Час први

Пресвета Владетелке Богородице, само Ти единствената си чиста со душата и телото; само  Ти  единствената си го надминала целомудрието  и девственоста; само Ти единствената си станала живеалиште на сецелата благодат на Светиот Дух!  Не отфрлај ме мене недостојниот, нечистиот, мене кој  и душата и телото ги осквернив со својот сластољубив живот; очисти го мојот ум од наклонетоста кон страстите; обрати ги кон беспрекорни тежнеења моите блудечки и слепи помисли; биди раководителка на моите чувства; ослободи ме од злата и срамна склоност кон предрасудите и страстите, која господари со мене; ослабни го гревот кој ме мори, бодрост и расудување дарувај му, на бедниот и помрачен мој ум, за да можам избавен од темнината гревовна, да се удостојам да Те славам Тебе, вистинската Мајка на вистинската Светлина – Христа Бога нашиот, бидејќи Тебе единствената со Него и поради Него Те благословуваат видливите и невидливите созданија, сега и секогаш и во сите векови. Амин.

Час втори

Те преколнувам, Родителке на Незалезната Светлина, слушни што ќе Ти кажам: јас бедникот во глиб тонам; со мноштвото гревови ја осквернив земјата, и ми се чини: земјата стенка и со воздишки покажува на мене кон неподмитливиот Судија, повикувајќи ги за сведоци и сонцето и небеснот свод со ѕвездите....бурата на моите мисли веќе ме потпоува во очајание; мојата душа со трепет пристапува очекувајќи ја пресудата. Сета моја надеж е во Тебе, Богородице!

Со срам е исполнето лицето на Твојот слуга, иако Ти непрестајно го молиш Родениот од Тебе, и мене недостојниот да ми подари од милоста своја. Одврзи ги моите неодврзливи окови; мене осквернетиот обели ме со солзите на покајнието. Ти која Животот мој го роди – воскресни ме, умртвен од немар; и мене од Ангелите отуѓен, возведи ме кон нив, Богородице.

Големо чудо е, навистина големо, како тоа Господ ги трпи моите гревови! Како сеуште жив не ме свел на дното на пеколот! Како не пратил одгоре невидливо оружје да ме порази!....

Нема сомнеж, Владетелке, Ти со своите молитви си ми дарувала живот, изискувајќи од мене покајание, кое Ти сама подај ми го мене, слугата Твој, бидејќи Ти си мој заклон и заштита. Озари ме со светлоста на Твојот божествен лик, за да Ти вознесам славопој ноќе. Дарувај ми, Господарке, срце скрушено, ридање и солзи! Дарувај ми потполно отпуштање на гревовите, како Жена која во утробата го носела овоплотениот Бог! Дај ми ноќе да Те здогледам со мислениот вид, Пречиста и тогаш ќе се израдувам.

О, крепост моја, надеж моја, слатко видело на слугата Твој! Прими ја оваа молитва од моите осквернети усни!оваа ноќ нека стане ден на спасението на слугата Твој, Богоневесто! Знам дека што и да посакаш, се можеш пред лицето на Родениот од Тебе, кому Му доликува секоја чест и поклонување во сите векови. Амин.

Час трети

Дево Владетелке, Богородице, Ти во утробата си го носела Христа Бога Спасителот наш, - на Тебе сета надеж ја полагам, во Тебе се надевам, бидејќи Ти си над сите Бестелесни Сили. Чувај ме, Пречиста, со својата божествена благодат; раководи со мојот живот, согласно со светата воља на Синот Твој и Бог наш. Дарувај ми отпуштање на гревовите, и биди ми прибежиште, закрила, заштита и патеводителка во живот вечен. Во страшниот час на смртта не оставај ме, Владетелке; туку поитај ми на помош и истргни ме од рацете на демоните мачители.

Владетелке Богородице, Ти единствената си превисоко воздигната над целата земја; и ние Богоневесто, со вера Те благословуваме, со љубов Те величаме, со страв Ти се поклонуваме, бидејќи Ти си почест нас почестите, висина над висините.

Владетелке, Ти си ми од Бога дарувана утеха, божествено оросување на мојата внатрешна жега, нов вруток во пресушениот извор на моите солзи, светлозарен оган на мојата помрачена душа, богатство во сиромаштијата, сила во слабостите, исцелување на неисцливите рани, прекратување на ридањата, уништување на оковите! Слушни го моите молитвени воздишки, сожали се на плачот мој, и допрена од солзите мои, снисходливо прими ја молбата моја и покажи кон мене милосрдие  како Мајка на Човекољубивиот Бог.

