Г.Петар ги презентираше активностите на Австралиско-новозеландската епархија на литургиски, духовен, црковен и градежен план
Скопје, 12 мај 2010 (МИА) - Се обидуваме богослужбите во црквите кои се под Австралиско-новозеландската епархија да бидат преведени на македонски јазик. Почнавме со организирање верска поука во црквите за младите и за возрасните. Направени се преводи на богослужбени книги. Овој месец ќе биде промовиран проект за неделни училишта во кои младите од прво до осмо одделение ќе го изучуваат македонскиот јазик, црковната и националната историја и ќе се запознаат со етичките и моралните вредности и веронауката, рече на денешната прес-конференција митрополит преспанско-пелагониски и администратор встралиски и новозеландски г.Петар.
Осврнувајќи се на завршувањето на канонската визитација на Австралиско-новозеландската епархија за она што е постигнато на литургиски, духовен, црковен и градежен план, на активностите по однос вршењето на мисијата на црквата, тој истакна дека секоја празнична литургија и служба во сите цркви во Австралија се служи на денот кога е празникот за разлика од порано кога се преместувала во недела.
- Ги поставивме работите и за прашање на извршувањето на венчавките кои порано се извршувале и во денови кога е строго забрането. Во сите цркви има подобро организирани или импровизирани хорови со цел што е можно повеќе да се пристапи кон активно учество на верниците за време на службите. Се доградуваат три манастири и три цркви во Австралија. Дваесет цркви во Австралија се под јурисдикција на МПЦ, рече митрополит Преспанско-пелагониски и администратор Австралиски и новозеландски г.Петар.
Преводи на богослужбите, појасни тој, има во новооснованата црква во 1997 година „Света Петка“ во Мил Парк, а тоа доби добар одѕив и кај другите цркви и парохии во Викторија, Нов јужен Велс итн.
- Цврсто стоиме на ставот дека треба да се има добра комуникација со вернциите особено со помладите. Почнавме со организирање семинари со свештенството со цел да ги разбудиме нивните чувства за нивната одговорна мисија како парохиски свештеници на пасторско мисионерската дејност бидејќи се наоѓаме во ситуација кога таму доколку ние како црква не се погрижиме доволно на тој план, може верниците да ни бидат загубени, да немаат интерес за мисијата на црквата или да бидат жртва на протестантските секти и други верски деноминации кои се многу активни, посочи митрополит преспанско-пелагониски и администратор австралиски и новозеландски г.Петар.
Тој истакна дека има една црква комплетно фрескоживописана, тоа е „Св.Никола“ во Перт, а оти при крај се работите околу фрескоживописот во црквите „Св.Петка“ во Мил Парк, „Св.Илија“ итн. Нема, рече митрополит преспанско-пелагониски и администратор австралиски и новозеландски г.Петар, доволно квалитетни фрескоживописци во Австралија кои би можеле да ги изведат овие работи.
Укажувајќи на грижата околу зависниците од дрога која е нивна приоритетна страна, тој укажа на проблемот со пензионерите во Австралија кои масовно се зависни од хазардните игри.
- Организаторите (кои добиваат надоместок) на дел од пензионерските друштва ги собираат луѓето пред црквите и од таму ги носат во казината. Тие што се коцкаат добиваат бесплатен ручек, а таму ги оставаат своите пензии. Оваа зависност е проблем не само за Македонците, туку и за сите националности во Австралија, додаде митрополит преспанско-пелагониски и администратор австралиски и новозеландски г.Петар. рп/скс/14:01
Скопје, Македонска Православна Архиепископија .
