Света Божествена Литургија во храмот Св.Великомаченик Георгиј во Скопје

Скопје, Македонија - Во четвртата недела од Светата Четириесетница - Неделата на свети Јован Лествичник - кога Светата Православна Црква го слави споменот на преподобната маченичка Евдокија и преподобниот Агапиј, во манастирскиот храм Свети Великомаченик Георгиј во Скопје, Неговото Високопреосвештенство Митроплитот американско-канадски Методиј, отслужи Света Божествена Литургија, во сослужение на презвитер Горан Тасески.

Во Името на Отецот и Синот и Светиот Дух! Амин!
Возљубени браќа и сестри, еве пред нас е чудото на едно исцеление, коешто го направи Господ Исус Христос, со ова момче коешто од своето детство страдаше од нечист дух. Но, тоа не е поука само за неговото исцеление, тоа е поука и за сите нас. Тоа го сфатија и самите апостоли кога Го прашаа Господа, зошто ние не можевме да го исцелиме. Одговорот на ова прашање е навистина спасоносен. Тој род, родот на поднебесните духови, родот на сите наши гревови, се изгонува само со вистински подвиг и подвигот не е ништо друго туку најдобар лек за сето она што ние можеме да го направиме за себеси, за здравјето на нашето тело и уште повеќе за здравјето на нашата душа. Постот и молитвата, очистувањето и постојаната приврзаност кон Бога, тоа се две нешта коишто за човечката душа се пресудни на патот на спасението. Луѓето може да живеат благочестив, морален живот, може да живеат почитувани од целото општество, меѓутоа без вистински подвиг, човекот не може да биде совршен. Недостатокот на подвиг не прави несовршени. Токму затоа и прифаќајќи се за овие силни оружја, за овие силни лекарства коишто Господ ни Ги дава, постот и молитвата ние сигурно чекориме по патот кон Царството Небесно. Зошто апостолите не можеа да го направат тоа што му беше потребно на човекот? Не заради тоа што тие немаа вера, туку затоа што човекот немаше вера. Тој тоа го исповедаше велејќи Му на Господа: “Верувам Господи, помогни му на моето неверие”. За човек вистински да се послужи со постот и со молитвата за вистински да го привлече кон себе дарот на Божјите енергии, треба да верува. Верата е темелот на којшто процветуваат подвизите на постот и молитвата. Меѓутоа и постот и молитвата се тие коишто ја зацврстуваат нашата вера. Тие се работи коишто се нераскинливи и во потполно единство. Ако така постапуваме, ако овој евангелски пример, би рекол овој евангелски рецепт, го примениме во нашиот живот, нашето здравје ќе биде беспрекорно. Постот и молитвата како две крилја ја подигаат целата наша природа кон Бога. Амин.