Како што зрното додека не се распадне, не го дава својот плод, така и нашиот труд ќе даде плод во полна мера дури по нашата смрт. Едни сеат, други полеваат, трети жнеат, но Еден е Оној Кој прави да израсне. Затоа, со радост да се трудиме во нашето дело, исполнувајќи го долгот кон нашите наставници, та и ние да го предадеме Словото на Вистината.
Блажено успение, и вечен покој, подај му Господи на упокоениот твој слуга, вископреосветениот митрополит Кирил, и направи споменот да му биде вечен !
Преминпортал (з.д./к.т.)
