Oхрид, 7.10.2012 год.- катедрален храм   Света  Софија

Архимандритот Јосиф хиротонисан за викарен владика на Скопската епархија

Охрид, 7 октомври 2012  – Во катедралната црква Света Софија во Охрид беше хиротонисан архимандритот Јосиф Тодоровски во епископ Велички, викарен владика на Скопската епархија. Со церемонијата на хиротонисувањето чиноначелствуваше Архиепископот охридски и македонски г.г. Стефан, во сослужение на владиците на Светиот архиерејски синод на Македонската православна црква.

Во обраќањето пред присутните поглаварот на МПЦ г.г. Стефан истакна дека денеска Македонската црква и верниците добија уште еден апостол и пастир, учител и мисионер на македонското духовно поле, уште еден архиереј и молитвеник, нов сопрудник за македонската правда и вистина.

- Денеска се радува црквата Христова зашто секој нов избор за епископ значи јакнење на телото Христово. Со твојот избор Скопската епархија на МПЦ доби викарен помошен епископ, а ние веруваме ќе имаме помошник каков што ни требаше. Веруваме ќе бидеш епископ достоен и беспрекорно работлив, кој верно ќе го проповеда словото на вистината, неуморен работник, проповедник на верата и на учењето за доброто и ќе се препорачуваш за служител Божји, со чистота, знаење, со долготрпеливост, благост, со Духот свет, со нелицемерна љубов, со поповед на вистината, со сила Божја, со оружје на правдата. Како Христов благовесник, се надеваме ќе бидеш возвестител на мирот, доносител на радост и проповедник на спасението, проповедник на богатството Христово, рече архиепископот Стефан.

Новиот епископ Велички, владиката Јосиф кој доаѓа од монашкото братство на манастирот „Свети Јован Богорски“, пред присутните одржа беседа во која истакна дека епископот треба да се заборави на себеси, својата волја, желби, да се заборави себеси, за да го носи крстот на сите.

- Послушението раѓа чудесни и неописливи плодови, тоа е отсекување на нашата волја, а прифаќање на волјата Божја, рече Епископот Велички Јосиф.

Владиката Јосиф е 12-от владика на Светиот архиерејски синод на МПЦ. На 21 октомври во Лешочкиот манастир ќе се одржи церемонија на која архимандритот Јосиф Пејоски од манастирот во Калишта ќе биде хиротонисан во Епископ Лешочки, викарен владика на Полошко-кумановската епархија. аб/вј/15:32 (според МИА)

Веројатно не можеше подобро да се усогласи денешната евангелска поука со возвишениот чин на хиротонија на епископот Велички г.Јосиф.

Апостолот (2 Коринтјаните 9,6) го возвишува радосниот дарител на кој Господарот многукратно ќе му возврати. И пред наши очи се случуваше тоа. Монахот кој смерно и радосно Му го подари она што навистина е негово – човечкото срце, ја доби својата награда.

Додека пак во повикот за кој нè известува евангелистот Лука концизно е содржано ветувањето на епископот Велички г.Јосиф дека смерно ќе ги следи упатствата на Владиката. Како зачудениот Симон кој цела ноќ безуспешно ловел риба сепак ќе го послуша Наставникот и ќе се врати да се обиде уште еднаш (Лука 5,5).

Господе – надари го новиот епископ да навлезе во длабините на духот на довереното стадо и да го поведе во спасение („Одвеслај понатаму, во подлабока вода, и фрлете ги мрежите“, Лука 5,4). За потоа – „Кога ги спуштија мрежите уловија толку многу риби, што речиси им се искинаа мрежите (Лука 5,6)“.

А ние веруваме дека ќе ни се повтори многукратното возвраќање од Оној кој не дозволува да биде надминат во дарување, односно Оној кој на радосниот сејач 30, 60 и 100 кратно му возвраќа (Марко 4,8). Некој нè уверува дека тоа што со искрена вера го молиме веќе и сме го добиле (Марко11,24). /р.т.

•  Преминпортал;
• презвитер Антоние Попоски;
• Ратислав Кардалев;

        Лето Господово 2012