ПРИKАЗНА ОД ПЕПЕЛОТ НА ТРЕСKАВЕЦ
Монахот Kалист жртвуваше сè за да ги спаси иконите
Додека го спасувал иконостасот од монашкиот конак, огнот изгорел сè што имал во собата во која спиел - неговиот миленик канаринец, сета облека што ја имал и 100.000 денари, кои храмот неодамна ги добил од продажбата на дрвата исечени во манастирската шума
Ми се јави и ми кажа: „Отец Kлимент, сè ми изгоре, но успеав да ги спасам иконите, тоа е најважно. Сè друго ми изгоре“. Не зборува ли ова доволно за негова посветеност на Бога, на манастирот, за тоа каква личност е монахот Kалист, каква е неговата љубов кон светилиштето, кое доживеа тешка трагедија. Тој и сега е таму, не го остава манастирот, туку чека да почне неговото обновување. Ќе го дочека и тоа.
Вака отец Kлимент, епископот хераклејски, ја раскажува малку познатата епизода од трагичниот пожар во кој изгоре конакот на манастирот во Трескавец и од која најдобро се гледа драмата што ја преживеал монахот Kалист, кој со години сам живее во храмот.
Најдраматичниот момент било спасувањето на дел од иконостасот и на распетието од 17 век, кои биле конзервирани и се чувале во дел од конакот наменет за престој на монасите. Во моментот кога огнените пламени јазици стасале до монашкиот конак, каде што живеел и монахот Kалист, морал брзо да реши - дали ќе ги спасува иконите или тоа што го имал во своето престојувалиште. И немал дилеми. Потрчал, заедно со странскиот турист што се затекнал на Трескавец, кон иконите и почнале да ги спасуваат. Да не направеле така, ќе изгореле сите, заедно со иконостасот и со распетието.
Додека ги извлекувале иконите, Kалист беспомошно гледал како огнот ја уништува неговата соба.
- Најтешкиот момент бил кога пожарот стасал до неговите простории. Во нив, во тој момент бил неговиот миленик канаринец, сета облека што ја имал, 100.000 денари, кои манастирот неодамна ги добил од продажбата на дрва... Жолтиот канаринец му беше најголем пријател во моментите на осаменост во манастирот. Тоа пријателство траеше седум години. Но, ете, не стасал да го спаси. Ни канаринецот ни ништо друго. Дрвата од манастирската шума ги продал само ден претходно. Голема е неговата жалост, но среќен е што ги сочувал иконите - раскажува отец Kлимент.
Монахот Kалист вчера беше недостапен на мобилниот телефон. Тој веќе девет години престојува во Трескавец.
Нему и на странскиот турист кога почнале да го гаснат пожарот им се случил уште еден пех - дефект на електрична инсталација која го напојува со струја хидрофорот за вода. Затоа, пожарот уште побрзо се раширил. За тоа придонел и фактот што дрвените греди врз кои почива покривната конструкција на конаците биле премачкани со црно масло за да бидат отпорни на влага и да не гнијат.
Монахот Kалист, општинските и државните органи се подготвуваат за акцијата за расчистување на опожарените остатоци од конаците. Најавената акција за утре ќе мора да се одложи бидејќи снегот што заврнал вчера го направил пристапот до манастирот практично невозможен. Сепак, сите подготвителни активности за собирањето материјални и парични средства нема да запрат.
Бранко Ѓорѓевски- Дневник
