Испосничката карпа во Зрзе датира од втората половина на 9 век. Монашки живот еден век пред оној на Света Гора

Најновите археолошки истражувања на монашкиот комплекс на манастирот во Зрзе, потврдуваат дека на овој простор функционирал организиран монашки живот уште во 9 век.

„Испосничката карпа во организираниот монашки комплекс во манастирот Зрзе датира од втората половина на 9 и 10 век. Ова е потврда дека овде постоел монашки живот кој кореспондира со периодот на обновувањето на Климентовото монаштво на Плаошник, кое пак е еден век постаро од светогорското“, потврди археологот Бранислав Ристески, раководител на проектот.

Според владиката Климент, ова откритие е од исклучително значење и е потврда за културниот, национален и црковен идентитет на Македонија. „Веќе имаме докази, културен слој на живеење во интактна состојба од артефакти кои означуваат дека монашката населба во горната карпа е од 9 век. Информацијата дека манастирот е од 9 век ја потврдува тезата дека Македонија е земја на цркви и манастири“, вели владиката Климент. Како старешина на трите манастири во Зрзе, Трескавец и Варош, владиката Климент ја истакнува важноста на археолошките истражувања како услов за реконструирање на манастирите и другите верски објекти.

Министерството за култура за обемните истражувања во Зрзе кои и натаму ќе се реализираат, одвоило 560.000 денари. Од таму најавуваат дека на приоритетна листа на програмата е и манастирот Трескавец. „Во тек е подготовката на проектите за сите фази на санација и реставраторско-конзерваторски работи на конаците и манастирот Трескавец“, вели Елизабета Канческа-Милеска, државен секретар за култура. (М.Т.) -Утрински весник

---

сподели ја оваа објава

Оставете Ваш коментар

Внеси коментар
Ве молиме внесениот коментар нека се однесува на објавата. Коментарите со лични вербални напади нема да бидат објавени. Не користите коментари за рекламирање на вашата страна. Истите ќе бидат избришани. Само кликнете на *Refresh* копчето од вашиот прелистувач за нов безбедносен код.
Име:
E-mail
BBCode:
Коментар:
	Сакам да бидам известен/а по email за коментарите на оваа објава