За постот
Постот не е само, ааа постам јас без зејтин и толку, туку да постиме и духовно.
Впрочем, за полезен пост не е доволно само воздржување од јадење; туку да постиме со пост пријатен, угоден на Бога. Вистинскиот пост – е оддалечување од злото, воздржување на јазикот, совладување на гневот во себе, оддалечување од похотите, клеветење, лажење, погазување на клетви; воздржување од ова е вистински пост. При вакви услови постот е прекрасно дело.
Свети Василиј Велики
Постот го прави човека ангел - уверува Свети Јован Златоуст и продолжува: ,,Кој пости, тој станува лесен и добива крилја, и со бодар ум се моли, ги гасне злите похоти, го смилустивува Бога и го смирува својот надмен дух.
Затоа и апостолите речиси секогаш постеле. Кој се моли со пост, тој има две крилја, полесни и од самиот ветар. Таквиот не дреме, не зборува многу, не се прозева и не омалаксува на молитва, како што се случува со многумина, туку е побрз од огнот и е над земјата''.
Фотографија - Старец Евдоким Светогорец
Извор: ( facebook„Византиска музика“)
Друго:
За постот (21.03.2013)
…Кога ќе размислам за неочекуваната промена до која дојде, кога ќе се потсетам на вчерашната врева, тогаш ми станува јасна силата на постот кој, влегувајќи во совеста на секој од нас, ги измени нашите мисли, го исчисти умот, кај сите луѓе, без разлика на чинот, не само кај машките, туку и кај жените, богатите и сиромашните. Денес веќе не се разликуваат трпезите на сиромавиот и богатиот; кај сите е подготвена обична храна, без оглед на барањата и можностите; на обичната трпеза сега ѝ се пристапува со поголемо одушевување отколку порано кога беше поставена изобилно разновидна храна и вино.
Велиш дека постиш. Докажи ми преку своите дела. А кои се тие дела? Ако видиш сиромашен, дај му милостина. Ако се сретнеш со своите непријатели, смири се со нив. Ако на улица видиш некое убаво лице, сврти го својот поглед од него. Значи, да не постиш само со стомакот, туку и со очите и слухот, и рацете и нозете, и сите делови на телото. Рацете нека постат воздржувајќи се од секоја алчност и кражба. Нозете нека постат така што нема да одат по патиштата на гревот. Очите нека постат така што нема страсно да гледаат во убавите лица ниту да гледаат со завист на богатството на другите луѓе. Велиш дека не јадеш месо, но внимавај страсно да не го голташ со очите она што го гледаш околу себе. Пости и со слухот не слушајќи оговарања и интриги. Со својата уста и јазик пости и воздржувај се од лошите зборови и шали. Каква ни е ползата ако не јадеме месо и риба, а ги јадеме своите ближни.
Свети Јован Златоуст