Mозаиците „Македонија - светла земја“ и „Македонија - земјата памети“ како симбол на македонската историја и култура

Мозаик  „Македонија - земјата памети“

Скопје, 17 јули (МИА) - Мозаиците „Македонија - светла земја“ и „Македонија - земјата памети“ од познатиот сликар Глигор Чемерски вечерва за првпат беа јавно презентирани пред пошироката културна јавност.

Мозаик  „Македонија - светла земја“

Мозаиците со димензии 7,5 метри х 4 метри и 4,5 метри х 4 метри се поставени на два ѕида во Свечената сала на претседателската резиденција и преку нив е претставена Македонија низ вековите, нејзината култура и историја.

 Претседателотна република Македонија г-дин  Ѓорге Иванов, кој присуствуваше на промоцијата, рече дека мозаиците се поставени да ја красат просторијата во која пред многуте пријатели од светот ќе се зборува за Македонија и за нејзините граѓани.  

- Но, уште поважно тие ќе бидат покрај нас, на сите историски важни средби и разговори. Ќе бидеме покрај нив и кога ќе се носат клучните одлуки за иднината на нашиот народ и за нашата татковина, подвлече претседателот Иванов.

Авторот Чемерски изрази задоволство што онака како што е претставена Македонија на мозаиците многумина ја препознаваат како своја.

- Имам впечаток дека ме послужи среќата. Од првите скици се одеше лесно, без отпор и тоа беше убав знак. Реализацијата на мозаикот не оди така лесно. Тоа е многу материја и има разни фази. Меѓутоа, сите тие тешки фази се забораваат кога ќе се исправи мозаикот, ќе застане вертикално пред нас и напорот исчезнал, а големата камена слика се родила сама од себе, рече меѓу другото авторот Чемерски. бак/21:25

  Обраќање на Претседателот на Р. Македонија г-дин Ѓорге Иванов при претставувањето на мозаиците во Свечената сала
 

Почитувани гости, почитувани претставници на медиумите

Ви благодарам што дојдовте денес, во толкав број, на денешната презентација на ова уметничко дело. Македонија и самата е мозаик на слики, на бои, мозаик на вери, јазици и различности кои даваат една извонредна заедничка слика.

Мозаикот е единствен систем на творечко мислење. Мозаикот бил и останал ракување со милениумите и дијалог со цивилизациите.

Кај мозаикот важно е да се погоди растојанието и аголот. Ние, кои сме тука, во центарот, можеби некогаш не можеме се да видиме јасно. Се случува, луѓето кои доаѓаат од надвор, кои сликата ја гледаат од далеку, да видат нешто ново. Ќе ни укажат на работи кои ние не ги гледаме во својата татковина - и добри и лоши.

Понекогаш ќе забележат нешто вредно, кое ние сме го пропуштиле. Понекогаш ќе ни укажат на нешто што не чини, а на кое ние веќе сме се навикнале. Токму во оваа просторија, меѓу овие мозаици, ќе се отвораат и разгледуваат тие разлики во перцепцијата.
 
Почитувани, сигурно дека во оваа просторија ќе има многу пријатни и важни настани. Настани на кои потоа ќе се сеќаваме со гордост, по кои ќе имаме чувство дека сме направиле нешто важно за својата земја. Воедно, тука сигурно ќе има и многу тешки и неизвесни настани. Ќе има мигови кога ќе мораме да носиме судбоносни одлуки.

Добро е што во тие мигови ќе можеме да погледнеме кон овие мозаици и да се присетиме на Македонија и нејзините главни ликови. Ако погледнете повнимателно, ќе забележите дека централните ликови на мозаиците не се просветителите, генералите или убијците на змејови. Тоа се обичните луѓе.

Главниот јунак тука и денес е Македонецот, опкружен со своите ангели, воини и херои. Затоа, овие дела не потсетуваат дека сите ние можеме да постигнеме нешто. Но и воедно, дека сите историски личности кои ние денес ги славиме, биле обични луѓе кои решиле да преземат одговорност и да направат нешто за своите собраќа, за својата земја. Наша работа некогаш ќе биде да инспирираме и да водиме со пример. А, некогаш ќе треба само да им отвориме пат на луѓето да покажат се што можат.

И како што зборот кај писателот е почеток на микрокосмосот, така кај уметникот калиографската буква е лак на прелевање од едно камче во друго. Погледот кон мозаиците отсегогаш е поглед на воодушевување. Погледнете од едната страна –Македонија светла земја – наспроти , Македонија, земјата памети - на средина сите ние  можеби и самите дел од нашите архетипски мотиви и емотивна константа на незаборавот.

Ви благодарам

Од промоција на делото на Глигор Чемерски во резиденцијата на претседателот на Р. Македонија :

 Акад. Митко Маџунков-  Три сонца над Македонија на мозаичкиот диптих на Чемерски -

Посети: {moshits}