Исполни ја мојата незаситна желба, ослободи ме од силовната страст која ја убива мојата душа, и придружи ме кон Себе во земјата на живите, во прегратката на праведните. Те преколнувам, заедничка радост на сите, заедничка заштито на сите, удостој ме да се израдувам со неизречливата радост на од Тебе родениот Цар и Бог, во неискажливите дворци Негови, во непрекратливата наслада, во Неговото безгранично Царство. Владетелке моја, прибежиште мое, животу, оружје, пофалбо, потслон и сило, дај ми да се насладувам со непостижните дарови на Синот Твој!
Сето ова од Тебе јас го молам, бидејќи Ти како Мајка на Севишниот имаш  на соодветната желба и сила. Затоа се надевам дека ќе го добијам она што го очекувам од Тебе, Богоневесто, затоа што си ја родила надежта на сите – Господа нашиот Исуса Христа, Кому му доликува секоја слава чест и поклонување, со Неговиот беспочетен Отец, со благиот и животворниот Дух, сега, секогаш и во сите векови. Амин.

Час четврти

Дево Владетелке Богородице, знам дека сум недостоен да ја гледам Твојата икона, затоа што Твојата душа и тело се чисти, и Ти со право треба да се возгнасуваш од мене. Но, бидејќи од Тебе Родениот Бог поради тоа и стана Човек да ги повика грешниците  на покајание, затоа прими ја мојава исповест за мноштвото тешки согрешенија, и моли Го Синот Твој и Бог, да и покаже милост на мојата бедна душа. Големото мноштво беззаконија ми смета кон Него погледот да го подигнам и сам од Него да молам за простување. Откако се насладив со мноштвото дарови од Бога Создателот мој, нас неблагодарникот сé заборавив. Сиромашен сум во доблестите, а богат во страстите; исполнет сум од срам и осуден од Бога. Мене ме оплакуваат Ангелите, ѓаволите ми се потсмеваат, совеста ме изобличува, моите сопствени постапки ме срамотат; пред смртта сум мртовец, пред судот сум од себе самиот осуден, пред бесконечното мачење јас се измачувам од очајание. Затоа и прибегнувам кон Твојата брза помош, Владетелке Богородице! Снизи се кон смирението мое, Пречиста; сожали се на немоќта моја Беспрекорна! Пред Родениот од Тебе, Ти имаш голема слобода, каква што никој друг нема. Ти можеш се како Мајка Божја, и ништо не е  невозможно за Тебе, само ако Ти го посакаш тоа. Не презирај ги моите солзи и ридањата мои! Не отфрлај ја тагата на моето срце! Не оставај ја празна мојата надеж на Тебе! Со Твоите молитви повикај го милосрдието на Синот и Бог Твој и удостој ме мене, несреќниот и недостојниот слуга Твој, да ја добијам првобитната убавина душевна, да ја отфрлам од себе грдоста на страстите, од гревот да се избавам, да се преклонам пред правдата, од корен да го искорнам сластољубието и да се облечам во светињата на бестрастието, да умрам за светот и да оживеам за доблеста. Биди ми сопатничка кога патувам, и прати ме кога пловам; укрепи ме кога бдеам, чувај ме кога спијам, утеши ме кога плачам; охрабри ме кога сум потиштен, избави ме кога сум навреден, ослободи ме кога сум наклеветан, подигни ме кога сум немоќен; победи ги бесовите кои војуваат против мене и помагај ми во смртна опасност, секојдневно покажувајќи ме страшен за видливите и невидливите непријатели, за сите тие да знаат дека јас сум слуга Твој, Богомајко, која Бога и Царот на сите си го родила, Кому Му доликува чест поклонување низ сите векови. Амин.

Од изданието преведено од руски на Архимандритот Јустин Поповиќ
Подготви: М.Б.

Коментари (1)

Внеси коментар
Ве молиме внесениот коментар нека се однесува на објавата. Коментарите со лични вербални напади нема да бидат објавени. Не користите коментари за рекламирање на вашата страна. Истите ќе бидат избришани. Само кликнете на *Refresh* копчето од вашиот прелистувач за нов безбедносен код.
Име:
E-mail
BBCode:
Коментар:
	Сакам да бидам известен/а по email за коментарите на оваа објава