Од 42 академици, само неколкумина имаат примерок од енциклопедијата
Откако определницата за Албанците во Македонија во Македонската енциклопедија, а и квалификациите на Али Ахмети и ОНА предизвикаа вистински вулкан во јавноста, академик Али Алиу (член на надворешниот состав на МАНУ) вчера ни изјави дека меѓу него и редовните членови, академиците Луан Старова и Алајдин Абази, постои договор до Академијата да достават барање за измена на спорните делови во енциклопедијата.
Доколку не се случи тоа, тие би поднеле оставки на членството во Академијата. Како што дознаваме од Академијата, досега таму не стигнало ниту барање за измена на определниците ниту се понудени оставките од овие академици.
Ситуацијата во МАНУ, најверојатно, е доведена до точка на вриење. Ниту еден академик вчера не беше достапен за изјава. Што е најинтересно, многу мал број од нив имале можност да ја видат енциклопедијата. Како што дознаваме, од 42 академици, само четворица-петмина имале примерок од изданието. Оправдувањето од упатените е дека печатењето оди бавно поради тоа што рачно се работи и треба повеќе време за сушење на страниците. Оваа ситуација потсетува на онаа кога во МАНУ во 2001 година беше презентирана теоријата за размена на територии и кога никој не сакаше ништо да коментира.
Еден од ретките кој вчера говореше на оваа тема е академик Иван Катарџиев. Однапред оградувајќи се од коментари, бидејќи ја немал на увид енциклопедијата, Катарџиев ни потврди дека мал број од членовите на Академијата имаат примерок од енциклопедијата. „Енциклопедијата треба да биде предмет на критика, како и секое издание, но штета е што енциклопедијата се експлоатира само во еден сегмент. Во нејзиното подготвување учествувале правници, физичари, математичари, фолклористи, историчари, стручњаци за флора и фауна, а однапред се негира нешто што има извонредно значење. Ова е прв пат Македонија да ги сумира информациите во еден извор и тоа не е за потценување. Станува збор за исфорсирана и исполитизирана реакција“, потенцира академик Катарџиев.
Тој вели дека тоа е енциклопедија од општ карактер и опфаќа и определници што се однесуваат на релјефот на Македонија, реките, водниот потенцијал, уметност... „Врз основа на изјавите што се пласираат деновиве, јавноста добива карактер на политизација. Луѓето кои ќе ја набават енциклопедијата од неа може да се информираат за голем број аспекти. Од сето тоа богатство на информации се издвојува еден сегмент, кој е важен да се знае, но, исто така, треба да се прочита онака како што е напишан.
Мислам дека тоа е нечесно, неетички. Не може веднаш да се заземаат ставови. А сето тоа е индикатор на меѓунационалните односи во Македонија“, нагласува Катарџиев.
Редакторот на Македонската енциклопедија, академик Блаже Ристовски, најави дека во текот на денешниот ден ќе се одржи состанок со авторите на спорните определници и потоа ќе биде испратено писмено соопштение за јавноста.
Автор на спорната определница е историчарот Ѓорѓи Малковски, кој тврди дека податокот според кој Албанците се доселиле на овие простори во 16 век е историски наод поткрепен во османлиските архиви и пописи правени во тој период и подготвен е со аргументи да се соочи со албанските историчари.
Невена Поповска