СРЕДА ОД ВТОРАТА НЕДЕЛА ОД ПОСТОТ (27.03.2013)

Души, кои сте далеку од Бога залутани и од Божествените Дарови лишени, дојдете и искрено, од длабочините на срцето, да се вратиме како блудниот син и запееме: Отче благи, кој Си на Небесата, ти згрешивме многу, смилувај се и спаси нè, зашто прибегнуваме кон милоста Твоја.
Утрена, втора недела од Постот

sv.GRIGORIJ.PALAMA.jpg Поуки од светите отци: Не барај ништо друго освен да се боиш од Него, да Го љубиш и да одиш по сите патишта Негови. Тоа е твојата пофалба и тоа е твојот Бог.
Свети Григориј Палама

Молитва:
Подај ни, Боже, барајќи ја Твојата прошка, да станеме нова твар во Исуса Христа, со нова цел и послушност кон Тебе и обновена решителност да живееме свој живот по Твојата волја, со благодатта Твоја. Амин.

Читање од Светото Писмо:
Исаија 5, 16-25
Битие 4, 16-26
Соломонови Изреки 5, 15-23; 6, 1-3

Созерцание: Оти патиштата на човекот се пред очите на Господа, и Он ги гледа сите патеки негови.
Соломонови Изреки 5, 21

Подготви: А.Л.

Од Верскиот календар

Преподобен Бенедикт

Роден е во Нурсиската област во Италија во 480 година од богати и угледни родители. Не се задржа долго по школите, зашто брзо увиде дека заради книшкото учење може да го изгуби „големиот разум на својата душа“. Од училиште излезе како „ ненаучен мудрец и разумен незнајко“. Побегна во еден манастир, каде прими монашки чин од монахот Роман и се повлече во една недостапна гора, па остана во една пештера трудејќи се околу својата душа повеќе од три години. Роман носеше леб и го спушташе со јаже од една стрмна карпа до влезот на пештерата на Бенедикт. Кога се прочу по околината, за да ја избегне човечката слава побегна оттаму. Беше многу суров кон себе. Еднаш кога го спопадна демонот на блудот, се соблече гол и се валкаше по коприви и трња сѐ дури не отстрани од себе секаква помисла на жена. Бог му даде многу духовни дарови: беше проѕорлив, исцелуваше болни, изгонуваше демони, воскреснуваше мртви, им се јавуваше на луѓето и на јаве и на далечина и во сон. Еднаш проѕре дека чашата со вино што му ја дале е отровна. Ја прекрсти и таа пукна. Устрои дванаесет манастири, во секој од нив по дванаесет монаси. Подоцна се создаде посебен ред на бенедиктинци, којшто и денес постои во Римската црква. Шест дена пред смртта нареди да го отворат неговиот гроб, кој беше подготвен отпорано бидејќи светителот го провиде својот крај. Ги собра сите монаси, ги посоветува и Му го предаде својот дух на Бога, Кому верно Му послужи во сиромаштија и во чистота. Неговата родена сестра Схоластика живееше во еден женски манастир и по примерот на својот брат и самата се подвизуваше тврдо и достигна големо духовно совршенство. Кога Свети Бенедикт ја испушти својата душа, двајца монаси, едниот на пат а другиот во една оддалечена келија, молејќи се видоа истовремено исто видение: пат од земјата до небото послан со скапоцени ткаенини и по страните осветлен со редици луѓе; на врвот од патот стоеше еден човек со неискажлива убавина и блесок, кој им рече дека патот за Бенедикт, кој Му е омилен на Бога, е подготвен. Од ова видение двајцата браќа дознаа дека нивниот игумен замина од овој свет. Свети Бенедикт се упокои во 543 година.