Маестро Зубин Мехта по 40 години повторно пред македонската публика
-------------------------------------------------------
Скопје, 2 јуни (МИА) -
Светски познатиот диригент, маестро Зубин Мехта по четири децении повторно ќе настапи пред македонската публика. Со Израелската филхармонија на вечерашниот концерт во „Метрополис арената“, што се одржува во рамки на програмата на 47-то издание на фестивалот Охридско лето, ќе настапи со изведба на дела од Бетовен, Равел и Дворжак.
Диригентот кој има настапувано на сите светски сцени и со сите глобално реномирани оркестри, денеска на прес-конференција истакна дека вечерашниот репертоар е избран со цел да се покажат различните стилови на музика што ја негува оваа филхармонија.
Зубин Мехта денеска е прогласен за почесен доктор на Универзитетот „Св. Кирил и Методиј“ во областа на уметноста за неговиот придонес во развојот на музичката култура и афирмацијата на младите, како и за неговата хуманост и солидарност, а од премиерот Никола Груевски доби статуетка на Мајка Тереза.
Во својата поздравна реч, професор д-р Ганка Самоилова - Цветановска посочи дека во светската музичка историја маестро Мехта ќе остане забележан како прв индиски диригент кој настапувал со британски оркестар, како најмлад диригент кој настапувал со Виенската и Берлинската филхармонија, најмлад музички директор на еден од најголемите американски оркестри и засега единствениот музички директор на Израелската филхармонија.
-Зубин Мехта претставува вистинска инспирација и предизвик за бројните уметници во светот, но она по што тој се издвојува од своите колеги, плејадата на врвни светски диригенти е хуманоста и чувството на солидарност, рече Самоилова-Цветановска.
Заблагодарувајќи се на признанието, Мехта рече дека тоа е потврда на неговиот лајт мотив оти музиката ги спојува луѓето.
- Ние не сме политичари и не можеме да ги менуваме границите, но можеме да направиме луѓето да се насменуваат едни на други и тоа е она што се обидуваме да го постигнеме. Наградата ја прифаќам и се обврзувам натаму да работам на спојување на луѓето од различни политички опции, рече Мехта.
Премиерот Никола Груевски врачувајќи му ја статуетката рече дека таа се доделува за на големиот пријател на Македонија да му пренесе дел од нејзиниот дух.
- Неизмерни се полињата на соработка меѓу луѓето и народите, во уметноста, културата, хуманиста и во духовноста. Но, секогаш постојат личности кои претставуваат предводници на творечката инспирација. Ако Мајка Тереза со својата божествена моќ им помага на луѓето, како граѓанка на светот е симбол на светоста и хуманоста, Маестро Мехта вие со виртуозноста на диригентските палки во вашите раце се извишивте до музичкото совршеноство во кое вечерва заедно со големите уметници од пријателски Израел ќе уживаме, рече премиерот Груевски и го покани Мехта повторно да ја посети Македонија за да присуствува на отворањето на спомен куќата на Мајка Тереза во Скопје која е во фаза на возобновување.
Зубин Мехта е роден на 29 април, 1936 година во аристократско семјство во Бомбај, Индија. Љубовта кон музиката ја добил од неговиот татко Мехли Мехта, виолинист и диригент кој бил и основач на Бомбајскиот филхармониски оркестар. Својата музичка кариера ја почнал под менторство на прочуениот професор Ханс Сваровски на 18-годишна возраст. Диригентското деби го има во Виена, 1958 година. Истата година ја добива и првата награда на натпрварот за млади диригенти во Ливерпул. За време на пет децениската кариера бил музички директор на најголемите филхармониски оркестри и оперски куќи во светот, како Виенската филхармонија каде настапил на три новогодишни концерти, на Берлинската опера, со симфониските оркестри во Монтрел, Лос Анѓелес и Њујорк, како и на Метрополитен операта. Најдолг период бил директор на Њујоршката фихармонија, како и во Израелската филхармонија каде е назначен за нејзин доживотен музички директор. Во моментов паралелно соработува и со оперите во Фиренца и Валенсија, а чест гостин е на Виенската и Берлинската филхармонија.
Мехта е добитник на бројни награди и признанија. Прогласен е за почесен граѓанин на Тел Авив и Фиренца, како и за почесен член на Виенската државна опера и на Центарот за изведувачки уметности Џон.Ф. Кенеди, а во 1999 година ООН му ја доделуваат Наградата за мир и толеранција за животно достигнување. Индиската Влада во 2001 година го одликува со „Падма Вибхусхан“ - второ највисоко цивилно признание на државата.ва/скс/15:53
