Мироточива икона на Мајката Божја, Иверско- Хавајска
голема светиња и утеха во Америка!

 Кога свети Андреј имал видение, ангел го зел во рајот и таму тој ги видел сите светии, но никаде не ја видел Мајката Божја. Тогаш го прашал ангелот да му каже каде е Пресветата. Ангелот му реков дека Пресветата речиси сето свое време е на земјата за да им помага на луѓето. Зар има поголема љубов од мајчинската? Кој ќе не утеши кога сме во тага, ако не нашата мајка!
И нашата небесна Мајка постојано е со нас, покривајќи не со својот Омофор, ни кажува колку не љуби. Таа навистина знае што е љубов, што е болка. Таа го растеше Спасителот по плот, Христос и кога Тој страдаше на Крстот, и Таа со срцето свое страдаше.
 Викендов, ( на 27 и 28 Октомври) овде, во Светотроитскиот манастир во Џорданвил Њујорк, ни дојде мироточивата икона на Мајката Божја, Иверско-Хавајска. Чувството да се пречека и види повторно оваа икона беше прекрасно. Јас не можам овде да Ви опишам затоа што чувствата не се опишуваат, туку се доживуваат и чувствуваат. Во овој викенд бев “избран” да ја видам верата, радоста, силзите на многу луѓе од Источниот дел на Америка. Видов колку само солзи се пролееја пред таа Мироточива икона. Колку само Молебни се служеа, молитви и прозби се принесуваа. А иконата не престануваше да мироточи. Бев сведок и сведочам за истото колку само миро се лееше од истата.
 Си спомнувам во неделата на Литургијата, всушност пред да го изнесат путирот и да причестуваат, јас пристапив да се поклонам и да ја целивам. Додека ја целивав, со својата рака ја допрев ризата од долниот дел на иконата и...сета беше мокра, мојата лева рака беше цела натопена со миро. Значи колку милост ни дава Богородица! Тоа се оние чувства кои не можам да ги опишам, а и подобро е да ги заклучам во своето срце. За време на Литургијата, во целата црква се чувствуваше благоухание од мироточивата икона.
 Сега малку да кажам за историјата на мироточивата икона. Всушност оваа икона е поврзана со еден друг настан, со една друга мироточива икона.

Брат Јосиф. Првата икона која тој да доби од Света Гора и почна да мироточи. Маченички беше убиен во Атина во 1997. По неговата маченичка смрт никој не знае каде е мироточивата икона.

 Во Канада живееше еден брат во Христа Јосиф. По потекло тоа беше шпанец, новопокрстен. Еден ден тој ја посети Света Гора, поточно беше во еден скит. Таму тој ја видел иконата на Мајката Божја – Иверска, рачно насликана. Што тој почувствувал кога ја видел иконата, не знаеме, но пред да замине од таму, отец Клемент од истит скит  го вратил назад и му рекол: “Пресветата Дева Богородица ќе замине со тебе.” Така тој да добил истата Иверска икона.
Подоцна на 24 Ноември 1982 истата икона почнала да мироточи. Оваа мироточива икона беше наречена “Иверско-Монтреалска.” Иконофорос (хранител) на иконата беше брат Јосиф. Тој ја носеше насекаде на поклонение. Ја имаше при себе цели 15 години. На 30 Октомври, во Атина, тој брутално беше мачен во хотел, во неговата соба и убиен. Од тогаш никој не знае каде се наоѓа таа мироточива икона. Просто кажано, Бог за земал од нас. Брат Јосиф беше иконофорос на мироточивата икона 15 години. Тој загина маченички за Мајката Божја. Погребан е на гробиштата во Џорданвил.

 Брат Нектариј, хранителот на мироточивата икона Иверско-Хавајска.Истата почна да мироточи во 2008 год. 
 

 Во 2008 години, по соединувањето на Руската Задгранична Црква со Москва, на Хаваи, во домот на еден верник, брат Нектариј протече копија од иконата на Мајката Божја Иверска. Неговиот парохиски свештеник истата икона ја купил од Торонто, во Канада за 20 долари и му ја подарил нему. Истата таа почна да мироточи. Кога веќе видоа дека иконата многу мироточи, Светиот Синод на Руската Задгранична Црква ја прогласи иконата како мироточива и одлучи хранител на истата да биде брат Нектариј. Многумина ова чудо со новата икона која почна да мироточи ја поистоветуваат со онаа на брат Јосиф. Всушност оваа икона Бог ни ја прати како утеха. Едната, на брат Јосиф, ја зема, но друга, иста Иверска ни прати.
 Оваа година е јубилејна за таа мироточива икона. Се исполнуваат пет години откако почна да мироточи иконата. Главната прослава се одржа на почетокот на Октомври во Катедралниот храм во Сан Франциско, посветен на Мајката Божја- Радост на сите нажалени, каде што се наоѓаат нетлените мошти на свети Јован Шангајски и Сан Франциски. Низ тие три дена во тој храм дојдоа пет илјади луѓе за да се поклонат на мироточивата икона. Брат Нектариј често патува низ цела Америка, носејќи ја мироточивата икона на поклонение, па така дојде и кај нас во Џорданвил. Обично мироточивата икона доаѓа во Џорданвил на денот кога беше убиен брат Јосиф и на неговиот гроб служат панихида. Па така и оваа година Митрополитот на Руската Задгранична Црква Иларион отслужи панихида и секако мироточивата икона беше присутна.

  Кога пристигна автомобилот со иконата, брат Нектариј се уште не беше излезен од автомобилот, а веќе насекаде околку нас на гробиштата замириса на миро. И додека траеше панихидата тоа благоухание не престануваше. СО ЕДЕН ЗБОР, ИКОНАТА МНОГУ МИРОТОЧИ. Јас навистина во својот живот немам видено мироточива икона на Мајката Божја толку многу да мироточи. На крајот, кога заврши панихидата, брат Нектариј ја отвори иконата и целото дрво околку иконата беше облеано со миро. Исто така сите забележавме на памукот кој стоеше под иконата, мирото на памукот беше како и обично во жолта боја, но на некој дел беше и светло црвена (или светло кафеава). На ова брат Нектариј рече дека многупати мирото од иконата ја менува бојата.
 И така радоста да бидеме со оваа мироточива икона беше голема. При крајот на денот, брат Нектариј замина со мироточивата икона во Хаваи, местото каде што почна истата да мироточи.
 Непрестано да и се молиме на Мајката Божја, Таа да благослови да ја посети и нашата Македонија со нејзината мироточива икона, па и нашиот народ да се наслади од таа радост и да го види тоа чудо кои е живо во Америка. Кога се молиме сите, тогаш молитвата е силна, па верувам Богородица ќе ја слушне нашата молитва!
 Радувајте се со радоста на која се радував и јас!

 ПО МОЛИТВИТЕ НА ПРЕСВЕТА БОГОРОДИЦА, БОГ ДА ГО ЧУВА И ЗАШТИТИ НАШИОТ НАРОД ОД РАЗНИ НАПАСТИ, ИСКУШЕНИЈА, ОЧАЈАНИЕ, ЛАЖНИ УЧЕЊА...А ХРИСТОС СО НЕГОВАТА МАЈКА, ПРЕЧИСТАТА, ДА НЕ ПРИВЕДАТ КОН ЕДИНИОТ ВИСТИНСКИ БОГ!

Троитско - Свет Манастир
Џорданвил, Њујорк
Стојан Серафим Андов