Скопје, 30 декември (МИА) - Поголемиот буџет за 54 отсто ќе придонесе за уште поголема грижа во сите дејности на културата, соопшти на прес-конференција министерката за култура Елизабета Канческа - Милевска.

Таа најави дека во првиот месец од 2009 година ќе бидат заокружени неколку капитални проекти. На 4 јануари ќе биде промовиран проектот „Македонска книжевност“ во 130 тома, а наскоро ќе бидат избрани и издавачите за проектот Превод на дела од автори Нобеловци и за објавување стручна литература. На 30 јануари ќе биде промовирана Спомен-куќата на Мајка Тереза, а на 25 јануари на денот на роденденот на Тоше Проески ќе биде поставен камен-темелик за изградба на Спомен-куќа за Тоше. До 10 јануари, како што информираше министерката, ќе биде објавен тендер за избор на фирма за ентериерно уредување на стариот скопски театар, а фирмата што е избрана за сценска технологија и за акустика проектот треба да го заврши за околу девет месеци. Во јануари треба да бидат поставени и седум скулптури во центарот на Скопје, а уште 33 до крајот на 2009 година. Министерството за култура потпишува и договори со домашни и странски уметници за изработка на портрети и сцени од македонската историја наменети за музејскиот комплекс „Македонска борба“. Воедно се работи и на подготовка на восочните фигури.

Во февруари се очекува поставување камен-темелник за изградба на концертната сала, а во мај да биде промовирана доградбата на НУБ „Свети Климент Охридски“. Паралелно се работи и на проектите за Универзална сала и за Турскиот театар, а во февруари треба да завршат и конкурсите за изградба на нови објекти на местото на Македонскиот народен театар и на Драмски театар.

Канческа - Милевска соопшти дека ќе се работи и на 15-те археолошки локалитети на кои оваа година имаше интензивни ископувања што резултираа со околу 10.000 пронајдени предмети. Во 2009 во план е целосно да бидат истражени Скопската тврдина, Хераклеја, Стоби и Марвинци. Во Музејот на вода во Градиште кај Охрид ќе бидат доградени уште 16 праисториски куќички, а ќе се работи и на проектната програма за обнова на Светиклиментовиот универзитет.

Во врска со творците на културата, укажа дека им бил решен работниот однос на 150 уметници во Операта, Филхармонијата и во Ансамблот „Танец“, а во иднина ќе биде воведена посебна категорија национален уметник за да се издвои врвната култура и уметност. Во завршна фаза се и измените во Законот за култура и во Законот за авторски и сродни права, а во подготовка е и посебен закон за Охрид и охридскиот регион.

Во јануари треба да почне реализација на филмот „Омнибус - досие Скопје“ кој е подготвен за снимање, а колку филмови ќе се снимаат во наредната година ќе зависи од завршувањето на вториот и третиот конкурс на Филмскиот фонд.

Во контекст на филмската продукција новинарите го побараа ставот на надлежните институции за спотот на Милчо Манчеввски „Македонија вечна“ поради различните одгласи во јавноста дали спотот ја исполнил целта и ги оправдал вложените 190.000 евра.

Директорот на Филмскиот фонд Дарко Башевски оцени дека спотот е добар, но, како што рече, дискутабилна е целната група. Според него, спотот е промашен ако е наменет за туристите зашто нив нема да ги привлече. Министерката Елизабета Канческа - Милевска, пак, додаде дека врз неа спотот оставил силен впечаток, укажувајќи дека тоа е авторско дело на Милчо Манчевски во кое Министерството за култура и Владата не се мешале. Таа апелираше сите да придонесат за негова промоција. хс/са/12:58

Посети: {moshits}