ДНЕВНИК
17.04.2013
ДИМИТАР АНДОНОВСKИ ЌЕ НАСТАПИ НА ВЕЛИГДЕНСKИОТ KОНЦЕРТ
✣✤✣
Византиско пеење како молитва
✣✤✣
• На настанот во Универзална сала на 24 април ќе настапат и Симфонискиот оркестар на Македонската филхармонија, хорот на Бигорскиот манастир, монахињата Kасијана и гостинката од Грција, Нектарија Kаранѕи
Убавина на византиските мелодии од Страсната седмица публиката ќе може да ја доживее на концертот што ќе се одржи на 24 април во Универзалната сала. За нивната изведба ќе биде задолжен поп-пејачот Димитар Андоновски, кој љубовта кон духовната музика ја негува од дете. Духовниот концертот се одржува пред Велигден и е посветен на Исус Христос и на неговите страданија.
- Ќе се пеат избрани стихови од богослужбите на Страсната седмица, во кои, освен мене како изведувач, ќе настапат хорот на Бигорскиот манастир, монахињата Kасијана од манастирот „Св. Георгиј“ во Рајчица и специјалниот гостин од Грција, познатата Нектарија Kаранѕи, која е одличен уметник и промотор на источното византиско пеење. Има огромен интерес за концертот и сите оние што нема да имаат можност да дојдат да н` проследат во Универзалната, ќе може да го гледаат директниот пренос на Македонската телевизија - вели Андоновски.
✣✤✣
Уживам во подготовките за концертот
Димитар источното византиско православно пеење го опишува како исконско, нешто што ни е откриено од Бога, чудесно убаво и богато со раскошни мелодии што побудуваат молитвеност.
- Не е случајно што денес с` повеќе се зголемува интересот кај младите за вакво пеење, кои во него ја чувствуваат големата духовна сила. Затоа во последно време во повеќе градови низ нашата земја под влијание на монаштвото се формираа многу византиски хорови, кои го негуваат источното православно пеење. Инаку, самата природа на ова пеење бара од пејачот одредени морални критериуми и одредено ниво на духовност. Оној што сака да се посвети на ваквото пеење треба да биде морален и верен човек, кој ги сака Бога и луѓето и посветува внимание на својот духовен живот зашто источното православно пеење е молитва - вели тој.
Андоновски нагласува дека ужива во подготовките на концертот, кој е голем предизвик за него. Неискажливо чувство, особено поради спојот на византиската музика со прекрасните аранжмани, адаптирани за Симфонискиот оркестар на Македонската филхармонија.
- Пред сè, сакам да му се заблагодарам на мојот духовен татко, отец Партениј, што ме удостои да бидам дел од овој возвишен настан, што ме научи што значат верата и љубовта кон Бога, што ми помогна да се борам, да бидам подобар христијанин, а пред сè, да бидам добар човек. Навистина е божествено - вели тој.
✣✤✣
Бигорскиот манастир ми е втор дом
Љубовта кон оваа музика кај него се појавила од дете бидејќи потекнува од патријархално семејство, кое ги почитува божјите канони.
- Најголемата заслуга за мојата вера и за мојата љубов кон Бога има мојот сега веќе покоен дедо Борис, кој беше многу духовен човек и ја помагаше црквата. Тој дури се запишал на Богословското училиште во Бугарија, но поради војната, морал да го прекине школувањето и да се врати назад во Македонија. Тој често ме носеше во црква со него, ме подучуваше и од тогаш ми остана блискоста со духовната музика, која ја чувствувам како дел од мене.
Бигорскиот манастир и манастирот „Св. Георгиј“ во Рајчица Димитар ги чувствува како свој втор дом. Тие се местата каде што го наоѓа својот мир и каде што духовно расте и созрева.
- Тоа ми се случува благодарение на љубовта и на поддршката што ја добивам од игуменот на манастирот, архимандритот Партениј и, се разбира, од браќата и сестри монаси.
✣✤✣
Поради концертот, ја одложи промоцијата на албумот
Ангажманите за велигденскиот концерт ја пролонгираа промоцијата на деби- албумот на пејачот.
- На мое задоволство, приоритет му дадов на концертот. Албумот е во финална подготовка и веднаш по концертот предвидена е и неговата официјална промоција. Ќе има наслов „Ова небо знае с`“, според една од моите позначајни песни - вели Димитар.
Соња Алексоска-Неделковска
Извор:
+Св. ап.Акила; преп.Никодим Светогорец
