По стапките на ангелите во карпестите цркви
Легендата вели дека црквите биле издлабени под површината на земјата откако Господ му наложил на кралот Лалибела да изгради цркви какви што светот дотогаш не видел и му испратил ангели да му помогнат
Додека странецот во близина црта, етиопскиот свештеник Месганав Таркгн ја мести извезената капа и го подига крстот во совршена поза. Наместо благослов, туристите повеќе сакаат фотографија од религиозниот живот во црквите издлабени во црвените карпи во Лалибела, што многумина ги нарекуваат осмо светско чудо. Етиопија е втората најстара христијанска земја на светот, но поседува и богатства од муслиманските кралства, па властите се надеваат дека ќе ги привлечат туристите заинтересирани за религијата. Легендата вели дека овие цркви биле издлабени под површината за земјата на крајот на 11 и почетокот на 12 век откако Господ му наложил на кралот Лалибела да изгради цркви какви што светот дотогаш не видел и му испратил ангели да му помогнат.
Со векови посветените христијани патувале пеш или со магариња за да ги видат црквите издигнати на северните висорамнини. Черепите и мумифицираните останки од некои од нив и сега може да се видат во гробниците издлабени длабоко во карпестите ѕидови околу една од црквите, „Бејт Гиоргис“ (Свети Ѓорѓи). Етиопија има осум историски локации на листата на Светското културно наследство на УНЕСКО, но децениите глад, конфликти и политичка нестабилност ги чувале државата и нејзините величествени палати, обелисци и замоци понастрана од стандардните туристички тури за повеќето посетители на Африка.
- Ако има премногу туристи тоа може да биде опасно за спомениците, но и за перцепцијата за местото. Луѓето може да се откажат од доаѓањето тука ако видат премногу луѓе - вели Валентина Ресенте, архитект што работи на проект на Европската комисија за покривање на пет цркви во Лалибела со привремени засолништа.
УНЕСКО е загрижен и поради се' подлабоките напукнувања на таваните на некои цркви, па се преговара со етиопската влада, со религиозните власти и со мештаните за реставрирање.
Директорот на УНЕСКО за Етиопија, Нурелдин Сати, вели дека нема простор за паника.
- Лалибела се' уште не е локација во опасност, но сепак размислуваме за итна акција за црквите што се загрозени. Ситуацијата е многу сериозна - вели тој. Зачувувањето на античките споменици е само еден од проблемите со кои мора да се соочи етиопската влада во борбата за туристи со Кенија, Танзанија и Јужна Африка. Тука очајно се потребни хотели, подобри транспортни врски и банки во кои туристите ќе ги сменат странските валути во бири, етиопската национална валута. На малиот аеродром во Лалибела постојано можете да видите фрустрирани туристи што го критикуваат редот на летање, односно недостигот од него поради одложените и откажани летови и техничките проблеми на авионите.
- Посетата на Лалибела ми го потврди чувството на гордост со мојата држава. Без оглед што ќе видам во иднина, никогаш нема да ја заборавам убавината на оваа света земја - напишал еден Етиопиец во минатиот месец.
Извор: Дневник
Посети: {moshits}
