Меѓународен научен собир „Свети Наум Охридски и словенската духовна, културна и писмена традиција“ во Охрид (04.11.2010)

 По повод одбележувањето  на 1.100-годишнината од упокојувањето на свети Наум Охридски  Чудотворец,  на 4 номври, во конгресниот центар на Универзитетот „Св. Кирил и Методиј“ во Охрид  започна Меѓународниот научен собир „Свети Наум Охридски и словенската духовна, културна и писмена традиција“.

За животот и дејноста на ученикот на браќата Кирил и Методиј, како и за неговото значење во афирмацијата на Охридската духовна и книжевна школа, на собирот ќе говорат експерти и слависти од Македонија, но и од 15 научни центри од Хрватска, Литванија, Германија, Италија, Русија, Словачка и од Бугарија.  На научниот собир ќе бидат претставени 49 научни трудови од повеќе научни дисциплини посветени на ликот и делото на св. Наум. Во науката се откриваат се поголем број научни достигнувања, како нови творби на овој наш светител.Угледниот професор Волф Ошлис, еден од основачите на македонстиката во Германија и еден од најдобрите познавачи на македонскиот јазик и култура, рече дека темата „Свети Наум“ е секогаш интересна за сите македонисти, оттаму што Наум, Климент и другите се основоположниците на македонската култура, јазик, религија, дури и нација. Притоа тој открива нови детали и теории за активностите на Свети Наум Охридски.

Меѓународниот научен собир што ќе трае до 7 ноември се одржува во организација на Универзитетот „Свети Кирил и Методиј“, под покровителство на претседателот Ѓорге Иванов.  (според МИА)

Свети Наум Охридски Чудотворец (830-910) заедно со Климент Охридски е меѓу најистакнатите ученици на словенските просветители Кирил и Методиј, учесник во нивната Моравска мисија.  Бил учител, писател и меѓу основоположниците на словенската и македонска писменост и просвета, основач на манастирот Св. Архангел кај Охрид, кој денес во негова чест  е именуван манастир Св. Наум. Бил меѓу основачите и учител во Преславската книжевна школа, успешно ја продолжил дејноста на свети Климент во Охридската книжевна школа и  се занимавал и со литература. Починал на 23 декември 910 во манастирот што го изградил на брегот на Охридското Езеро.

 Митрополитот Струмички г. Наум на симпозиумот настапи со предавање на тема „Свети Наум Охридски и суштинскиот континуитет на христијанското Предание“, коeшто во целост ќе биде објавенo во зборникот што ќе се испечати по одржувањето на научниот собир.

Извадок  од  излагањето на Митрополит Струмички г. Наум:

„Преподобниот наш отец Наум, охридскиот чудотворец, е основоположник на монаштвото меѓу нашиот народ, а неговото духовно влијание преку неговата просветителска и апостолска дејност, преку неговите ученици, се протега и многу пошироко меѓу словенските народи. Тој и денес претставува непресушен извор на инспирација, и тоа не само етички туку и мистагошки. Затоа, неспорна е неговата голема улога и како наш Духовен отец и како апостол и исповедник на верата во зачувувањето и во обезбедувањето на континуитетот на суштината на христијанското Предание, значи и на откровението на хармонијата на аскетско-исихастичкиот подвиг во Црквата и во проповедта на вистинската вера, низ вековите до денес. Јас сум еден од живите сведоци дека и возобновените монашки заедници во манастирите на Македонската Православна Црква се плод на неговото надвременско и натпросторно влијание. Знам дека ова духовно чувство и сознание го споделуваат со мене и сите останати монаси како Светинаумови наследници и сотрудници во делото Божјо, во тајната на Домостројот на спасението на човекот и светот.
 И да заклучиме, само личности, како свети Наум, подготвени да се одречат од себеси и да се жртвуваат себеси за Бог и за своите ближни можат да го градат во историјата она што ќе остане вечно односно вечното да го воплотуваат во историјата, а историското постоење да го преобразуваат во нов, бесмртен облик на битие и светотроичен начин на постоење.“

ВИДЕО ИНСЕРТ од излагањето на деканот на Православниот богословскиот факултет д-р  Ацо Гиревски

ВИДЕО ИНСЕРТ од излагањето на проф. д-р  Стефан Санџакоски

Преминпортал

Лето Господово 2010

Друго:

Меѓународен научен симпозиум за Свети Наум Охридски