Цариградскиот химнограф напишал богослужба за наши светци
Ова е еден исклучително добар гест и сигнал од Цариградската патријаршија, чиј химограф направил дело за тројца преподобници кои ќе бидат канонизирани од МПЦ, вели архимандрит Партениј
Посебна црковна богослужба посветена на тројца свети преподобници, кои завчера ги прогласи Светиот синод на МПЦ-ОА, напишал официјален химнограф на Вселенската патријаршија од Цариград јеромонахот Атанасиј Симонопетрински. Ова е првпат химнографот на Цариградската патријаршија да напише богослужба за Македонската православна црква, која с` уште не е прифатена како автокефална црква од страна на семејството на православните цркви. Богослужбата првпат ќе биде изведена на денот на канонизацијата на тројцата преподобници - Евнувиј, Пајсиј и Аверикиј - кои како монаси на манастирот „Пресвета Богородица - Kичевска“ маченички пострадаа за христијанска вера во 1558 година. Освен ова, ќе се промовира и посебното житие посветено на овие нови светители. Во МПЦ-ОА наведуваат дека фактот што химнографот од Цариградската патријаршија добил дозвола и се нафатил да напише богослужба што ќе се изведува во нејзините духовни храмови на празникот кој ќе им биде посветен на тројцата преподобници.
Синодот на МПЦ-ОА реши да ги канонизира тројцата монаси поради исклучителната посветеност на христијанската вера заради која и ги жртвуваа своите животи во моментот кога познатиот кичевски манастир бил нападнат од страна на турската војска.
- Манастирот беше опколен од многубројна турска војска, која очигледно сакаше да го уништи и да ги утепа сите што биле внатре. Во него тогаш се одржувала богослужба на која имало петнаесетина монаси заедно со дојдените верници. Монахот Аверикиј забележал дека војската ќе нападне и веднаш им кажал на останатите дека безбожниците напаѓаат и дека оној што е подготвен да пострада за верата, нека остане со него. На крајот, со него останале уште монасите Пајсиј и Евнувиј, кои подоцна биле маченички погубени, а манастирот изгорен. Преданието за нивната посветеност на верата и ден-денеска се одржува во народната традиција. Затоа и тие заслужија да бидат канонизирани како преподобни маченици - објаснува дебарско-кичевскиот митрополит Тимотеј.
Преданието за овој настан било запишано на маргините на една книга која се чувала во манастирот и тоа е искористено како основа за да се напише житието, односно нивната биографија. Преку братството на манастирот „Свети Јован Бигорски“ бил воспоставен контакт со химнографот Атанасиј, кој е дел од монашкото братство на грчкиот манастир „Симонопетра“ кој се наоѓа на Света Гора, а е под јурисдикција на Вселенската патријаршија. Овој химнограф досега напишал богослужби и за други автокефални православни цркви, а неодама такво вредно дело направил и за еден нов светец, кој е прогласен од страна на Руската православна црква. Само мал број православни цркви имаат свои официјални химнографи.
- Ова е еден исклучително добар гест од страна на Цариградската патријаршија и ние сме многу благодарни за тоа. Делото изворно е напишано на старогрчки јазик, а ние сме го превеле на народен македонски јазик. Првпат ќе се изведе на вечерната богослужба која ќе се одржи по нивното канонизирање за преподобници - објаснува архимандрит Партениј од Бигорскиот манастир.
МПЦ-ОА одржува добри односи со Вселенската патријаршија, која досега се јавува како еден од факторите во процесите на решавањето на спорното прашање за признавањето на нашата црковна автокефалност од страна на српската православна црква.
- Ние не очекуваме дека останатите православни цркви ќе направат проблем за прогласувањето на тројцата преподобници бидејќи тие пострадале во периодот кога дејствувала автокефална Охридска архиепископија, што значи дека не може да се оспорува од некои други, сегашни, причини - наведува отец Партениј.
Познато е дека во рамките на МПЦ-ОА тече процесот за прогласување и на други светци при што сега во најтесен избор се свети Јоаникиј од Ракотинци и свети Гаврил Лесновски.
Бранко ЃорЃевски
http://www.dnevnik.com.mk/default.asp?ItemID=133D3819C5F1C840B760ECE8DC2F5B6A