Владичице Себлагословена, Пречиста Дево,
Рају сечудесен, Градино доброустроена.
Те молам, Сечиста, обалгодати го мојот ум,
управи ги моите мисли, просветли ја мојата душа.
Ќерко, направи ме чист, кроток, чесен и храбар,
тивок, уреден, прав, богоподобен,
снисходлив, долготрпелив, на добродетели сад,
непорочен, беспрекорен, ризница на блага.
Дај ми мудрост, разум и одмереност,
свесност, едноставност и смиреномудрие.
Дај ми трезвеност, око просветлено, разум сесветол, дух очистен.
Изгони ја надуеноста, гордоста, надменоста,
вообразеноста и арогантноста, хулењето, нескротливоста,
високомерието, јазикот празнословен, тврдоглавоста;
непостојаноста ужасна, многусловието, големата лукавост и вулгарноста.
Подари ми, Сечиста, добродетелна храброст, смелост, стабилност, дај ми воздржание.
Дај ми самоодрекување, несреброљубие,
ревност по разумот и незлопамтивост.
Дај ми непропадливост, благородност на срцето, дух прав, мирен и дух на вистината.
Избркај ги, Сечиста, страстите на срцето,
многуименитите, Чиста, душевни опасности.
Нехраброста грозна, дрскоста, кукавичлукот,
неодлучноста неволна, и безнадежноста.
Одземи го, Ќерко, гневот и секоја леност,
безволието, јароста како и мрзеливоста.
Завидливоста, острастеноста, омразата, злобата,
бесот, одмаздата, злопамтењето.
Раздорот срамен и многузборливоста,
злојазичноста штетна и брбливоста.
Дај ми, Дево, чувство, дај ми благочувствие.
Дај ми сочувство големо и благоразумие.
Дај ми ја, Дево, радоста на Духот Свети.
Дај ми мир на душата, мирот Господов.
Дај ми љубов, ерос Божествен, пречистен многу, топол, чист и осветен.
Дај вера жива, дејствителна, топла, чиста, света,
надеж непоколеблива, сигурна и света.
Одземи ги од мене, Дево, веригите на гревот, немарноста, пијанството,
немилосрдноста, лошите желби, штетниот разврат,
потсмевот на расипништвото и секое злодејство.
Целомудрие дај ми, Ќерко, дај воздржание,
пост, внимание и бдение и послушание совршено.
Дај ми внимание во сѐ и расудување остро,
молчание и уредност и трпение свето.
Трудољубие подај, Владичице, во работата,
во усовршувањето и ревност за вежбање во добродетелите.
Душата моја, срцето и умот, Пресвета,
држи ги во светост, зачувај ги во девство.