ДОНАТОРСКИ ВИП КОКТЕЛ ЗА ДЕТСКИОТ УРГЕНТЕН ЦЕНТАР
Маја Иванова: Да донираме, за нашите деца станува збор!
Во првата фаза од кампањата се собрани 55 илјади евра за реконструкција на Клиниката за детски болести, а во втората фаза кампањата ќе опфаќа донации за набавка на медицинска опрема
Собрани се сите средства за реконструкција на просторот на детскиот ургентен центар на Универзитетската клиника. Околу 55 илјади евра колку што првично било проценето дека ќе биде потребно за обнова на Клиниката за детски болести како донација стигнале од турската Меѓународна агенција за соработка и развој "Тика".
Информацијата завчера ја соопшти првата дама на Република Македонија и покровител на кампањата, Маја Иванова на специјално организираниот донаторски ВИП коктел во Младинскиот културен центар. Иницијатори на кампањата се Амбасадата на Кралството Холандија во РМ, сопругата на амбасадорот на САД во Македонија, Мери Џо Волерс, невладината организација "Линк акрос" и маркетинг агенцијата "Њу момент".
- Сакам да искажам посебна благодарност до човекот, чија визија е дека треба да изградиме иднина за младите, но и млади за иднината. Од кога го слушна концептот на кампањата веднаш ја даде својата лична поддршка, за нашите деца станува збор ми рече, тие се иднината на нашата земја, благодарам за безрезервната и огромна поддршка за оваа кампања и за сите активности, што ги добивам од мојот сопруг Ѓорѓе Иванов, рече Иванова.
Првата фаза е наменета за реновирање и адаптирање на просторот, односно да се додадат водовод, канализација, довод на гасови бидејќи ќе се направи и мини интензивна во која ќе може веднаш да се згрижат тешките случаи. За изведбата на градежниот дел ќе се објави тендер на кој ќе се избере најповолната понуда од компаниите.
Освен "Тика", списокот на донатори е долг, пристигнале и донациите од Тинекс маркет, амбасадата на државата Катар, амбасадата на Сојузна Република Германија, бизнис-заедницата.
Во последно време почнаа да се случуваат многу работи на универзитетската клиника за детски болести, но ова е кулминацијата на сето тоа за кое се бориме, а тоа се спасување на животи на нашите дечиња, посочија од детската клиника.
-Практично во оваа донаторска кампања која заврши со ваков донаторски коктел, верувам и знам дека ќе ги добиеме средствата потребни да го направиме тоа што го ветуваме, а тоа ќе значи и врв во медицината што барем за мене значи остварување на мојот сон, а тоа е да ги спасуваме дечињата адекватно како што тоа го прават секаде во светот, изјави д-р Аспасија Софијанова.
Сопругата на американскиот амбасадор во Македонија, пак, посочи дека една од причините да се приклучи на оваа кампања е што работела како медицинска сестра.
- Во САД работев како медицинска сестра и знам што значи да се помага на луѓето, па ми изгледаше одлична прилика да се помогне и на Клиниката за детската болести. Ова е една од поголемите кампањи што ги имам видено, ја сакам Македонија и сакам да помагам, посочи Мери Џо Волерс.
По првата фаза ќе следи и втора фаза од кампањата во која сите доброчинители што сакаат да ја помогнат обновата на детската клиника ќе може да донираат средства за набавка на медицинска опрема и подобар амбулантен простор.
Текст: (С.Тр.)Вечер
Св. свештеномаченик Атиноген, епископ Севастиски во Ерменија; Св. маченичка и девица Јулија; Петанесет илјади Свети маченици; Св. маченик Атиноген; Споменот на шесте Вселенски Собори; 
